Jeremías 4 - La'qaatqa ñi qota'olec Qota'olec & Qota'olec Novita Na Qomyipi

Qaỹadentalec quiyim qanaqajñi yi Judá

⁵ 'Xachii dajo quena Jerusalén chaqai quiyi Judá, pi'chiigui aca npe'te quená'ogue na 'laua hueesalec, taxahi, ỹaatqajam nelamaxariñi ma'le, 'ñiỹac: ¡Hua', lapohiỹata' quenaua na'aate' leta'al 'ue na lquepaqataxanaxat!

⁶ Nanorishiguim aca netana ỹiqueta'gue nqai'ñii da Sión; ¡daañiỹaque ca nañoqotqari, se nomiiñitari'! Ma' sachigoxota'gue ma'le da rapiguim da chalego ne'xoric chaqai da nasouaxac.

⁷ Na sauaxaic leta'a mashic nenoxonec quiyi nañoqotqa', ná'maq mashic nomategueñi na ỹoreta'oguit qomyipi mashic naqueta; nenoxonec quiyi na'laua, ma' ỹahotaque nomajñi na qomyipi neetalec najo 'laua, ỹahotaque co'telec na na'aateripi chaqai nopoxoỹaxajñi.

⁸ Vichiguiño' ñiiñi naua noho nachicoxoqui' noỹiñii chaqai raualaxahi queda nqui'ic, ma' dá'maq chalego lecaic lonogoxonaxac ñi qara'gaxala' sqo ỹoxe'oga coqomi'.

⁹ Ñi qara'gaxala' i'taxajñi da la'qaatec, ca' 'naac: Ma' ỹovita cajo na'xa'a, ñi nashi chaqai na na'gaxalateripi i'loxol ma'le queda lqolonaxa, na netaxaỹaxanqajanqaipi quena' qaretaxaỹa'pegue' aỹim no'chi chaqai na itaxaỹaxaquiripi no'daxatetec ma'le.

¹⁰ Ca na'le, ca' shinac: Qami' qara'gaxala', 'xoraiqolqa, ¡negue' cá'maq 'neeto' ma' chi'riñi na qomyipi quena Jerusalén! Chaxañi'sac na'le quiyim vite ca no'daxa, qam dá'maq taatalec quiyim qaichaqot na lqosot.

¹¹ Ca ma' ỹovita dajo, ca' qohinac quena na'a' lodegaxat Jerusalén: Na nonot pa'e chicqojlec na 'laua qaica qom npe'taxanshiguim, taatagui yi ỹalamaxareteripi. Mesqai ná'maq nonotoqui' ná'maq co'taxategue quen ana trigo ala;

¹² ná'maq nonot ñila' ma'le paguec lquesaxanaxa quena'maxare, ma' nagui so'uet da sa'yiñi nouaxanaxaset na qomyipi quena Jerusalén.

Qanahiquinchiguiñi yi Jerusalén queso npa'guenaxauaripi

¹³ 'Ajñii, na pa'guenaxauaripi mashic 'ec naueguelec, na lahoglenaipi nalauataxaqui 'ec ca nonot quesaxanaxaic, na lalo shipiguiripi paguec liyic queca o'ic. ¡'Xoraiqolqa qomi', ỹaatqajam qara'lliichiguiñom!

¹⁴ Qami' Jerusalén, co'taxachi' añi re'taxanata'e' quena se no'uen, qaiyi rca'llirec ma'le. ¿Chi' laquio' se ỹaqaletentac na rqahiqui' na ra'deenataxanaxaqui' se no'uen?

¹⁵ Chicqochi'ñi yi na'a' Dan chaqai naua quemaralgoto quiyi Efraín se no'uen na na'xaỹaxac chicqa'ñi, qohinac:

¹⁶ Vii la'xaỹaxac na ỹoreta'oguit qomyipi chaqai yi Jerusalén quiyim da qoỹoqo'tegue 'laua chicqa'gue na npa'guenaxaua, ỹaualqata'guit, ỹahotaque nalauataxac, naga'a na na'aateripi leta'allipi quena Judá.

