Josué 1 - La'qaatqa ñi qota'olec Qota'olec & Qota'olec Novita Na Qomyipi

So Josué qaroỹaxana quiñi qota'olec

¹ Ca co'na' mashic ileu so Moisés só'maq lelaatec ñi qara'gaxala', ca' ñi qara'gaxala' retaxaỹa'pegue' so Josué só'maq llaalec so Nun só'maq chaqai'en lotaua so Moisés, 'naaco':

² —Ma' mashic tot qaica so ilaatec Moisés, ca' qami' chaqaqami' ná'maq ỹapaca'ta nqai'ñi' ana lachiugue Jordán, riỹa'isa'ta ná'ogue na llaalqaipi so Israel, qaiyi quiipegue' yí'maq 'laua saanema qamiri.

³ Sepacqajanchigui dá'maq ỹa'qaatec na'le queso Moisés na' shinac ỹim saanema qamiri ná'ogue ná'maq 'laua mashic co'viilec.

⁴ Ca' ỹim saanema qamiri ma'le yi 'laua chicqochi'ñi yi 'laua qaica qom, chaqai ana quemaralec qa' ladocai quiyi Líbano, ỹovira'oga aso chalego lecaic lachiugue Eufrates, liỹa'ogue' yá'ogue yi na'laua na hitita laseripi, chaqai ỹovira'oga aso huaaxai, leenaxat Mediterráneo.

⁵ Qaica ca ishit quiyim loxonec qami' quiyim ñaq rca'lli'sauec, ca ỹim iỹaatac qami' ma'le dá'maq shinta'gue na'le queso Moisés. Se salachi'sac chaqai qaica ma' shique'e quet qami'.

⁶ Qam ỹaatqajam na'ñaxachi', se ileuapigui qavilli', ma' qami' naloqojñirec ma'le yi 'laua, 'ỹaañitem na qomyipi, ma' yi'maxare sachaxantapeguem na'le so 'auaxaic leta'allipi quiyim saanem.

⁷ Qam chaqaidaata sahotaque quiyim na'ñaxachi' chaqai se illivigui na qavilli', chaqai ỹaatqajam pacqajñichiriguilo na ỹaqataxaco ỹaanema qami' na'le so ilaatec Moisés. Ỹaatqajam pacqajñichiriguilo naua'maxare, qaiyi 'ue ca 'negue cá'maq canchaqaica coñita.

⁸ Pilaxachisa'gue dá'maq 'naac ana lere hueetalec na laqataxaquipi ñi qota'olec. 'Yiiñisapegalo quiyi na'xa'a chaqai quiyi pe, qaiyi se neme 'viichi'sac dá'maq 'neeta da naqataxac. Ca cá'ogue cá'maq 'viichi' ma'le cá'ogue ỹa'maqachiguiñi.

⁹ Ỹim ná'maq selachi' quiyim na'ñaxachi' chaqai se ileuapigui qavilli'. Se ro'chi'i' chaqai se reualliriñi, ma' ỹim ra'gaxalachi' qota'olec caqami', ca ỹim ñauequeta'pegue' qami' quecanchaqa 'itegue.

So Josué na'maxajñi quiyim rouootaxana'gue yi 'laua

¹⁰ Co'na'le, ca' so Josué ila' so lashillipi so qomyipi:

¹¹ —Quiiguilo naua'que naua ra'aachiri ma'le, ca ná'ogue 'ñiỹapega quiyim ỹa'maxatetañi ca nouene', ma' quenauajo tres na'xata', ca sapagaxata aso lachiugue Jordán, qaiyi senqalec yí'maq 'laua ỹachaxantapeguema qomi' ñi qara'gaxala' qota'olec quiyim ỹaanema qomi'. (1.12-18 So Josué ila' so qomyipi.)