Job 4 - La'qaatqa ñi qota'olec Qota'olec & Qota'olec Novita Na Qomyipi

Da 'avichiguiñi na'qaatec queso Job

^1-2 Ca' so Elifaz 'naaco': Qami' Job, ỹaatqajam re'qoota quiyim se ra'maqairiñi quiyim 'ue ca retaxaỹa qami', qam se ya'maxañi quiyim yi'maqata.

³ Qami' ma' 'xoic quen na paxaguiñi'sac, chaqai 'ñaxachi'sac na sqaica ca lquesaxanaxa;

⁴ qami' ná'maq 'ñaxachi'sac quen quiyim ne'laxashiguim cá'maq huaañi, chaqai coñisa'guit cá'maq sham huaañi,

⁵ ¿qaullirapeguem quiyim 'ue da ne'guenaxaqui' chaqai qaica ca rquesaxanaxa'e'?

⁶ Qami' ma' ỹaatqajam qami' qamaxaraic lo'ueenataxanqajnec ñi qota'olec, qami' ỹale ỹalamrete' naua ra'deenataxanaxagohi', ¿negue' quet cá'maq 'neeta quiyim qaica ca rpi'ỹaxaqui'?

⁷ 'Deenataxañirac, sha'apiguito' quiyim 'ue ca no'viñira'gue quedajo quiyim queca qaica ca lasauaxaset, qam ỹoviro'ot ca le'xoric.

⁸ Quedá'maq sovira'guit yapaxaguinegue, quiyim ná'maq ỹo'ueetetac da nalauataxanaxac chaqai da se no'uen, ca'maxare icoñiguit ma'le da laseue' dá'maq ỹo'ueetetac.

⁹ Ñi qota'olec queda lonogoxonaxac 'ec pe'telec na'maxare, ca ná'ogue nomachichiguiñi.

¹⁰ 'Eno'm noỹen loqo'm ronoqo 'ec ca sauaxaic leta'allipi, qam ñi qota'olec i'maxañi nqai'en ỹaqaguite' naua louee.

¹¹ Nilliviñi ma'le 'ec ca sauaxaiquipi sqaica ca loxonec, chaqai na llaalqaipi neuagaxatac.

¹² Ỹaatqajam nemooteto quiyim 'ue ca ỹa'xaỹaxac, ỹaatqajam nemooteto, ca 'ec sham se sa'xaỹa da lelamaxa.

¹³ Ca na' pe na' ỹovitot da lelaxac na qom, ca' 'ue so i'guemataxac se i'taxategue ca ilaxac.

¹⁴ Ca' novitot aỹim da iqolonaxa, ca ná'ogue na ỹoshicmaxa i'loxol.

¹⁵ 'Ue so nonot 'ec pi'chigui na ỹashic, ca' chi yapochaxateta.

¹⁶ Ca 'ec 'ue so hueete'eyi, seuane'ta so lqui'i, qam se seuañigui na lashic. Ca nachicochiguiñi... Ime, ca' sa'xaỹaque so nivillaxac, 'naacsa':

¹⁷ ¿Peeta'a ishit ca qom 'maxaraic ca no'ueenataxac quiyim hueeto'ot ñi qota'olec? ¿Peeta'a ishit co'teeta qaca aca lete quiyim hueeto'ot ñí'maq no'ueetqo'?

¹⁸ Ca vire'ta na lelaatqaipi piguim laseripi mesqaica cá'maq ỹaatqajam qaipi'ỹa'a, ma' vire'ta na nelaatqaipi piguim laseripi qaica ma' 'ue quet ca qaica ca la'axaset quiñi qota'olec.

¹⁹ ¡Huose'quet quena chaqai qom ma' paguec qaica ca lquesaxanaxa, 'ec ca 'imec 'laua qaỹa'yiñi queca lamoxoiqa', ca ca'maxare ishit qaipataxañi, 'ec ca pit hueetaugui ca nooỹac!

²⁰ Ca' cajo qom quiyi nete'eta chaqai quiyi avit, ca qanopoxoỹaxajñi, ca' ỹaatqajam ileu, qaica ca 'negue nqohin.

²¹ Ca' da nachaalataxac imeuo, 'ec ca neuaaraxanaxat qaỹachipiaxat; ca' ileu, qam saqa' ỹovi' quiyim 'ue ca la'deenec.