Joel 2 - La'qaatqa ñi qota'olec Qota'olec & Qota'olec Novita Na Qomyipi

¹ Pi'chiigui ana npe'te cada qa' Sión naugui yi na'a' Jerusalén; pi'chiigui ca npe'taxanaxac quena' 'ue ca nepalata lichic cada co'teeta naqa' ñi qara'gaxala'. Re'loxollii qamiá'ogue ñiitalec na 'laua Judá, ma' tot qoỹoxoguit ca na'xa'a loviraxaqui ñi qara'gaxala'.

² Cajo na'xa'a chalego ma'le ca napalaxa; cajo na'xa'a naueguelquetañi chaqai la'alchiguiñi. Ana piñai 'ec na 'xoic nouaataxanaq nalauataxai quelec neuagaxajlec ana qa' ladocai, 'ec na lauaq quena' richiguiñi. Se ỹauanapega qaiuana dajo, chaqai qaica ma' qaiuana quet cá'maq 'nejem dajo.

Dá'maq 'neeta quena' novi' ana piñai

³ Mashic 'nejem ca norec ná'ogue ỹavigaxat, saqa' quelec yi'maxare, qa' shi'gue ỹavigaxat, chaqai quena' shi'gue quelec. Yí'maq 'laua na' saqa' novi' ana piñai, yi'maxare chalego loyac, qam quena' mashic ỹoxogue, ca' qaica ca no'ueenañi. ¡Ná'ogue qo'queeta, qaica ca llitec!

⁴ Da no'ueenataxac 'ec na shipgaq chaqai quena' ne'guenta, 'ec na qom neetashiguim,

⁵ chaqai da lelamaxa quena' renoteta'gue ana qa' ladocai, da lelamaxa 'ec ana nahoglena lauataxaqui, da lelamaxa 'ec ana qo'paq laue laso quena' ỹavic quena norec. Na piñai 'ec na nouaataxanaq quesaxanaxaic quena' naloqojñi quiyim eec nalauat.

⁶ Na qom quena' iuana, ca' i'loxol, chaqai ná'ogue na lashic nalacqatec.

⁷ 'Ec na qom 'ñaaxaic quena' nalauat, ne'guenta, quishi'megue na napoxonaxat, chaqai dá'maq reloqota'gue, ca' chaqaida ta'tegue, qaica ma' 'ue quet aca ỹoxouec queca llic.

⁸ Qaca aca i'guenta'guit aca liỹa; ỹalamaxatetec añi 'óna quecá'maq ta'tegue, chaqai renotaugui ná'maq noviquipi, qam sqai sogui quedá'maq 'neetari' naloqojonchiguiñi.

⁹ Queu'a na na'aateripi leta'allipi, ne'guenta queetalec na napoxonaxat, quishi'megue na 'imqaipi, chaqai 'ec na cuataxairipi inoxontouguilo naua nqotel.

¹⁰ Na 'laua i'loxol quena'le cana'maxare, redaỹac na piguim, añi ra'aasa chaqai ñi shiraigo napalliguilo chaqai na huaqajñipi tot qaica ca lauaq.

¹¹ Ñi qara'gaxala' 'auetauec queso nalliripi, qara'xaỹaque nqai'en da lauel 'ec soxonaxa. Ỹaatqajam 'xoic so nalliripi; tot qaica ca naloqochin só'maq ilaretac. ¡Chalego lecaic chaqai da lichic só'maq na'xa'a loviraxaqui ñi qara'gaxala'! Ỹaatqajam qaica ca ishit quepaxata'guit.

Da lqouagaxa ñi qara'gaxala'

¹² Qam nagui ỹim na'gaxala' se'taxajñi da ỹa'qaatec, shinac: Rapilliu'a aỹim cañá'ogue añi re'taxanatahi. ¡Nqopaaqachichii, raualaxahi chaqai noỹiñii!

¹³ ¡Pilliu'a qamiri ñi qara'gaxala', ñí'maq qota'olec caqamiri, ỹaatqajam 'chiichiguiñi nqai'ñii ca netacochaxahi cañi re'taxanatahi, qam se nasectaxachiỹa'ahi naua qatoohi! Ma' ñi qara'gaxala' sotaxaraic da lo'ueenataxanaxac chaqai qouagaxanqachaqaic, hualaxauaic chaqai imaañi da le'xorenataxanaxa, 'eco' se nqo'ta quiyim 'ue ca ỹa'ue ca nouaxanaxaset.

¹⁴ Sqoue se ỹa'ue ca nouaxanaxasete' qamiri, ca nela' ca lqouagaxa caqamiri. Ca ỹa'ue ca lqouagaxanaxat nanecsec ala chaqai na lataxa, ca qaiyi 'ue ca rachitaxanataxanaxachii quiñi qara'gaxala', ñí'maq qota'olec caqamiri.

¹⁵ ¡Pi'chiigui aca npe'te cada qa' ladocai Sión! Taxaiỹougui na qomyipi chaqai 'ñiỹac: Ñqopaaqachitaq;

¹⁶ lapooñiỹata' na lalamaxareteripi ñi qota'olec, chaqai nco'taxachiñi; lapoỹata' nqai'ñii na qo'xoiquipioqui', na ñaaqaipioqui' chaqai vire'ta ná'maq ñaqai llipetac. ¡Vire'ta nauá'maq ñaqai chita'gue o'nata' nenoxondec queca lauote' 'imec!

