Isaías 50 - La'qaatqa ñi qota'olec Qota'olec & Qota'olec Novita Na Qomyipi

Da lpi'ỹaxac so lelaatec ñi qara'gaxala' quiyim hueetaugui ca le'xoric

⁴ Ñi qara'gaxala' yapaxaguinegue quiyim llo'daxachigui lauel na soochaxaiquipi queda ỹa'ñaaqataxanaxac quenaua ỹa'qaatqa. Ỹo'uet quiyim ỹaatqajam ña'xaỹaxanchiguiñi quenaua'que naua nete'etari, qaiyi ỹaatqajam ña'ijne'teguelo naua la'qaatqa.

⁵ Ñi qara'gaxala' nañan da ỹa'deenaxanaxa, ca' ỹim se sopilaxatauec chaqai mesqai quiyim se ña'xaỹaxana quet.

⁶ Saandec naua ỹapalatetari quiyim qaỹouaxanlgoto chaqai ñañaanta quiyim qano'tegue' naua ỹaqareue. Se lloỹoote'oga na ỹashic quená'maq yi'neetac chaqai natoqotapiguiỹot.

⁷ Ñi qara'gaxala' ñí'maq yotauan: vichiguiño' se ñauate ná'maq ñi'naxaquipi; vichiguiño' ñaq sa'ñiichiguiñi 'ec aỹim aca qa' ladocai, ma' sa'den quiyim se qayayilqochit ma'le.

⁸ Hueetau'e na ỹahi ñí'maq ro'ootaxanteguelec aỹim: ¿'Uo' cá'maq ypa'guentac? ¡Cha'regue qolaxapegue' ñí'maq imit ca nasauaxaset! ¿'Uo' cá'maq 'neetapigui lauel quiyim yishit yimit? ¡Ca' naiquenajo, ca 'naapiguiỹa'!

⁹ Ñi qara'gaxala' chaqaiñi ñí'maq yotauantac; ¿Nega'ỹo' cá'maq ishit quiyim ỹa'ue ca ñouaxanaxaset? Ná'ogue na ñpa'guenaxauaripi palac ma'le 'ec ca nooỹac qaichiqueta quena pit. (51.1—52.6 Daua na'qaatqa lo'daxachigui lauel yi qomyipi quiyi Jerusalén.)