¹⁷ Nahiquinchiguiñi ma'le yi Judá, 'ec na neloxoỹaq quena no'ueenaxa, ma' npa'guene'e' ñi qara'gaxala' qota'olec. Ỹim na'gaxala' se'taxajñi da ỹa'qaatec.

¹⁸ Da no'ueenataxaqui' chaqai da ro'ueenataxanaxaqui' chaqaida chicqochigui dá'maq 'neeta nagui caqami'; dá'maq se no'uen 'viichi'sac, ỹo'uet dá'maq 'ec chim laỹaxac caqami', ca ỹouaxañigui añi re'taxanata'e'.

Da nqui'ic queso Jeremías queso lalamaxaret lauo'

¹⁹ ¡Mashic ñoqogañi queda nqui'ic! ¡Añi i'taxanata 'ue da lquesaxanaxa rachitata! ¡Ỹaatqajam se yo'viijñi, se seshit yi'maqata! Sa'xaỹaque da lelamaxa ana npe'te chaqai da naualaxac quena' lauataq.

²⁰ Tot neme na na'xaỹaxac queda ne'xoric; ná'ogue na 'laua hueetalec na chalego ne'xoric. Mashic chita'gue, ca qanomajñi naua ñco'matqate', qaiuagaxatetac sogui nqohin na ñco'mataxaqui 'imec na'daañi.

²¹ ¿Chi' laquio' quiyim ñaqai queeta sa'ajantac añi netana quena lauataq, chaqai quiyim sa'xaỹaque ca lelamaxa aca npe'te?

²² Na ỹalamaxaret ỹaatqajam se nouoogoñi, se no'uenegue aỹim —'naac ñi qara'gaxala'—. Ỹaatqajam ñaalqaipi se na'maxat, ma' ỹaatqajam se retanaxan. Ỹaatqajam ỹa'den quiyim ỹo'uet na se no'uen, qam se ỹa'den ỹo'uet ca ỹa'maqachiguiñi.

So Jeremías iuana dá'maq naata ne'xoric

²³ Seuana na 'laua quiyim qaica ca qom nelec chaqai qaica cá'maq ỹaatqajam no'ueenataxac; ya'ishiguim quena piguim qaica ca 'ue ca lauaq.

²⁴ Sa'ajan ana qa' ladocai, ca ná'ogue i'loxoltari'; ná'ogue ana quemaralec choolaxan.

²⁵ Na' squenoxon, ca' tot qaica ca seuana qom, chaqai ná'ogue ana qo'o nañit.

²⁶ Squenoxon, ca' seuana na nanaxanqa' quena 'ue ana lenoỹaxai 'neetari' ca se ỹauanapega qoỹanlec, chaqai naua'que naua na'aate' leta'al mashic qanopoxoỹaxajñi. Da chalego lauel ñi qara'gaxala' chicqaugui dá'ogue dajo.

²⁷ Ñi qara'gaxala' 'naac: Ná'ogue na 'laua qanopoxoỹaxajñi, qam mesqai ná'ogue ñomachichiguiñi.

²⁸ Na 'laua no'xalec queda nachicoxo chaqai na piguim 'ue da nasouaxac. Ỹim setaqa, chaqai se netogochigui iuel; ta'ta'a quiyim sepacqajanchigui dá'maq shinac.

²⁹ Ca' queda laualaxac na neetashiguim qomyipi chaqai na no'xoshic lo'ollipi ná'ogue na qomyipi 'eet ne'guentagui; nañoxotougui na leesat loqo'm quishiguim cana qa'. Naua'que naua na'aate' leta'al qoyica'ahi; ca' tot qaica ca na'ñi na'maxare. (4.30-31 So npa'guenaxauaripi nahiquinchiguiñi yi Israel. Ca' so Jeremías 'ue da nqui'ic queso qomyipi.) (5.1—6.30 Lasauaxaset chaqai da npa'guenaxac yi Israel. Qaỹa'xat quiyim qaỹa'ue ma'le ca nouaxanaxaset.)