¹⁷ Noỹen na netaxaỹaxanqajanqaipi ná'maq ro'ueenataxantacot ñi qara'gaxala', ca ma' viitañiguilo yi lavinñi' quiñi ñigo chaqai cada ncopatoxonaxalate, ca 'ñiỹac: Qami' qara'gaxala' mesqai quirapeguem na ralamaxarichi'ipi; 'neeto' 'xañitegue quiyim 'ue ca i'neetac ná'maq ralamaxarichi'ipi; 'neeto' 'xañitegue quiyim na liỹa ỹoqa'a qomyipi ỹoiquentac na'maxare chaqai quiyim na liỹa qomyipi sqai huelec qami' 'naac: ¿Negue' cá'maq hueeta'gue cá'maq qota'olec caqamiri?

¹⁸ Ca na'le, ca' ñi qara'gaxala' re'oq nqai'en da le'xorenataxanaxa queso qomyipi, ca nqouaguegue so lalamaxareteripi,

¹⁹ ca 'naac: So'uet ma'le quiyim 'ue caqamiri ca trigo, ca lataxa chaqai ca aceite, chi ỹovireta'a nqaishin ra'maxaichiguiñi; ca tot liỹa sa'maxaren quiyim ri'ñiitac na qomyipi sqai huelec aỹim.

²⁰ Soỹoote'oga ma'le caqamiri ana piñai chicqa'gue da rapiguim, chaqai semaxalec yi 'laua sqaica qom. Ná'maq na'aueta homac nqaishin caso huaaxai qaỹamata'gue huaaxai leuaxai, chaqai cá'maq co'uaataxanta, ca taañigui nqaishin aso huaaxai qaỹamata'gue huaaxai hueetañiguilo naua 'lauari, ca' na loshicmaxa nichiga', ca' se no'uen na lahita. ¡Ca 'xoic lecaic ma'le cá'maq so'uet!

²¹ Ca netooñi' qami' 'laua, chaqai totaxan ro'chi'i', ma' ñi qara'gaxala' 'xoic lecaic ma'le cá'maq ỹo'uet.

²² Qamiri iseripi neuec totaxan ro'chii, ma' na 'uaqapi liỹa no'ualauec ma'le, chaqai ana qo'paq lotqai 'ue ana la, chaqai ỹaatqajam 'xoic ma'le ana 'igo chaqai ana 'uva.

²³ ¡Netooñitac qamiri ñiỹa'ñi na Sión, netooñita'gue ñi qara'gaxala' ñí'maq qota'olec caqamiri! Ma' chaqaiñi ñí'maq nela' na ỹaxat na' viñitac, naua ỹaaqate' quiyi no'oomaxa chaqai yi nosaxa, dá'maq chaqai'en 'neetari' quen quesom.

²⁴ Ma'le, ca' 'xoic loyac ca qadañicshiguii trigo, chaqai ỹaatqajam 'xoic ma'le ca lataxa chaqai na aceite.

²⁵ Ỹim sopilaxatema qamiri ma'le saua'que saua ñaxari na'lerañi sauaxat na'le aso piñai 'ec ca nouaataxanaq nopoxoiqataxanaq selatalo na'le qamiri quiyim na'laxatañi so qadañiguii.

²⁶ Ca' qamiri ma' qui'ii chi ỹoviretalec quiyim ỹaatqajam quemari, ca maqachiñitac ma'le ñi qara'gaxala' ñí'maq qota'olec caqamiri, ma' chalego lecaic dá'maq so'uet caqamiri ỹo'uet da ne'laxa. Qaica ma' liỹa quet 'neetari' na ỹalamaxareteripi quiyim paguelec ca layiloxo.

²⁷ Ca 'yiiñiỹa'a ỹim ma'le, qamiri llaalqaipi so Israel, quiyim ỹim na'gaxala' salequetauguilo qamiri, chaqai quiyim ỹim qota'olec caqamiri, ca' qaica ca liỹa. Ca' tot qaica ma' liỹa quet na ỹalamaxareteripi quiyim paguelec quet ca layiloxo.

Novi' so ne'espíritu ñi qota'olec

²⁸ Ca na' ime'ueque dauajo, ca' socorougui so ñi'espíritu ná'ogue na ỹoreta'oguit qomyipi: na qachaalaxahipi chaqai na qachaallipi ỹa'xate' naua ỹa'qaatqa, na qo'xoiquipi 'ue ma'le ca le'guemataxac chaqai na ne'naqaipi 'ue ma'le na leuanaxanaxac.

²⁹ Chaqai socorelec qai'neeta ma'le queso ñi'espíritu na nelaatqaipi chaqai ana nelaatallipi quecauajo na'xata';

³⁰ sa'ue ca sachaxan ma'le quena piguim chaqai quena 'laua cá'maq chalego lecaic nqai'en ca ne'laxa, chaqai neuoripi, norec chaqai na nesalaxaripi 'ec naueguelec.

³¹ Chaqai añi ra'aasa napalligui ma'le, chaqai ñi shiraigo 'ec na leuoripi ma'le, ma' saqa' novi' ca na'xa'a ñi qara'gaxala'. Cajo na'xa'a chalego da lecaic chaqai da lichic.

³² Qam ná'ogue ná'maq pi'ỹa'a chaqai ỹashiila ñi qara'gaxala', quiichigui nqai'en da leenaxat, ca' nca'leuec ma'le, qohit queca nelauaxa, ma' cada qa' ladocai Sión quiyi Jerusalén hueeta'ñi ma'le da nca'laxa, ma' chaqaida dá'maq 'naac na'le ñí'maq qara'gaxala'. Ná'maq lca'acseripi na'le ñi'maxare, ca nca'leuec ma'le. (3.1-21 Ñi qota'olec ỹa'ue da nouaxanaxaset na ỹoreta'oguit qomyipi. Ñi'maxare nqouaguegue ma'le so lalamaxareteripi.)