Juan 11 - La'qaatqa ñi qota'olec Qota'olec & Qota'olec Novita Na Qomyipi

Da lelauaxa so Lázaro

¹ 'Uo' so ỹale ralolaxaic leenaxato' Lázaro, na'ño' yi na'a' Betania yí'maq nera'ñi aso María chaqai aso lqaỹa Marta.

² Ca' aso María lqaỹo' so Lázaro só'maq ralolaxaic, chaqaso' asó'maq ỹocorelgoto' na'le naua lapiaate' so Jesús queso coraxat lo'daxaraic lahita, ca rashiviaqataxana na laue.

³ Ca saua nqaỹa' dos 'aalo ilate'o' na'le so la'qaategue' queso Jesús, 'neraco': —Qami' qara'gaxala', yí'maq nauochaxaua'e', yi'maxare ralolaxaic.

⁴ Ca' so Jesús co'na' 'xaỹa dajo, ca 'naaco': —Dajo nalolaxa se ỹovita ma'le ca nelauaxa. Ta'ta'a quiyim qaỹahotaque qaỹachaxan da lecaic ñi qota'olec, chaqai quiyim qaỹachigoxochichigui dajo nalolaxa quiyim qainaqachin na llaalec ñi qota'olec.

⁵ Ca' so Jesús 'eno'm nauochaxaua aso María, chaqai aso lqaỹa, chaqai so Lázaro,

⁶ qam co'na' qohinapega quiyim so Lázaro ralolaxaic, qam qaiyiita se reda quiyi neeta'ñi quesaua liỹa' dos na'xata'.

⁷ Co'na' ime, ca 'naapegalo' saua lapaxaguinatqa: —Liỹa saxague da Judea.

⁸ Ca 'neraco' saua lapaxaguinatqa: —Qami' napaxaguinataxanaq, ñaqai cha'gue na' so judioipi na'ñi yi'maxare ỹahotaque ralauachi', ỹodoota'a qami' na qa'; qam ¿lotqai viisaque liỹa 'itquera?

⁹ Ca' so Jesús 'naaco': —Yi 'óna na'xa'a ¿se ỹovito'o' caua doce horas? Ma' queca 'óna qom quiyim ỹouootegueri' quiyi na'xa'a, ca se repoxolaxan, ma' iuana na lauaq 'ue quena 'laua.

¹⁰ Qam ca 'óna, no'm ỹouootapigui yi pe, ca repoxolaxan, ma' qaica yi lauaq.

¹¹ Ca co'na' ime, ca 'naaco' so Jesús: —Laqo' yi qanauochaxaua Lázaro; qam shicpegue', ñqo'xon.

¹² Co'na'le, ca' saua lapaxaguinatqa 'neraco': —Qami' qara'gaxala', no'm chaqai laq ca'maxare, ca' re'oq quiyim ma'le imeuec.

¹³ Qam dá'maq 'neeto' da 'naac so Jesús quiyim ỹaatqajam ileu so Lázaro, qam sauá'maq lapaxaguinatqa 'neesapego' quiyim chi lelaxac cá'maq qohintapega.

¹⁴ Ca' so Jesús ỹaatqajam ichoxote'tema saua'maxare, 'naaco': —Yi Lázaro mashic shi'gue ileu.

¹⁵ Qam ỹim ỹaatqajam 'ue da ña'aachic, ma' sqa seuete'eyi, ma' quedajo, ca' paguec la'maxa caqamiri, qaiyi viilec. Qam qolaqpegue', sa'ajnaxanaxa.

¹⁶ Ca' so Tomás, só'maq qaỹamata'gue huaaya', 'naapegalo saua liỹa' napaxaguinatqa: —Qomi' liỹa qolaq, qaiyi qolqata'ñi' da'maxare ma' ileu.

So Jesús chaqaiso só'maq liỹa nca'leuec nqai'en na leuaxaiquipi chaqai chaqaiso só'maq nca'laxa

¹⁷ Qam co'na' ỹovi' so Jesús, ca mashic ỹovite'o' cuatro na'xata' quiyim qaishinñi so Lázaro.

¹⁸ Yi Betania sqoỹoqaque quiyi Jerusalén, 'uo' ca dos kilómetros y medio da lesega.

¹⁹ Ca 'xoico' so judioipi neeta'ñi yi la'aate' saua Marta chaqai aso María lo'daxatesapigui lauele' saua'maxare, sauaxat quiyim mashic sou so lqaỹa'.

²⁰ Co'na' aso Marta ỹa'deeno' quiyim so Jesús ipalataho, ca' queeta'guit, qam aso María no'ueenañi quiyi la'a'.

²¹ Ca' so Marta 'naaco' queso Jesús: —Qami' ỹa'gaxala', quetaxan viise'o' najo, ca se ileu quet yi ỹaqaỹa.

