Isaías 60 - La'qaatqa ñi qota'olec Qota'olec & Qota'olec Novita Na Qomyipi

Da lauaq yí'maq dalaxaic Jerusalén

¹ Ne'laxachirishiguim, Jerusalén, lepatetagui qami' da nqashilegaxa, ma' novi' ana rcoỹeraxanaxagui'i' chaqai da lauaq ñi qara'gaxala' re'oq hueetalec aqami'.

² Na napalaxa hueetalec na 'laua, yi pe taalec ná'ogue na ỹoreta'oguit qomyipi quena 'laua, qam ñi qara'gaxala' hueetalec qami' da lauaq, chaqai hueetalec qami' da lquesaxanaxa.

³ Na ỹoreta'oguit qomyipi nacpegue' aca rcoỹeraxanaxagui'i', na nashillipi nacpegue' dá'maq lauaq re'xolec nqai'en qami'.

⁴ Na'i'rashiguim, ca 'ajñi' naua'que naua lahil na ñi'sa'ñi: ná'ogue lapoỹata', ca nacpegue' qami'. Na qachaalaxai'ipi qoỹoqo'tegue na chicqa'gue; chaqai na qachaalli'ipi qanodoota qaiqa'aalto'ot.

⁵ Ca qami', ma' daañira'guit, ca' qaica 'nejem da netoonaxaqui', ñi re'taxanata'e' no'xa ma'le queda netoonaxaqui'; qanodoota'a qami' ma'le da nesallaxa chicqa'gue da lahi ana huaaxai, qoỹaanem qami' ma'le da lesallaxa na ỹoreta'oguit qomyipi.

⁶ Ma'le, ca' huañita quiyim 'xoic aca nauaanaxanaxa late'e, chicqa'gue da Madián chaqai da Efa; novi' ma'le yá'ogue yi na'ñi yi Sabá, nodo ma'le na ne'óro chaqai na nichiinaxanaxat, ca ỹa'xat ma'le da lquesaxanaxa da lo'ueenataxanaxac ñi qara'gaxala' qota'olec.

⁷ Ná'ogue ana qagreta quiyi Cedar qalo'e' ma'le; na qagreta louaaripi quiyi Nebaiot rovinqui' ma'le, ca ma'le, ca 'ỹaañitot ñi qara'gaxala' quiyi lanatqa', ca' cajo name icoñi'chiguit, ca ñi'maxare ma'le paguec nqo'naxatec da loyac ñi lo'ueenaxanaxaqui.

⁸ ¿Negue' ná'maq ỹootajlec 'ec na naueguelec, 'ec na coviguiñiguiripi quepegue' ca lco'viichaqa'?

⁹ Najo qom lahiripi quiñigui na huaxaỹaq nauequetecta', ca' na qom lahiripi looỹac yi Tarsis na'aaueta, qoỹoqo'tegue da ỹachigoxota'gue na qachaalaxai'ipi, ne'xateta na ne'óro chaqai na nepláta, ỹahotaque imaqachin ñi qara'gaxala', ñí'maq co'teeta qota'olec quena Israel, ñí'maq ỹo'uet quiyim 'ue da rauaqe'.

¹⁰ Na ỹoqa'a qomyipi no'xonshiguim ma'le na rquepaqataxanaxachi', chaqai na lashillipi na'maxare ro'ueenataxanot qami' ma'le; ma' 'eno'm queso lonogoxonaxac ñi qara'gaxala', ca rouaxañi', qam nagui queda lqouagaxa, ca lotqai re'xoriñi'.

¹¹ Na lasomyipi caqami' se neme nauatetagui; sqai poguilo quiyi pe chaqai quiyi na'xa'a, qaiyi ishit qanodou'a qami' da lesallaxa na ỹoreta'oguit qomyipi, chaqai inoxono na ỹoqa'a nashillipi liỹaataho na neloxoỹaripi.

