Jonás 2 - La'qaatqa ñi qota'olec Qota'olec & Qota'olec Novita Na Qomyipi

Da nqouagaxainaxac so Jonás

¹ Ca co'na' so Jonás co'na' hueetagui na lauel so nallin lodegaxat, ca' nqouagaxaintacot ñi la'gaxala' qota'olec.

² 'Naaco' na' nqouagaxain: Nagui ỹaatqajam seuetaugui na i'xoric, ca soỹaxanot qami', qami' ỹa'gaxala', ca' saachichiguit aỹim. Mashic ypa'xantañi da nelauaxa, ca' soỹaxanot qami', ca' qami' na'xaỹaxañiriua'.

³ Yinaqairi'ña na paguec pa'aañi cana huaaxai, na lo'paxaripi lepachigui aỹim. Nelachi' na paguec lecaic lo'paxaripi, ca' quelec aỹim.

⁴ Ca' ñauate'e quiyim 'ec yo'yirauec, ca 'neetapigui iuel quiyim tot seuana ca ra'aachi' co'teeta.

⁵ Na huaxaỹaq ỹapojlem aỹim quena pa'aañi cana huaaxai, ana qol lepachigui na iqahic.

⁶ Ỹaatqajam seyinñi sovira'ña na lqodoc na qaica 'nejem lishigui'ña; ỹaatqajam 'ec mashic polec aỹim quena 'laua. Qalaxam qami' ỹa'gaxala' qota'olec caỹim, yca'laxachirec queso nelauaxa.

⁷ Na' ñauata'uegue mashic eec dá'ogue da iquesaxanaxa, ca' so'leente'e qami', qami' ỹa'gaxala'; ca' da ñqouagaxainaxac ỹoviro'ot qami' quiyí'maq ñi'sa'ñi ra'aachi' co'teeta.

⁸ Ná'maq huelec na nashiilec nqolaquipi, na'maxare ỹaxanñi quiyim huelec qami'.

⁹ Qam ỹim saantacot qami' da ña'aachicyaxac, chaqai queeta saanot qami' aca savigaxat ỹachitaxanataxanqate; chaqai somachichigui ma'le da ỹa'qaatec sepacqajanchigui. ¡Qami' na'gaxala', chaqaqamite' shichi' ca'laqataxañi'!

¹⁰ Co'na'le, ca' ñi qara'gaxala' ila' so nallin lodegaxat quiyim nesalegue so Jonás quiyi llima.