²² Qam sa'den quiyim ñi qota'olec ỹaañiraxarom cá'maq shiilaxañiraque.

²³ Ca' so Jesús 'naaco' caso'maxare: —Yi rqaỹa'e' liỹa nca'leuec ma'le.

²⁴ Ca' aso Marta 'naaco': —Ajá'a, ỹim sa'den quiyim liỹa nca'leuec ma'le, ma' ỹovita quiyim liỹa qanca'laxatec na leuaxaiquipi queca pa'aatec na'xa'a.

²⁵ Ca' so Jesús 'naaco' caso'maxare: —Chaqaỹim ná'maq ñca'laxatec na leuaxaiquipi, chaqai chaqaỹim ná'maq ỹim nca'laxa. Cá'maq huelec aỹim, 'eno'm ileu, qam nca'leuec.

²⁶ Chaqai ná'ogue ná'maq ñaq nca'leetauec nagui quiyim huelec aỹim, ca tot ileu. ¿Vi'relec qami' dajo?

²⁷ Ca aso'maxare 'naaco': —Ajá'a, qami' ỹa'gaxala', ỹim seuelec quiyim qami' ná'maq qami' nashi qarca'laxaqui, ma' qami' llaalec ñi qota'olec, ná'maq shi'gue qaỹa'xateta'guit nai'a na 'laua.

So Jesús noỹen na' hueete'e añi lahi' so Lázaro

²⁸ Ca co'na' ime 'naac dajo, ca' aso Marta quepegue' roỹaxana aso lqaỹa María. Ca nemoote'tot, 'naaco': —Dá'maq napaxaguinataxanaq hueete'e najo, ca da'maxare noỹaxana'a qami'.

²⁹ Ca co'na' 'xaỹa dajo aso María, ca chaqa'ma' ne'laxashiguim, quepegue' so Jesús.

³⁰ Ca' so Jesús saqa' ỹovira'o' yi na'a'. Ñaqai hueeto'o' yí'maq hua'ño' na' qaỹovichiguit caso Marta.

³¹ Ca co'na' qaiuane'tegue aso María quiyim ne'laxatashiguim, ca chaqa'ma' eec, ca só'maq hueeta'ñi yi la'a' judioipi ỹa'ñaxatetac quiyim qaica ca huapigui lauel, coỹare'tegue, ma' 'neetapigui lauel quiyim quepegue' aca lahi', ca' noỹen.

³² Ca' so María co'na' ỹovire'oga yi hueeta'ñi so Jesús, ca' ỹa'dooto naua le'cootal. Ca 'naaco': —Qami' ỹa'gaxala', quetqai viisa'ño' najo, ca se ileu quet yi ỹaqaỹa.

³³ Ca so Jesús co'na' iuana noỹentac aso María chaqai so judioipi liỹaatac aso'maxare, ca ỹaatqajam 'ue da lachicoxo so'maxare, chaqai redaỹac nqai'en añi le'taxanata da le'laxa.

³⁴ Ca inato' so qomyipi: —¿Hua'co' na'le ca qaishiñi'ñi? Ca qohinaco': —Qami' qara'gaxala', ỹala'e', ca 'ajñi' ma'le.

³⁵ Ca' so Jesús noỹen.

³⁶ Ca' so judioipi 'naaco' na'le: —'Ajñii, ỹaatqajam lqo'itaxato' quen.

³⁷ Qam 'vio' saua 'neraco' queso qomyipi: —Dajo neuanñi nqai'en ca qai'laq, ¿se ishit quet quiyim ỹa'ue ca 'ne'tegue, qaiyi se ipac quiyim ileu yi Lázaro?

Liỹa nca'leuec nqohin so Lázaro

³⁸ So Jesús ỹaatqajam liỹa qaidaxanac queda le'laxa, ca nqo'neu'a aso lahi'. Ca' aso lahi' 'ec lauac, chaqai so ñigo 'ue so lapooque' qa'.

³⁹ Ca so Jesús 'naaco': —Naqachii na qa'. Ca aso Marta só'maq lqaỹa so ileu 'naaco': —Qami' ỹa'gaxala', peeta'a mashic 'ue ca lahita, ma' mashic cuatro na'xata' ileu.

⁴⁰ Qam so Jesús 'naaco' caso'maxare: —¿Mesqai shi'gue shinac caqami' quiyim vi'relec, ca' huañita ca se qaiuanapega lo'ueenataxanaxac ñi qota'olec?

⁴¹ Co'na'le, ca qanaqat so qa'. Ca' so Jesús ra'ishiguimo' quena piguim, ca 'naaco': —Qami' ita'a, saanot qami' da ña'aachic, ma' na'xaỹaxañita aỹim.