¹² Cá'maq qomyipi queca liỹa 'laua no'm se ro'ueenataxanot qami', ca nimiichiguiñi; 'xoic na ỹoqa'a nimiichiguiñi ma'le.

¹³ Ñi qara'gaxala' qota'olec 'naapega yi Jerusalén: Da lesallaxa yi 'laua Líbano qanoda'a qami' ma'le: na qo'paq leenaxat pino, abeto chaqai na ciprés, qaỹahotaque qano'ueenaxat ñi ỹo'ueenaxanaxaqui, qaiyi 'ue ca lauaq yí'maq ico'ỹaaqa'.

¹⁴ Na llaalqaipi ná'maq 'xoic lqa'viic caqami' nacpegue' qami', ca' neneequesenta, ná'ogue ná'maq se nqo'ta qami', nacpegue' qami', ca' ỹa'chi'iñi naua le'cootal queca loqoisa'ñi, chaqai ỹamata'gue qami' Sión, la'a' ñí'maq co'teeta qara'gaxala' qota'olec quena Israel.

¹⁵ Qami' na'a' tot qanoqui'raxaua', qaqamite' chaqai qaralachi', ta'ta'a quiyim so'uet ca rauaqe' sqaica lqodoc, chicqochigui ma'le quiyim se neme da naỹaac.

¹⁶ Na ỹoreta'oguit qomyipi ỹaanem qami' ma'le ná'maq no'uen na'ic chaqai na nashillipi noda'a qami' ma'le na lesallaxa; chaqai 'yiiñira'a quiyim ỹim ná'maq ñca'laxatec qami', ỹim ra'gaxalachi', chaqai ỹim ná'maq sosouec qami', ỹim quesaxanaxaic qota'olec queso Jacob.

¹⁷ Saañiraxarom quet na bronce, qam saañiraxarom na 'oro, saañiraxarom quet na fierro, qam saañiraxarom na plata, saañiraxarom quet na qo'paq, qam saañiraxarom na bronce, chaqai saañiraxarom quet na qa', qam saañiraxarom na fierro. Sa'ue quiyim 'ue ca no'daxa caqamiri, chaqai quiyim quiitalec da na'maxa.

¹⁸ Quena na'laua'e' tot qara'xaỹaque ma'le da nqa'viic, chaqai tot qanopoxoỹaxajñi naua na'aate' chaqai na qana'laxatañi quena na'laua'e', ta'ta'a quiyim machira'gue na rquepaqataxanaxachi': Nca'laxa; chaqai na lasomyipi machira'gue Toonaxac.

¹⁹ Ma'le, ca' totqai viñi' naviguec añi ra'aasa quiyi na'xa'a, chaqai ñi shiraigo quiyim naviguec quiyi pe, ma' ỹim na'gaxala', ỹim rcoỹeraxanaxagui'i' sqaica lqodoc; ỹim, ỹim qota'olec caqami', ỹim ná'maq ỹim rauaqe'.

²⁰ Ca' totqai polec añi ra'aasa caqami' chaqai ñi shiraigo tot na'laañi da lauaq, ma' ỹim, ỹim na'gaxala', ỹim rcoỹeraxanaxagui'i' ma'le sqaica lqodoc; chaqai qaicaua ma'le naua na'xata' rachicoxoquichi'.

²¹ Ná'ogue ná'maq qomyipi neetaugui qami' ỹo'ueetetac ma'le da no'uen, qaica ishit naqat ma'le quená'maq chi na'laua, na'maxare llaxataxai aca ỹanecse, sanñi na'le, na'maxare so'uet, ma' sahotaque sachaxan da iquesaxanaxa.

²² Nauajo sqo vito'olqai', qam ñqo'naxatec quiyim qaica naloqochin; naua sqo vito'olqai' na'le, ca' ni'ic lodegaxat. Ỹim, ná'maq ỹim na'gaxala', ỹim so'uet quiyim qaỹaloq 'ue dajo, ma' ỹovita ca laloqo'.