Job 6 - La'qaatqa ñi qota'olec Qota'olec & Qota'olec Novita Na Qomyipi

^1-2 Ca' retaqo' so Job, 'naaco': Quetqai ná'ogue na nqui'ic chaqai da i'xoric ishit qaillaañigui aca nesallaqataxanaxaqui, ca' qaisallaxat,

³ ca' ỹapacauec queta'le ca lesallaxa quena lo'uaxanaxa quena lahi aso huaaxai. Ca vichiguiño' setaqa, qam yitanta'uegue da ỹa'qaatec.

⁴ Ma' ñí'maq sqaica ca lqalanec ỹa'deuo caỹim na lovioqoipi, ca' da ledoonaxa na'maxare ỹaatqajam quigui na ỹoshicmaxa. Ñi qota'olec ỹaatqajam 'xoic da iqolonaxa nqai'en quena' yiloquintac.

⁵ ¿Peeta'a noỹen ca 'ashin quiyim 'ue ca loq 'uaqapi? ¿Loqo'm noỹen ca tooro quiyim 'ue ca loq 'uaqapi?

⁶ ¿Negue' cá'maq ỹa'ic ca na'ic yilqota quiyim qaica ca 'ue? ¿Negue' cá'maq naman ca qaica ca lo'daxa?

⁷ Ma' ná'maq se ỹauanapega sahotaque sa'ic, ca' chaqaina ná'maq sa'queetac nagui.

⁸ ¡Saxanchi' nañaañim ñi qota'olec cá'maq sashiilaxanaque; saxanchi' ỹa'ue cá'maq yishiitaque!

⁹ ¡Saxanchi' ñi qota'olec chaqa'ma' liyi ypataxañi, ca' lqodoc nqai'en da ñachaalataxac!

¹⁰ Ca 'eno'm se ỹa'maxatahic da nqui'ic, da'maxare ỹo'uet quet quiyim ỹa'maqachigui iuel, ma' se ñapacalgoto naua laqataxaco ñi qota'olec ñí'maq co'teeta.

¹¹ Mashic qaica ca ỹa'ñaxac quiyim ña'ñaxatetac, chaqai mashic qaica quet cá'maq 'neeta quiyim yca'leetauec.

¹² Sqai shinta ca la'ñaxac ca qa', chaqai sqai shinta ca la'ñaxac ca lecat bronce.

¹³ Mesqai secona ca chi ña'ñaaqataxac, chaqai qaica quet cá'maq chicqa'gue ca ñotaanaxac. (6.14-23 So Job ỹa'ue da lopilaxaset da la'qaatec so Elifaz.)

²⁴ Ñaq yapaxaguiñii, ca' ỹim yi'maqatam ma'le; ñaqai chaxañim cá'maq so'maqajantac.

²⁵ Qaica quet cá'maq liỹoqa'piguit cá'maq qohinac quiyim ỹa'maqachiguiñi, qam qamiri maxaitapiguilec cá'maq sqaica.

²⁶ Qamiri 'quiiteguelgoto naua ỹa'qaatqa, ca naua hualoxona' na'qaatqa chi i'xate' na nonot.

²⁷ ¡Qamiri shichii quiyim hualaxaiñii da nachaalataxac ca na'peloq, chaqai quiyim 'ỹaañiuec miiñii ca nauochaxauahi!

²⁸ Nagui, ca' ỹaatqajam ña'ỹoqo'ojta', ca 'ñiỹapiguiỹa' no'm ña'majantac.

²⁹ Nauá'maq sqai llico ra'qaataxahi, ca ỹoochihe'ogalo, ca' retañii quiyim ỹaatqajam llic da sa'xatetac.

³⁰ ¿Loqo'm 'ñiitapega quiyim ỹim 'maatqaic, quiyim se yitan cá'maq sa'xat?