⁴² Ỹim sa'deenta quiyim se ỹauanapega quiyim se na'xaỹaxañita quet aỹim. Qam ỹim shinac dajo, ma' sahotaque ca la'maxa na qomyipi hueete'ena, qaiyi na'maxare huelec quiyim aỹim relaachiqui'.

⁴³ Ca co'na' ime 'naac dajo, ca' roỹaxan, 'naaco': —¡Lázaro, nenoxoñirec quena!

⁴⁴ Ca' so leuaxaic nenoxonec, nanaxate'teguelo naua laua' chaqai naua lichil queso laxa', chaqai lepatetagui na lashic so hualoq lahi. Ca' so Jesús 'naaco': —Sohiuec, ca 'xañiỹac, qaiyi qaua.

Qana'deentapigui quiyim qaỹahotaque qaiconlec so Jesús

⁴⁵ Ca' quedajo, ca 'xoico' so judioipi huelec so Jesús quesó'maq coỹarauec aso María co'na' iuanchigui dá'maq ỹo'uet so Jesús.

⁴⁶ Qam 'vio' saua liỹa' que', querepegue' so fariseoipi, ca ra'qaataxane' quedá'maq ỹo'uet so Jesús.

⁴⁷ Ca' so fariseoipi chaqai na lashillipi na netaxaỹaxanqajanqaipi quena' qaretaxaỹa'pegue' ñi qota'a lapooguit so nashillipi ỹo'ueetegueñi na leloxoỹaxaquipi quiyim retaxaỹata' so'maxare. Ca 'naaco': —¿Negue' ca shinqata? Ma' so ỹale ỹaatqajam 'xoic na ỹo'uet netanec se qaiuanapega.

⁴⁸ Ma' no'm chaqaida 'neetari' nqaishinaq, ca ná'ogue na qom huelec ma'le so'maxare. Ca' na nashillipi quiyi Roma anac, ca' iuagaxatac añi qaro'ueenaxanaxaqui chaqai na qouo' laseripi.

⁴⁹ Qam 'uo' so 'óna queso'maxare leenaxat Caifás. So'maxare chaqaiso' só'maq la'gaxala' na netaxaỹaxanqajanqaipi quena' qaretaxaỹa'pegue' ñi qota'a queso ñaaxa. So'maxare 'naaco': —Qamiri qaica ca 'yiiñii.

⁵⁰ Chaqai se retañii quiyim paguec la'maxa coqomi' quiyim 'oonoqui' ca qom ileualec na qouo' laseripi, mesqaida quiyim ná'ogue na'maxare na'laañi.

⁵¹ Qam so Caifás se nodaachiguiñi quiyim ỹa'xat dajo, ma' so'maxare chaqaiso' so la'gaxala' na netaxaỹaxanqajanqaipi queso ñaaxa. Ca' ñi qota'a ỹa'xat nqai'en so'maxare quiyim so Jesús ileualec ná'ogue na judioipi.

⁵² Chaqai mesqainaata na judioipi, ma' qai'neeta ỹahotaque lapoonta' ná'ogue na qota'a llaalqaipi neuagaxatetac.

⁵³ Ca' quesojo na'xa'a so judío lashillipi queetalec idaantaque ca la'maqa' quiyim ỹalauat so Jesús.

⁵⁴ Vichiguiño' so Jesús tot nachaxanta quena' ỹalequetaugui na judioipi. Ta'ta'a quiyim taigue da 'laua Judea, quepegue' yi leseeque'ta yi 'laua qaica qom quiyi na'a' leenaxat Efraín. Ca neeta'anyi liỹaatac so lapaxaguinatqaipi.

⁵⁵ Qam mashic tot qoỹoqaque so lemaqachic na judioipi quena' qaỹo'leente so na'xa'a quena' qoyique'e yi Egipto. Ca 'xoic na chicqote'ogalo qomyipi quena liỹa na'aateripi, quepegue' yi Jerusalén, qaiyi ỹo'uet da no'ueenataxac quiyim nco'taxat na qomyipi, ma' noviro sojo na'xa'a lapoxoqui.

⁵⁶ Ca' qaidaantaque so Jesús, ca co'na' so qomyipi hueetaugui añi no'ueenaxanaxaqui, ca chi nenatetecta': —¿Negue' ca 'ñiỹac? ¿Novi' ma'le quena nemaqachic, loqo'm 'e'?

⁵⁷ Ca' so fariseoipi chaqai so la'gaxala' na netaxaỹaxanqajanqaipi quena' qaretaxaỹa'pegue' ñi qota'a, mashic ỹaanec da la'qaatec quiyim no'm 'ue ca ỹa'den ca hueeta'gue so Jesús, ca qara'qaataxanalo, qaiyi qaiconlec qaicoñi'.