Joel 1 - La'qaatqa ñi qota'olec Qota'olec & Qota'olec Novita Na Qomyipi

Ana piñai ỹa'ic na nanaxanqa'

¹ Dajo dá'maq la'qaatec ñi qara'gaxala' 'naac na'le queso llaalec so Petuel, leenaxat Joel.

² Ỹaatqajam na'xaỹaxañiita dajo, qamiri qo'xoiquipi, chaqai qamiá'ogue qamiri ñiitalec najo 'laua Judá, ¿Sqai huañiỹapego' quen qamiri ca 'nejem dajo? ¿Se ỹauanapego' quen 'ue ca 'nejem dajo na' ñaqa 'vii saua qata'allii?

³ 'Qaataxañiỹalo naua qachaalaxahi quedajo chaqai caua'maxare ra'qaataxanalo caua llaalqa, chaqai cauá'maq llaalqa ra'qaataxanalo cauá'maq dalaxaic ne'qa'iñi ma'le.

⁴ Sá'ogue qaiqo'queeta caso piñai, ca só'maq no'ueenañi caso 'auaxai, ca novi' aso liỹa, ca' qo'queeta.

⁵ ¡Qamiri ne'taaxairipi, nelohiuec! ¡Noỹiñii, ne'taaxairipi quena lataxa, ma' vire'ta na li'i ana 'uva qarouootaxana'gue ma'le!

⁶ Ma' ana piñai 'ec ca 'xoic nouaataxanaq nalauataxai, chaqai naua la'gaxanqate 'ec na sauaxaic leta'a chaqai naua lasoocse 'ec na sauaxai 'aalo ỹaatqajam i'leque'tegue na ña'laua.

⁷ Ỹaatqajam qo'quiichi'ñiguit na qodanec 'uva loma', qo'queeta ana laue ana 'igo lashi; ỹaatqajam ỹoselaxate'tegue ná'ogue mashic ỹalagre'teguelo nqai'ne' naua lasote.

⁸ Ca' 'nejem aca 'ue ca napiitaxaua quiyim noỹen, ca' ỹañiñi caua noho nachicoxoqui' quena' ileu ca napiitaxaua,

⁹ ca' chaqaida 'neeta noỹen na netaxaỹaxanqajanqaipi ma' quiñi no'ueenaxanaxaqui quiyi Jerusalén tot qaica ca nanecsec ala chaqai ca lataxa quiyim nachitaxanataxanaxat quiñi qara'gaxala'.

¹⁰ Qanichiquichiriñi naua no'ueenaxari, ca na 'laua 'xoic da lachicoxo. Na'laañi cá'ogue ca trigo, na 'uva lomaateripi ỹaso, chaqai na oliva loma' neualñi ana laue.

¹¹ Ca' qamiri nauá'maq 'ueenataxañitac quena no'ueenaxa chaqai quena 'uva loma', noỹiñii queda rachicoxohi, ma' na'laañi ná'ogue na nanecseripi, se qanaqat na trigo chaqai ana cebada.

¹² Mashic nasogoñi na 'uva lomaateripi chaqai na'laañi na 'igo loma'. Qai'neeta ỹaso ana lashi ana granada, ana chaavic, ana manzana lashi, chaqai ná'ogue ana qo'paq quena no'ueenaxa. Ca ¡chaqaida 'neeta, ca na'laañi da laỹaac ná'ogue na qomyipi!

¹³ Qamiri netaxaỹaxanqajanqaipi daañiteguelec ada ncopatoxonaxalate, ñiiñi caua noho nachicoxoqui', chaqai noỹiñii queda nqui'ic, ma' ñi no'ueenaxanaxaqui quiñi qota'olec tot qaica ca nanecsec ala chaqai ca lataxa quiyim nachitaxanataxanaxat.

¹⁴ Taxaiỹougui na qomyipi chaqai 'ñiỹapega quiyim nqopaaqachit; lapooñiỹata' quiñi lo'ueenaxanaxaqui ñi qara'gaxala' ñí'maq qota'olec caqamiri ná'maq qo'xoiquipi chaqai ná'ogue na qomyipi neetalec na 'laua Judá, chaqai raualaxaiỹot shiilahi ñi qara'gaxala'.

¹⁵ ¡'Agai, tot qoỹoxoguit ca na'xa'a loviraxaqui ñi qara'gaxala'! ¡Chalego lichic ma' nodoota quiyim qanopoxoỹaxachiñi qomi', chicqo'ot ñí'maq sqaica lqalanec!

¹⁶ Ỹaatqajam seuanqachigui quiyim qarouootaxana'gue so qonoq, ca' imeuo da naỹaac quiñi no'ueenaxanaxaqui quiñi qota'olec.

¹⁷ Ana la rocalañi quena nayic, ca na'laañi ná'ogue na trigo, ca' naua la lahiri co'chiichiguilo.

¹⁸ ¡Chalego ỹaualqatagui na huacallipi! Ana huaca idaantaque na 'uaqapi, qam qaica; chaqai na qagretaipi neleueta'ñiguit.

¹⁹ ¡Yaualqot qami', qami' ỹa'gaxala', ma' so norec ỹavigaxat na 'uaqapi quiyi 'laua qaica qom chaqai naua qo'pa' quiyi no'ueenaxa!

²⁰ ¡Vire'ta na iseripi neuec ỹaualqatacot qami', ma' mashic rashiviguilo naua ñaachi, chaqai na norec ỹavigaxat na 'uaqapi laqalachi!