Isaías 59 - La'qaatqa ñi qota'olec Qota'olec & Qota'olec Novita Na Qomyipi

Qaỹouaxan da lasauaxaset so llaalqaipi so Israel

¹ Da lquesaxanaxa ñi qara'gaxala' se naqaguiñi quiyim se ishit ca'laqataxan, chaqai mese ra'ñaagui lqahic quiyim 'ec se na'xaỹaxan.

² Qam ná'maq se no'uen 'viichitac qamiri, ca 'eco' ỹapoota'piguita qamiri quiñi qota'olec; na rasauaxashichii ỹo'uet quiyim ỹapogui na lashic ñi'maxare, ca' se na'xaỹaxanalo qamiri.

³ Naua rqai'laqachiri la'ne'teguelo quena leuoripi chaqai naua napoquenallii hueetaguilo da nalauataxanaxac; naua qadaapiri chicqotapouguilo na na'maachic, ñi ro'legaxanaxachii hueetalec na se no'uen.

⁴ Qaica ca ỹa'maqachiguiñi quiyim 'ue ca talaxanlec chaqai na'majantacot na nimiitaxanaripi quena nasauaxaset. Paguec pi'ỹa'a da na'maachic chaqai naua na'qaatqa repeetaxante'; mashic 'manegue na se no'uen;, ca' ne'qaañi nqai'en da nalauataxanaxac.

⁵ Nqa'paxanlec na nanaic lco'ue', ipaxajta' na palachiregaxa lala'; cá'maq ỹa'ic sojo lco'ue', ca ileu, chaqai no'm 'ue ca ỹopoxoỹaxachigui, ca' nenoxonec na nanaic 'ue ledoonaxa.

⁶ Ca' queso palachiregaxa lala' se qaỹo'uet aca loxoqui; chaqai se no'viichigui ná'maq ỹaqaletentac. Qaidaata da nelauaxa ỹo'ueetetac, naua lqai'laqate' ỹo'ueetesac da nqa'viic,

⁷ naua lichil ta'chiguita quiyim ỹo'uet ca se no'uen, 'ue da lquipitqachic quiyim ỹocoraxata'pe caua leuo' ca qaica ca lasauaxaset. Ỹa'deentaque ca lalauataxanaxac, ca quecá'maq que'tegue, ca' nopoxoỹaxajñi chaqai na'laxatañi.

⁸ Se iuana so nayic da no'daxa, se ỹalamchi naua lo'ueenataxanaxaco. Naua llicyaxaco queeta'guelo se ỹalamchi; ca ná'maq queeta'guelo saua'maxare, ca' se ỹanata da no'daxa.

⁹ Vichiguiño' da nca'laxa noỹootec coqomi' chaqai da qanosoxoc se nqo'neuo; ñauaanqataque quiyim richiguiñi, qam lama'xa na napalaxa; sahoqotaque quiyim re'xolecna, qam qolqatapougui na napalaxa.

¹⁰ Sepootaxanqata, 'ec qomi' ca qai'laq queeto'ot ca 'imec lahi, 'ec sqaicaua naua qanqote'; quiyi na'xa'a lavinñi, qam sepoxolaxanaq, 'ec qolqatagui ca pe; qarca'leetauec, qam 'ec qomi' leuaxaqa.

¹¹ Qomá'ogue sonoxoiqatagui, 'ec qomi' aca layoraxai late'e, ñoỹenqatagui, 'ec qomi' coviguiñiguiripi; ñauaanqataque ca nca'laxa, qam se novi'; ñauaanqataque ca qanosoxoc, qam qoỹoqo'ta.

¹² Qomi' ỹaatqajam so'ooqochitaq qami', ñauatqa'uegue na qarasauaxaseteripi sqai pal; ná'ogue na qarasauaxaset ná'ogue ño'uenqata'gue chaqai sa'deenqata ná'maq so'ueetqatac se no'uen.

¹³ Ỹaatqajam spa'guenqatac chaqai se qaraqamaq quiñi qara'gaxala' qota'olec, se sahoqotaque qolaxalec, socachaqata'a quiyim sa'xataq na se no'uen, sahoqe ca qana'deenaxac, ca' sayinaq na liỹa qom.

¹⁴ Dá'maq ỹa'maqachiguiñi se qaicoñiguit, dá'maq no'uen qoỹoqote'oga nqohin, da lliqueta repoxolaxan quiyi 'xoic na qom, chaqai dá'maq naqamaxa qaica ca loma'.

¹⁵ Dá'maq lliqueta na'laañi, chaqai cá'maq noỹootec queda se no'uen, ca' qarocacha ná'maq hueeto'ot. Ñi qara'gaxala' se ỹa'maxagui lauel, ma' iuana quiyim sqaica ca naqamaxa.

¹⁶ Ñi qara'gaxala' qota'olec 'ue da le'laxa na' iuana quiyim qaica ca ỹa'ue ca lata' dajo; ca na'le, ca ro'ueenataxana dá'maq chi lquesaxanaxa, ca' chaqaiñi ñi'maxare rauegaxan.

¹⁷ No'viichigui da lauegaxanaxac 'ec nqai'en aca lachiima lquepaqataxanqate, ỹañigui na lqahic 'ec nado'o nqai'en da nca'laxa, no'viichigui da quiyim ỹa'ue lovi' 'ec ca napoxoqui, ca lepachigui da lonogoxonaxac 'ec nqai'en ca lapo'.

¹⁸ Ñi qara'gaxala' ỹa'ue ma'le cá'maq ỹahotaque; ỹa'ue ma'le ca nouaxanaxaset na npa'guenaxauaripi. Ná'maq loquiiaxat ñi'maxare ỹa'ue ma'le cá'maq ỹahotaque; vire'ta ná'maq neetalec na 'laua queda lahi ana huaaxai.

¹⁹ Ná'ogue na qomyipi neetalec najo 'laua, queda lqodoigue chaqai da lauashiguim, lediỹalec ma'le ñi qara'gaxala' ma' iuana da lecaic quiyim nashi, ma' ñi'maxare ma' nac, ca 'ec aca lachiugue nqo'ñishiguim na huaxaỹaq, qaidaxan queca nonot lodegaxat.

²⁰ Ñi qara'gaxala' i'taxajñi da la'qaatec, 'naac: Ñanac quiyim so'ootaxanlec yi na'a' lodegaxat Sión chaqai quená'ogue na llaalqaipi so Jacob quená'maq netogotegue na lasauaxaset. (59.21 Qaỹa'ue da 'deenaxac sqaica lqodoc.)