Jeremías 14 - La'qaatqa ñi qota'olec Qota'olec & Qota'olec Novita Na Qomyipi

So chalego lecaic nashiviaxa

¹ Sauaxato' so nashiviaxa lodegaxat, ca' ñi qara'gaxala' 'naaco' queso Jeremías:

² Yi Judá noỹen queda lachicoxo, yí'maq na'a' lodegaxat 'ue da lachitachic, na qomyipi mashic nenantañi quena 'laua. Yi Jerusalén ỹaualqatac quena nqui'ic.

³ Na nesallaxanqaipi ila' na la'aquipi quiyim ri'llivi; ca na'maxare quepegue' ana ni'ỹa, qam qaica ca li'llivioxot, co'chiichiguilo naua nehomal quena' rapil; qaỹachiguiñi chaqai 'xoic na layiloxo, ca' chi ỹapogui na lqahic.

⁴ Na no'ueenaxaseripi qaỹachiguiñi chaqai ỹapogui na lqahic, ma' qaica ca ỹaxat chaqai na 'laua chalego na lashiviaxa.

⁵ Vire'ta ana peele quena no'ueenaxa ỹalat ana llaalo'lli' chita'gue ne'qaañi, ma' qaica ca loq 'uaqapi lo'uala.

⁶ Na lolgaqaipi neuec hueetalec ana quemaralec qaica ca qom, ỹauequetegueñi na nonot 'ec na nouaxaỹaxallipi; napalliguilo naua nqote', ma' qaica ca loq 'uaqapi.

So netaxaỹaxaqui ỹashiilatac ñi qara'gaxala', rashiilaxanteguelec na qomyipi

⁷ ¡Qami' qara'gaxala', 'eno'm na qarasauaxaseteripi re'qoote' nqai'ne' qomi', qam 'ueenataxañi', ca maqachiñi' da qadeenaxachi'! Ỹaatqajam shi'gom se qaraqamaq caqami', ca' 'ue da qarasauaxaset caqami'.

⁸ Naquiteta'a quen qami' na Israel, ma' qami' qarca'laxachirec quena' 'ue da qareuogoxo, ¿chi'neco' ma' 'ñiisari' ca ỹoqa'a quena qana'laua, 'ñiisari' ca huooxoic quiyim chi la'qa'ñina?

⁹ ¿Chi'negue ma' 'ec se raqamqe', 'ñiisari' ca nalauataxai quiyim se rotaanaxan? Qam qami' qara'gaxala' ñi'sañiguilo qomi', ná'ogue ỹa'den quiyim qomi' ralamaxarichi'ipi; ¡totaxan qaralachi'!

¹⁰ Ñi qara'gaxala' 'neetasa' da la'qaatec, taỹaugui na llaalqaipi so Israel: Najo qomyipi nemeeten quena taaguilo. Vichiguiño' se yqo'ta. Nagui, ca ño'uenegue na lasauaxaseteripi, ca' so'uet ca nouaxanaxaset na'maxare.

¹¹ Ñi qara'gaxala' 'naac caỹim: Totaxan yashiila'e' queca la'maxa najo qomyipi.

¹² 'Eno'm 'xoic nqopaaqachit, qam se ña'xaỹaxana queca ỹahotaque; no'm 'xoic ca lachitaxanataxanaxat ỹavigaxat chaqai quiyim nodouo ana lanecse ala, qaiyiita se squelolliguit. Ỹim ñalauajñi, sahote'e ca lauataq, nqopaaxa chaqai ca ne'ne'.

¹³ Ca' ỹim shinac na'le: Qam qami' qara'gaxala'; na retaxaỹaxaqui'i'ipi shi'gue 'naac quiyim qaica ca lauataq chaqai ca nqopaaxa, chaqai quiyim qami' vite 'xoic ca no'daxa quenajo 'laua.

¹⁴ Ca na'le, ca 'naac caỹim ñi qara'gaxala': No'm 'naac dajo na netaxaỹaxaquiripi, ca na'majantac. Ỹim se sela', chaqai sqai shilen, chaqai sqaica ca shinapega. Dajo neuanaxanaxac sqai 'chiñi, rayinaxan da'maxare, chi lo'ueenatec quedá'maq chi lque'guenataxanaxac. Dajo ỹa'xatetac na netaxaỹaxaquiripi.

¹⁵ Ma' ỹim, ỹim na'gaxala' shinac quena netaxaỹaxaquiripi ná'maq ỹahotaque retaqa, quiichigui nqai'en da ỹeenaxat, quiyim se sela' chaqai 'naac quiyim qaica ca lauataq chaqai ca nqopaaxa quenajo 'laua, ỹim shinac na netaxaỹaxaquiripi ileu ma'le queca lauataq chaqai quena lqopaaxa.

¹⁶ Chaqai quená'maq qomyipi retaqasapougui saua'maxare, qai'neeta ileu ma'le queca lauataq chaqai quena lqopaaxa, queeta'ñi' ana loua, llaalqaipi, llaallipi. Na loshicmaxa ma' ileu, ca' qainaxa'ñigui naua nayico quena Jerusalén, chaqai qaica ca ishinñi. Ca' queda, ca' ishiueten nqaishin dá'maq se no'uen ỹo'ueetetac. (14.17-22 So netaxaỹaxaqui Jeremías nalamaxate'te' ñi qara'gaxala'.)