Juan 15 - La'qaatqa ñi qota'olec Qota'olec & Qota'olec Novita Na Qomyipi

Aca nanecse uva chaqai naua lasote

¹ Ca' ỹim ná'maq 'nejem acá'maq ỹaatqajam nanecse uva, chaqai ñi ita'a ñí'maq cochiitapega aca nanecse.

² Ñi'maxare ichaxauec acanchaqaca quená'maq ỹasotellipi no'm sqaca aca la, chaqai no'ueenaxategue chaqai co'taxat acá'maq lasote 'ue aca la, qaiyi paguec aca la.

³ Chicqochigui da ỹapaxaguinataxanaxac quiyim qamiri mashic co'chiita.

⁴ Quiitalec quiyim na'yiitau'a ỹim, ca 'nejem aỹim shiquetalec quiyim ña'deeta'guita qamiri. Aca lasote se ishit 'ue aca la no'm chi nanoiquentac, no'm se na'deetau'a acá'maq loỹo; ca chaqai 'nejme' qamiri, qaica ca ishit 'ue aca la, no'm se na'deetau'a aỹim.

⁵ Ca' ỹim ná'maq ỹim nanecse, ca' qamiri ná'maq qamiri lasote. Cá'maq ñaq na'deetau'a ỹim, chaqai aỹim ña'deeta'guit ca'maxare, ca 'xoic aca la, ma' qamiri qaica ca shichii 'viichii, no'm qaica ỹim.

⁶ Ma' cá'maq se na'deetau'a ỹim, ca' qainaxauec, ca' ỹaso, 'nejem aná'maq lasote quena' qalapoon, ca' qaỹavigaxat queca norec.

⁷ No'm qamiri quiitalec quiyim na'yiitau'a ỹim, chaqai mesqai couahi'e naua ỹapaxaguinataxanaxaco, ca cá'maq shiilaxañiỹaque, ca' qoỹaañiỹaxarom.

⁸ Ñi ita'a qaimaqachin quena' 'xoic da laỹaxague' qamiri, ca' viriỹau'a quiyim ỹaatqajam qamiri ỹalamaxarete' ỹapaxaguinatqa.

⁹ Ỹim se'xorene' qamiri 'nejem dá'maq le'xorenataxanaxa ñí'maq ita'a caỹim. Ca' quiitalec dá'maq i'xorenataxanaxa caqamiri.

¹⁰ No'm na'xaỹaxañiỹa na ilaataxanaxaquipi, ca' quiitalec dá'maq i'xorenataxanaxa caqamiri, ca 'nejem aỹim ña'xaỹaxanalo naua lelaataxanaxaco ñi ita'a, ca' shiquetalec da le'xorenataxanaxa caỹim.

¹¹ Ỹim shine'tegue dajo da shinac, qaiyi qamiri ñitoonaxaua', chaqai qaiyi 'xoic ca netoonaxaguii.

¹² Dá'maq ilaataxanaxac 'neetasa': quiyim ne'xoriñiỹata', 'ne'tegue dá'maq i'xorenataxanaxa caqamiri.

¹³ Dá'maq paguec lecaic ne'xorenataxanaxa quiyim hueeto'ot ca qom 'neetasa': quiyim ca qom ishit ỹaanec da nachaalataxac queca nauochaxaua.

¹⁴ No'm 'viichii da ilaataxanaxac, ca' qamiri ñauochaxaua'.

¹⁵ Ca tot samata'que qamiri nelaatqa, ma' cá'maq nelaatec se ỹa'den cá'maq ỹo'uet ca na'co'. Ca shinac quiyim qamiri ñauochaxaua', ma' sa'deenaxanaxañiigue ná'ogue ná'maq 'naapiguiỹa' ñi ita'a.

¹⁶ Qamiri se rca'acshiguii aỹim, ỹim ica'acse' qamiri. Ca vichiguiño' shinapegalo qamiri quiyim 'xoic ca laỹaxac nqai'ñii da nachaalataxaguii, qam dajo laỹaxague' qamiri ỹaatqajam ra'ñiñi nqai'ñii, qaiyi ñi ita'a ỹaanema qamiri cá'ogue cá'maq shiilaxañiỹaque quiyim quiichigui nqai'ñii da ỹeenaxat.

¹⁷ Ca' dajo dá'maq ilaataxanaxac caqamiri: quiyim quiñi 'óna ỹaatqajam i'xoren ca liỹa.

Ỹaatqajam qanoquii'a so Jesús chaqai saua lapaxaguinatqa quená'maq qomyipi hueetalec na 'laua

¹⁸ Ca no'm na qomyipi hueetalec na 'laua noquii'alo qamiri, qam 'yiiñita quiyim 'au noquihaỹa'.

¹⁹ Quetqai qamiri 'laua lase', ca ná'maq qomyipi hueetalec na 'laua nqo'talo qamiri, 'ne'tegue da lqo'iichi quená'maq lalamqateripi. Qam ỹim ñca'au'alo qamiri quená'maq qomyipi hueetalec na 'laua. Vichiguiño' na'maxare noquii'alo qamiri, ma' totqai qamiri lase' na 'laua.

²⁰ Se couahi'e dá'maq shinac na'le caqamiri: “Quiyim ca nelaatec se ỹapacauec queca na'co'.” Ca no'm ỹim qayocantac, ca' qamiri qai'neeta qarocañiỹac ma'le; chaqai no'm qana'xaỹaxana da ỹapaxaguinataxanaxac, qai'neeta qana'xaỹaxana ma'le ca rapaxaguinataxanaxaguii.

²¹ Dá'ogue dajo qohine'teguelo ma'le qamiri, sauaxat aỹim, ma' se qaiuanapega ñí'maq yila'.

²² Queta' se ñanac quiyim setaqaugui na'maxare, ca sqaica quet ca lasauaxaset. Qam nagui qaica quet cá'maq i'guenegue quiyim noqollictegue da lasauaxaset.

²³ Ma' cá'maq noquii'a ỹim, ca' qai'neeta noquii'a ñí'maq ita'a.

²⁴ Qaica quet ca lasauaxaset na'maxare, queta' qaica cá'maq so'uet huaugui na'maxare quená'maq se ishit ỹo'uet ca liỹa qom; qam mashic shi'gue iuana dajo, qam qaiyiita noquihaỹa', chaqai noquii'a qai'neeta ñi ita'a.

²⁵ Qam dajo 'ue, ma' qaỹahotaque quiyim ipaquichigui nqohin da na'qaatec naneretañi queso naqataxaquipi qoỹaanema saua'maxare, ma' 'nerac: “Qaica quet cá'maq 'neeta, qam qanoquihaỹa'.”

²⁶ Qam ma' novi' cá'maq ỹotauane' chaqai ỹa'ñaxate' qamiri, ca Espíritu cá'maq ichoxot dá'maq ỹaatqajam lliqueta, ñila' ma'le chicqo'ot ñi qota'a, ca'maxare ỹa'xat ma'le aỹim.

²⁷ Qamiri qai'neeta ya'xachii ma'le, ma' qamiri iỹareta'pe na' ñaqai 'avichiguiñi sapaxaguinataxan.