Jeremías 2 - La'qaatqa ñi qota'olec Qota'olec & Qota'olec Novita Na Qomyipi

So Israel se na'maxat

¹ Ñi qara'gaxala' ỹaatqajam ỹalamaxachichigui aỹim, ca 'naapiguiỹa':

² Mo'e', ma' vichita yi na'a' lodegaxat Jerusalén, ca taxahi'; nichintegue ca ra'qaachiqui', qaiyi ỹaatqajam qara'xaỹa, 'ñiraco': Da la'qaatec ñi qara'gaxala' 'neetasa': So'leente'te na' ñaqai qami' nogot ỹaatqajam na'maxachite' quen, na' secoñiraxaua' quiyim qami' ỹoua, ỹaatqajam rqo'chiriua' na'le, ca' qui'sa'pegue' na'le aỹim quiyi 'laua qaica qom, yí'maq 'laua qaica ca qoỹanlec.

³ Na Israel ỹaatqajam nañaanto'ot aỹim na'le, yi'maxare yí'maq paguec loyac ỹanecsec ala. Quena' 'ue yi sham na'axat, ca' ỹim souaxan, taalec nqaishin da le'xoric, ỹim na'gaxala' qota'olec, se'taxajñi da ỹa'qaatec.

⁴ Ná'maq chigoxougui so Jacob, liỹa leenaxat Israel, ná'maq lalamaxaret llaalqaipi so'maxare, ñaq na'xaỹaxañiỹa da la'qaatec ñi qara'gaxala'.

⁵ Ñi qara'gaxala' 'naacsa' caqamiri: ¿Nega'ỹo' cá'maq se ỹa'maxañi ỹo'ueenataxanaxac iuana caỹim so 'auaxaic qataa'illipi? Ma' ca'e aỹim, quegue coỹareta'pegue' ná'maq 'neetapega qota'olqaipi qam qaica ca 'negue, chaqai ñigui quiyim qaica ca 'negue só'maq qomyipi.

⁶ Mesqaica ma' huapigui quet lauel quiyim idaanaque aỹim quiyim ñaqata'a na'le quiyi Egipto. Ca' sashaxantac quiyi 'laua qaica qom, yi 'laua rashivijlec chaqai 'xoic ana tema, yi 'laua qaica na huaxaỹaq chaqai 'xoic lichic, yi 'laua qaica ca nelec, yí'maq qaica ca ishit quelec.

⁷ Ỹim ñauega na'le ná'maq no'uen 'laua, qaiyi ỹa'ic ná'maq no'uen nanecsec ala chaqai ná'maq no'uen huaalec na'maxare. Qam qamiri na' noviri, ca' hualaxaiñii na 'laua, ca 'viichii quiyim yaqaica'a na ỹalamaxaret ña'laua.

⁸ Na netaxaỹaxanqajanqaipi quena' qaretaxaỹa'pegue' aỹim se idaanaque aỹim, na napaxaguinataxanaripi quena ỹalamaxareteripi qaica ca ỹauaaque aỹim, na lashillipi npa'guene'e' aỹim, na itaxaỹaxaquiripi ỹa'xat da leenaxat so nashiilec Baal, chaqai quegue na nadenqatec nqolac qaica ca 'negue.

Qaỹoviraxata'a yi Israel

⁹ Vichiguiño', ỹim na'gaxala' se'taxajñi da ỹa'qaatec: Quiyim soviraqta'alo qamiri quiyim ñpa'guento qamiri chaqai na qauaripi.

¹⁰ Quiipegueto naua delgoto queda lauashiguim, ca 'ajñii; vii ca larigue da Cedar, qaiyi ỹaatqajam ỹa'ajanta, ca' iuana quiyim ipaquichigui dajo

¹¹ quiyim na mesqai judioipi se ỹadalaxat ca 'naac qota'olqaipi. ¡Quená'maq qota'olqaipi qaica ca 'negue! Qam na ỹalamaxareteripi ca'e aỹim quiyim aỹim lquesaxanaxa, ca' quegue na nadenqatec nqolac qaica ca 'negue.

¹² ¡Qami' piguim, ro'daxachirec ma'le dajo! ¡Re'loxolli' queda rqolonaxa'e'! Ỹim na'gaxala', se'taxajñi da ỹa'qaatec.

¹³ Na ỹalamaxareteripi mashic dos daua lasauaxasete': yalat ca'e aỹim, ỹim lahi' na huaxaỹaq ỹo'uet da nca'laxa, ca ỹo'uet aná'maq chi li'ỹa, ana ni'ỹa raqac, ca' sqai vigui na huaxaỹaq. (2.14-37 Dá'maq 'neeta quiyim se ỹaqamaq yi Israel. Da npa'guenaxac yi Israel, ca ta'chiguit quiyim qaỹa'ue ca nouaxanaxaset.)