Job 3 - La'qaatqa ñi qota'olec Qota'olec & Qota'olec Novita Na Qomyipi

So Job caapeguem da ne'guenaxac

^1-2 Ca co'na' shi'gom, ca' qaigueme 'ue da la'qaatec so Job, ca' se no'uen da ỹa'xat quecá'maq viquio' na' ne'qaañi so'maxare.

³ Ca' so Job 'naaco': ¡Ỹaatqajam lochi'n so pe só'maq viichigui na' qaico'ỹegue aỹim! ¡Ỹaatqajam chalego la'aaxa nqaishin so na'xa'a na' ñi'qaañi!

⁴ ¡Chalego la'maxa quetaxan sojo na'xa'a ñigui pe nqohin, chaqai ñi qota'olec sqaica nqai'en so'maxare, ca' se richiguiñi queta'le! (3.5-10 So Job niỹoontapeguem ñi qota'olec.)

¹¹ ¿Chi'neco' ma' se yileuauquio' na'le na lauel aso ỹate'e, loqo'm na' ñi'qaañi, ca' ñileuañi quet?

¹² ¿Chi'neco' ma' 'vio' na'le saua ne'cootal hueetalgoto nqohin aỹim na'le, chaqai saua no'ueetel quiyim yillipaxane'?

¹³ Quetaxan yileu queto' na'le, ca nagui queta' ỹim 'maaxaic selaqata, ñco'matetapeguec, sqaicanqaida,

¹⁴ salequetaugui na nashillipi chaqai na lotauaripi, ná'maq qano'xontecshiguim na lahiripi late'ellipi,

¹⁵ loqo'm quena nashillipi, quená'maq no'xataxachiguilo naua lauooto' quena 'oro chaqai quena plata.

¹⁶ ¿Chi'neco' ma' se qaishinño' na'le aỹim shinta ca se nouoc ne'qaañi, loqo'm 'nejem ca noctoqui' neleuañi?

¹⁷ Ma' añi napal lahi' hua'ñi da lqodoc ca ỹo'ueetetac na se no'uen, chaqai ná'maq mashic nco'teuec, ca chaqaiyi hua'ñi, ca' nco'matec;

¹⁸ ca' chaqaiyi hua'ñi, ca' huaguiñi na ncoñiitegueseripi, ca' totqa 'xaỹa da laualaxac na neloxoỹaripi;

¹⁹ chaqai chaqaiyi huera'ñi qaica ca qaỹapacqajnauec queca nesallaxanec chaqai ca 'xoraic, chaqai ca na'ac souec queca na'co'.

²⁰ ¿Chi'neco' ñi qota'olec ma' ỹaanem da nachaalataxac cá'maq 'ue da le'xoric? ¿Chi'negue ma' ỹaanem da lca'laxa cá'maq 'xoic da nqui'ic,

²¹ cá'maq nauaantaque ca lelauaxa, qam se ỹovitot, 'eno'm idaantaque, 'nejem nqai'en ca nouenec chalego loyac qoỹoxojñi?

²² Ca' da netoonaxac cajo ỹale novita, quena' ỹovita quiyim qaishinñi.

²³ Ca' ñi qota'olec qauaata nqai'en ca'maxare, qam se neuanñi nqai'en, quepaxat ná'ogue na lliquipi ca'maxare.

²⁴ Da noỹenaxac, da'maxare 'eco' ca noq, ca 'ec ỹaquip da ỹachootaxac queda nqui'ic.

²⁵ Ca ná'ogue ná'maq yo'chiitaque, quená'maq 'xoic da iqolonaxa, ca' chaqaina ná'maq tajlec aỹim.

²⁶ Qaica ca ñco'mataxac chaqai ca i'maqa'; se sanata ca neuagaxa, ta'ta'a quiyim qaica ca ỹo'daxa.