Job 19 - La'qaatqa ñi qota'olec Qota'olec & Qota'olec Novita Na Qomyipi

^1-2 Ca' queetalec da letaxaỹaxac so Job, 'naaco': ¿Chi' laquio' 'xañiñi quiyim viitaque da i'xoric, chaqai yque'maqachichitac quenaua ra'qaataxahi?

³ Ma' pillitailec quiyim quiitapiguiỹa'; ca ¿qaico' ca rayiloxohi quiyim 'ñiita'gue dajo caỹim?

⁴ 'Eno'm quiyim ỹaatqajam 'ue ca ỹasauaxaset, qam ca ỹasauaxaset qaỹimeta ya'axat.

⁵ Ca' 'ñiitapega paguec 'maxaraqa qamiri caỹim, ca' ỹaatqajam viraqchitapiguiỹa' quedá'maq i'xoric.

⁶ Ca' qamiri ỹaatqajam 'yiiñita quiyim chaqaiñi ñi qota'olec yinaxañi, ca' chaqaiñi ñí'maq ta'ñigui nqai'en aỹim añi noqoina.

⁷ Quiyim yaualaq shinac: ¡qayalauat!, qam qaica ca saachiguit aỹim; soỹaxantac quiyim qayotauan, qam qaica ca na'xaỹaxan.

⁸ Ñi qota'olec ỹapo'ñigui so ỹic, qaiyi sqa shique'tegue; ca' se re'xogue nqai'en so ỹic quena napalaxa.

⁹ Ca' ỹaatqajam rouootaxana'gue sá'ogue so isallaxa; chaqai icona dá'ogue da imaqachic.

¹⁰ Ca' ỹaatqajam yi'xorqachitetam; ca' ¡ỹaatqajam na'laxatañi da ñaquitaxac!

¹¹ Ca' ỹaatqajam ỹomatailec dá'ogue da lauel, 'ec npa'guenaxaua nqai'en aỹim.

¹² Ná'ogue na nalliripi imailec quiyim yiloquin; nahiquinchiguiñi na ỹa'a', ca' na'maxajñi quiyim yiloquin.

¹³ Ñi qota'olec ỹo'uet quiyim na ỹaqaỹaripi chaqai na ñauochaxauaripi noỹootec caỹim, 'ec ỹoqa'a ca sachigoxogue.

^14-15 Ca' na iuo' laseripi chaqai na ñauochaxauaripi yalat, chaqai ná'maq neeta'ñi yi ỹa'a' coua'e aỹim. Na ilaataipi 'ec nqai'en aỹim ca ỹoqa'a. Ca' tot ya'den.

¹⁶ Chaqai no'm soỹaxana ca ilaatec, se na'xaỹaxan; 'eno' 'xoic ca ipagaxallic.

¹⁷ Chaqai no'm ñqo'neu'a añi ỹoua, ca imaqaiguit, chaqai naua ỹalamaxarete' ỹaalqa naqaiqueraỹa'.

¹⁸ Vire'ta na ñaaqaipioqui' se nqo'chiiua'; quena' chi ñi'laxashiguim, ca chaqa'ma' se no'uen na qaỹa'xat caỹim.

¹⁹ Ná'maq paguec ñauochaxauaripi quen, nagui ỹamaqahic; ná'maq ỹaatqajam paguec yqo'ta, nagui, ca' ypa'guen.

²⁰ Na ỹoshicmaxa ronata'guita naua ipi'naqa, mashic 'ec tot yalo'guit quiyim yca'leetauec.

²¹ Rqouaguiic yi'xoriñii, qamiri ñauochaxaua', ma' ñi qota'olec taalec nqai'en aỹim da lqai'laxat.

²² ¿Chi'negue ma' yocañitac, 'ñiitari' ñi qota'olec? ¿Mese nalootaño' quiyim shi'gue netaguitauec aỹim?

²³ ¡Saxanchi' 'ue ca ỹichiñi naua ỹa'qaatqa, hueetalec nqai'en ca lecat, qaiyi hueesalec!

²⁴ ¡Saxanchi' 'ue ca ỹahote'e ca lecat quiyim ỹotocqosañi, hueesalec nqai'ne' ca quiguiñi loqo'm ca qa', ca' sqai pale' caua lerqa!

²⁵ Ỹim sa'den quiyim nca'leetauec cá'maq ro'ootaxanlec aỹim, ca' chaqaica cá'maq quepaqataxanlec aỹim quena 'laua.

²⁶ 'Eno'm nateta'ñiguit na ỹa'at, qam ỹim seuana ma'le ñi qota'olec.

²⁷ Seuana ma'le quenaua ñqote', ỹim ỹaatqajam seuana ma'le, mesqai ca ỹoqa'a. Ilamqauec da ña'ñaaqataxac

²⁸ na' sa'xaỹalo qamiri quiyim 'ñiỹac: “¿Negue' quet cá'maq 'neeta quiyim socanqatac quet? Ma' so lpa'a' dá'maq se no'uen chaqaiñi ñí'maq hueetagui.”

²⁹ Qam ro'chiỹo' so lecat, só'maq lecat rouaxanaxana quen ñi qota'olec quena se no'uen. Qam qamiri 'yiiñita quiyim 'oonoqui' ñí'maq imit ca nasauaxaset. (20.1—30.31 So liỹa letaxaỹaxague' so Job chaqai saua nauochaxaua'.)