Isaías 53 - La'qaatqa ñi qota'olec Qota'olec & Qota'olec Novita Na Qomyipi

¹ Ca' so qomyipi 'naac: ¿Negue' quet cá'maq huelec dá'maq qomi' sa'xaiqachigui? ¿Nega'ỹo' cá'maq ñi qara'gaxala' ỹachaxanem da lquesaxanaxa?

² Ñi qara'gaxala' ỹahotaco' quiyim so lelaatec queda llaxataxac 'ec aca nanecse ra'lliitam, ca' ta'iñi naua lpa'yii quena 'laua rashivita. Qaica ca loyac chaqai sqa taiguit da no'ueenataxac, chaqai dá'maq no'ueenataxac qaica ca lemaqachic;

³ na ỹalliripi se icoñiguit chaqai ỹo'da'guit. Queso ỹale ỹaatqajam 'xoic na nqui'ic chaqai da le'xoric. Mashic 'ec cá'maq se sa'maxarenaq seuanaxa, qomi' lliỹoxosqa'piguit, qaica ca sauaqaque.

⁴ Qam so'maxaro'lec no'qaachigui i'xatetac da qare'xoric, na'ñaxateta'piguit dá'maq nqui'ic hueetalgoto qomi'. Qam qomi' shinqatapega quiyim ñi qota'olec coñirqachit na' ỹouaxan, ca' nemanachit nqai'en.

⁵ Qam qaica'laxatauec sauaxat quiyim se ña'xaỹaxanaxa, ca qaiqa'viỹa'gue sauaxat da se no'uen hueetaguilo qomi'; da le'xoric na' qaỹouaxantac, ca chicqochigui da no'daxa coqomi', chaqai quesaua lcoñiraxa', ca qomá'ogue qaremeuec.

⁶ Ca qomá'ogue so'maqac, 'ec qomi' qagretaipi, quiñi 'óna queeta'pegue' cá'maq chi la'deenataxanaxac, qam ñi qara'gaxala' illaalec so'maxare sá'ogue só'maq se no'uen hueetaguilo qomi'.

⁷ Ỹaatqajam qaiqa'viỹa'gue, qam so'maxaro'lec chi nemanachiteta, vire'ta se ỹauachigui na lap; 'ec ca qagreta llaalec qaỹauega'a ca nalauatqa', qam so'maxare i'maqatam, se ỹauachigui na lap, 'ec aca qagreta quena' qanepetec.

⁸ Qaica cá'maq ỹasauaxat, qam qai'xat, chaqai qaica cá'maq qoshiilec so'maxare; qaica cá'maq itena'a dá'maq nachaalataxac. Qanapocshiguim so'maxare quena 'laua, ca' qaỹalauat soualec na lasauaxaset na ỹalamaxareteripi.

⁹ Huaqato nqohin aso lahi' quena se nouoogoñi qomyipi, qaishinñi qaỹalecqajantougui na hualoxonyipi, 'eno'm se ỹauanapega 'ue ca lasauaxaset, chaqai ỹaatqajam se na'majan.

¹⁰ Ñi qara'gaxala' ỹahotaque ỹa'ue da le'xoric. Ca' quiyim chaqaiso só'maq nañaañiguit da lelauaxa quena nasauaxaset, ca ladoc ma'le da nachaalataxac, ca' iuanau'a ma'le ca llaalqaipi; ca chicqochigui so'maxare ma'le quiyim ỹa'maxañi dá'maq ỹahotaque ỹo'uet ñi qara'gaxala'.

¹¹ Ma' ime'uegue dá'ogue dá'maq le'xoric, ca' iuana ma'le aca ncoỹeraxanaxaqui, ca ỹa'maqachigui lauel ma'le ma' ỹa'den. Só'maq qamaxaraic lelaatec ñi qara'gaxala' 'xoic ma'le na ỹosouec qomyipi, ma' i'xat na leualoxonqaishic.

¹² Vichiguiño' ñi qota'olec ỹa'ue ma'le ca loma', ỹalecqajnougui na leta'allípi, chaqai quená'maq quesaxanaxaiquipi ỹalequetaugui ma'le queda lauegaxanaxac, ma' nañaañiguit da lelauaxa chaqai qaỹalecqajnougui na hualoxonyipi, qam so'maxare nomatalta' quiyim 'xoic só'maq i'xat na lasauaxaset, chaqai rashiilaxanteguelec quiyim qaica ca qohinegue na sauaqhuaiquipi.