Job 13 - La'qaatqa ñi qota'olec Qota'olec & Qota'olec Novita Na Qomyipi

¹ Ca lotqai retaqa so Job, 'naaco': Ná'ogue ná'maq 'xachitac ỹaatqajam seuanchigui quenaua ñqote', chaqai shi'gue ỹaatqajam sa'qaachigui.

² Ná'ogue ná'maq ra'yiiñigui, ỹim qai'neeta sa'den; ca' qamiri sqai paguiỹauec caỹim.

³ Qam ỹim sahotaque setaxaỹa'pegue' ñi qota'olec, sahotaque setaxaỹa'guit ñí'maq sqaica ca lqalanec. Mesqai qamiri.

⁴ Qamiri pohilec dá'maq lliqueta queda ra'maachiguii; qamiri natarenataxana', qam qaica ca machiuec.

⁵ ¡Quetaxan cocho'qui' re'maxaiñi, ca' ỹaatqajam qamiri 'deenaxanqachaqaqa quet qamiri! (13.6-17 So Job queetalec da letaxaỹaxac quesaua nauochaxaua'.)

¹⁸ Ca' nagui, ca' saanec da ỹa'qaatec, ma' ỹaatqajam sa'den quiyim lliqueta da'maxare.

¹⁹ No'm 'ue ca ỹa'xat ca ỹasauaxaset, ca' ỹim yi'maxañi, ca' yileu ma'le.

²⁰ Qami' qota'olec, vite cauá'maq doosolqai' sashiilaxantapigui, ca' se ñañoxotapeguem qami':

²¹ Totaxan queeta quiyim youaxañi'sac, chaqai mesqai 'xoic nqai'ñi' ca iqolonaxa.

²² Ỹaxañiriua', ca' ỹim sasaat ma'le; loqo'm ỹim 'au setaqa ma'le, ca' vite ca lopilaxaset ca ỹa'qaatec.

²³ Ñaqai 'qaataxañirim, ¿negue' cá'maq ỹasauaxaset? ¿Negue' cá'maq se no'uen so'ueetetac?

²⁴ ¿Chi'negue ma' nqañoxochisapeguem aỹim? ¿Chi'negue ma' 'ñiisa'gue quiyim 'ec ỹim npa'guenaxaua'e'?

²⁵ Ỹim shintari' aca qo'paq laue ỹaỹoxonaxat na nonot, ¿chi'negue ma' vi'saque quiyim yapalaxachirac? Ỹim shintari' ca 'auaqapi laso, ca ¿chi'negue ma' yocañi'sac?

²⁶ Ỹaatqajam qui'ỹaq na ỹasauaxaseteripi maqaiseguelec aỹim; ma' vi'saque sa'xat so ỹasauaxaset na' ñaqaỹim ne'necoqui'.

²⁷ Vite lequeete' naua ichil, ra'iichiri'ñiguilo naua ỹaqauaxaqui', chaqai 'ajñite' naua ipiaate' lliquiñi.

²⁸ Chi nemeeta'ñiguit na ỹahillipi, 'ec ỹim ca nooỹac leteraxaic, shinta ca nooỹac ichiqueta na pit.