Isaías 8 - La'qaatqa ñi qota'olec Qota'olec & Qota'olec Novita Na Qomyipi

'Ue da taỹaugui ma'le da leenaxat so llaalec so Isaías

¹ Ca' ñi qota'olec 'naac caỹim: —Coñita ca qo'paq lahi lodegaxat nichaxasec, ca 'chirelec ca'maxare, re'qoote' nqai'ñi' caua qaderaxahi', 'chiriñi: Qaỹaloq nouootaxanaxac chaqai nalauataxanaxac.

² Ca viqui' ma'le ñaua dos ỹale' qamaxaraqa quiyim i'taxachiñi dajo, ñi netaxaỹaxanqajnec Urías chaqai ñi Zacarías ñí'maq llaalec so Jeberequías.

³ Ca na' ime, ca ỹapa'ñi' añi ỹoua ñí'maq qota'olec letaxaỹaxaqui, ca ñi'maxare 'man, ca 'ue so llaalcoqui'. Ca na'le, ca ñi qara'gaxala' 'naac caỹim: —Leenaxat nqai'ñi' Qaỹaloq nouootaxanaxac chaqai nalauataxanaxac.

⁴ Ma' cajo noctoqui' ma' saqa' ỹa'den quiyim 'naac taat chaqai maam, ca' qanouote' yaua na'aate' Damasco chaqai yi Samaria queda lesallaqa', ca' qaỹodou'a ñi nashi quiyi Asiria.

⁵ Ca' ñi qara'gaxala' liỹa 'naac caỹim:

⁶ Ma' ỹaatqajam no'cha'a najo qomyipi ñi nashi Rezín chaqai ñi liỹa nashi, llaalec so Remalías, vichiguiño' ỹañijin na huaxaỹaq caso ñaachi Siloé, quiyim queeta nichireta,

⁷ ca ñi qara'gaxala' i'paxanlec nqai'en quena lo'paxa chicqa'oga aso lachiugue Eufrates (qam da leloxoỹaxac 'neetasa': quiyim ñi nashi quiyi Asiria ỹomatalec najo ma'le da lquesaxanaxa). Ca que'ueguelo ma'le naua lasote, ca ỹovirete'ueguelo naua'que naua lahil,

⁸ ca quejlec ma'le najo 'laua Judá, ca i'paxanlec nqai'en, ỹoviro'ot nqai'en na lqosot. Ca 'ec aca qo'o ipeguendec naua laua', ca napoxonaxanchiguiñi ná'ogue na senqatalec na'laua ñi qota'olec Emanuel. (8.9-22 Ñi qara'gaxala' qata so letaxaỹaxaqui, qaraqata quiyim 'naac se qaretaxaỹa'pegue' na lqui'i na leuaxaiquipi. 'Xoic lqalaigue' saua na'xata'.)