Job 8 - La'qaatqa ñi qota'olec Qota'olec & Qota'olec Novita Na Qomyipi

^1-2 Ca' retaqa so Bildad, 'naaco': ¿Chi' laquio' machi' quiyim qui'salec 'ñi'sa'gue dajo da retaxaỹaxaqui'? Taqai'sac, 'ec qami' ca nonot huaquiaxaic.

³ Ñi qota'olec ñí'maq qaica ca lqalanec se ỹauanapega quiyim ỹo'uet quet ca se no'uen, loqo'm ca se leloxoỹaxac.

⁴ Ỹaatqajam 'uo' ca lasauaxaset ca qachaalaxai'ipi quiñi qota'olec, vichiguiño' ñi'maxare ỹa'ue so nouaxanaxaset.

⁵ Daañiraque ñi qota'olec ñí'maq qaica ca lqalanec, ca shiila'e' quiyim nqouaguegue qami'.

⁶ No'm 'viichi' cá'maq ỹa'maqachiguiñi chaqai lamaxachite' ca qayicyaxaqui', ca ñi'maxare reloqota'a qami', ca' ỹa'ue ca ra'aachi' cá'maq 'iichichiguit quiyim ñiisa'ñi.

⁷ Só'maq resallaxa'e' na'le 'ec qaica ma'le, mesqai 'nejem cá'maq resallaxa'e' naata ma'le.

⁸ Nataxañi' queso 'auaxaic ỹalliripi, napaxaguiñita dá'maq ỹa'den ỹovirau'a so 'auaxaic qomyipi.

⁹ Ma' qomi' 'ec chita'gue scavit, ca' qaica ca sa'deenaq; naua qana'xata' quenajo 'laua chita'gue, ca' pala'pe 'ec ca la'al.

¹⁰ Qam ná'maq ñaauapec ỹalliripi quiyim ra'qaataxanem qami', ca' 'xoic na lapaxaguinataxanaxac caqami'.

¹¹ Ana na'uaate chaqai ana rapiagaxan, naua'maxare ñaxate' quena hua'ñi na 'xoic huaxaỹaq;

¹² ca 'eno'm ñaq ladala chaqai saqa' qaichaq, qam 'au ỹaso cana liỹa peue.

¹³ Ca' chaqaida da 'neeta na hualoxonyipi quená'maq coua'e ñi qota'olec; ca' da naquitaxac qaica ca 'negue. (8.14-22 So Bildad queetalec da letaxaỹaxac queso Job.)