Job 11 - La'qaatqa ñi qota'olec Qota'olec & Qota'olec Novita Na Qomyipi

^1-2 Ca retaqo' so Zofar, 'naaco': Qami' Job, quená'ogue na ra'qaataxai'ipi ỹa'maqachiguiñi qaỹa'ue ca lopilaxaset, ma' mesqaida quiyim 'xoic ca ra'qaachiqui', ca' ỹaatqajam lliqueta.

³ Ma' ¿'ñiisapego' quiyim 'xoic ca ra'qaataxai'ipi, ca' qare'maqata, chaqai quiyim qaica ca ỹopilaxachiguit na re'naxanaxaqui'ipi?

⁴ Qami' 'ñirac quiyim na rapaxaguinataxanaxaqui' ỹaatqajam ỹa'maqachiguiñi, chaqai chaqaqami' 'ñirac quiyim qami' 'maxaraic.

⁵ ¡Saxanchi' ỹopilaxachiguit da ra'qaachiqui' ñi qota'olec!

⁶ Ca ñi'maxare rapaxaguiñitegue queta'le na la'deenqaipi se re'xogui, ma' ỹaatqajam chalego lqalaigue'. Ca ma'le, ca' 'yiiñi' quiyim ñi qota'olec saqa' ỹaatqajam rouaxañi'.

⁷ ¿'Ñiisapego' vichirau'a na se re'xogui no'ueenataxaquipi ñi qota'olec, ca' shichi' vichirau'a cá'maq se re'xogui leloxoỹaxac ñi'maxare?

⁸ Ca ¿nega'ỹo' cá'maq 'ñi'sa'gue? Ma' naua'maxare paguec lishicshi'mque quena piguim. ¿Negue' quet cá'maq 'yiiñi'? Ma' naua'maxare paguec lishigui'ñigui queca loma' na lqui'i na leuaxaiquipi.

⁹ Paguec lecaigue' quena 'laua, chaqai paguec leca'guelo cana huaaxai.

¹⁰ Ca no'm nanac ñi qota'olec, ca' 'ue ca icona'a, ca roỹaxane'oga quiyim imit, ¿negue' quet cá'maq ishit quepaxat ñi'maxare?

¹¹ Ñi'maxare ỹa'den ca 'maatqaic, ñi'maxare idaanau'a ca hualoxonqaishic, ¿loqo'm 'ñiisapega quiyim se retan?

¹² Cá'maq na'xa'a quiyim na 'ashin neuec ỹaxanñi cá'maq 'neetari', ca' quecajo na'xa'a, ca no'uen ná'maq qaica ca ỹa'den.

¹³ Ca' qami' no'ueenaxachi' da qayicyaxaqui', ca 'ỹaañitot da rashiilaxanaxaqui' ñi qota'olec.

¹⁴ Ca no'm 'xoic ca rasauaxashichi', ca' 'xañiriñi, chaqai sqai 'xañitegue ca se no'uen queca ra'aachi'.

¹⁵ Qaiyi ma' na'irashiguim, qam co'teeta da rashicyaxaqui', re'maqaisapeuc, qaica ca ro'chi'raque.

¹⁶ Ca' coua'ire'e ma'le da re'xoriqui'; ỹaatqajam 'ec ca huaxaỹaq quiyim 'miñi. (11.17—12.24 So Zofar queetalec da letaxaỹaxac queso Job, ca' so Job ỹa'ue da lopilaxaset da la'qaatec.)