Isaías 5 - La'qaatqa ñi qota'olec Qota'olec & Qota'olec Novita Na Qomyipi

Yi nanaxanqa' 'uva loma' qaraloqojnaxañigui quiyi Judá

¹ So'uen ca ỹo'ueenec taỹalec nqaishin ñí'maq ỹaatqajam ñauochaxaua, da ỹo'ueenec taỹaugui nqaishin yi lanaxanqa'. Ñi ñauochaxaua 'ue yi lanaxanqa' 'uva loma' quiyi ỹaatqajam lo'yaxanec 'laua.

² Naqalgoxoshiguim yi 'laua, naqata'a na qa', ca' ỹanñi ná'maq ỹaatqajam no'uen llaxataxa. Ca' quiyi lavinñi yi lanaxanqa' ỹa'ue ada la'ajnaxanaxalate, chaqai qai'neeta ỹa'maxajñi ca lo'ueetqa' na lataxa. Ñi ñauochaxaua 'neetapego' lo'daxarai ana la 'uva, qam na' qai'guen, ca' nodaachiguiñi lochiviaxai.

³ Qam nagui qamiri ma' ñiitalec na Jerusalén llaalqaipi so Judá, qamiri 'xachii negue' cá'maq lasauaxaset dajo yí'maq ỹanaxanqa' loqo'm aỹim.

⁴ ¿'Uo' ca saqa' qaỹo'uet quiyi ỹanaxanqa'? ¿Peeta'a 'uo' cá'maq saqa' so'uet quiyi'maxare? Ỹim shintapega quiyim lo'daxarai ana la, qam na' se'guen, ca' lochiviaxai.

⁵ Hua', ca' nagui sahotaque sa'xat cá'maq sahotaque shine'tegue ma'le yi ỹanaxanqa': ñaqat ma'le so lquepaxaset, qaiyi qanaqaguijñi; ropoxoỹa'gue nqaishin so lapoxonaxat, qaiyi qaico'uelec;

⁶ se seloxoỹa'a, qaiyi se qanichaxauec ana lasote chaqai se qanaqat ana peue, qaiyi 'xoic laqalachi chaqai ana le. Chaqai shinapega na naueguelec quiyim sqai taalec nqai'en ca ỹaxat yi'maxare.

⁷ Yi lanaxanqa' ñi qara'gaxala' ñí'maq qaica lqalanec, yí'maq lqo'itaxat lanaxanqa', chaqaiyi yi 'laua neetalec na llaalqaipi so Israel, chaqai na lauo' so Judá. Ñi qara'gaxala' 'neetapega quiyaua'maxare se napaqueralec da naqataxac, qam qainaata iuantapega na nalauataxanaxac; nauaantaque ca 'maxaraic 'ueenataxac, qam qainaata 'qaataque na naualaxac queda nqui'ic.

Da na'xalenataxac na hualoxonyipi

⁸ ¡'Xoraiqolqa qamiri, ma' se neme shiujnaxañitaque naua ra'aachiri, chaqai 'xoic na na'lauahi, vire'ta ma' qaica ca na'ñi na liỹa qom, ca 'ec qaqamita nqai'ñii ñiitalec na 'laua!

⁹ Ñi qara'gaxala' qaica lqalanec ỹaanec da la'qaatec caỹim, 'naac: Ma'le, ca' 'xoic ca 'imec qanopoxoỹaxajñi; 'eno'm leta'al chaqai lo'yaxanqa caua 'imqa, qam qaica ca nauguilo.

¹⁰ Ca logoñom nanaxanqa' 'uva loma', quiyim qaỹo'uet ca lataxa, se ỹovi' ma'le veinte litro ca nenoxonec lataxa. Chaqai cana diez ñoxoquio'lli' cana trigo la quiyim qoỹanñi, ca 'oono'lli' aca nenoxonec ma'le ma' qanaqat.

¹¹ ¡'Xoraiqolqa qamiri, quena' o'taxañitañi quiyim rquiñiuguichii, ca' quiyi na'xa'alom ỹovireta'guit yi pe hueetaguilo qamiri da loxonaxanaxac na lataxa!

¹² Nodaachiguiñi na niviigue 'ue lequet, nouaxana chaqai ana npe'te, chaqai 'xoic na lataxa quenaua nqui'ỹaxaco; qam se nqovilga dá'maq ỹo'ueetetac ñi qara'gaxala', se ỹa'deena'a ná'maq ỹo'ueetetac.

¹³ Ca' chaqaida dá'maq quiyim se na'xaỹaxan, ca na ỹalamaxareteripi na'ac ma'le, ỹoqa'a ca qaỹaueguegue 'laua. Ná'ogue liỹaatau'e' na lashillipi nilliviñi ma'le quena lqopaaxa chaqai quena laquip.

¹⁴ 'Ec ca toxonaxai ỹauatetagui na lap ma'le añi napal lahi', ỹahotaque ỹaqanañi ma'le na ỹalamaxareteripi liỹaata'ñi' na lashillipi, ná'maq qomyipi qaidaata da lishiquiaxac chaqai da leuallaxaviaxac.

¹⁵ Ná'ogue na qomyipi nemanachit ma'le na nemaqajnaxairipi se na'ishiguim ma'le.

¹⁶ Ñi qara'gaxala' ñí'maq sqaica lqalanec ỹachaxan ma'le dá'maq lecaic quiyim imit ca nasauaxaset; ñí'maq qota'olec co'teeta ỹachaxan ma'le da lco'taxa quiyim ỹo'ueetetac dá'maq ỹa'maqachiguiñi.

¹⁷ Na na'aateripi qanopoxoỹaxajñi ma'le, ca quená'maq nopoxoiqatec, ca' ana qagreta chaqai ana quetaq ỹa'queetac na 'uaqapi ñaxashiguim.

¹⁸ ¡'Xoraiqolqa qamiri, quiyim queda ra'maachiguii huogolliñiitegueri' da se no'uen, huogolliñiitegueri' da rasauaxashichii, 'ec nqai'ñii aca nahoglena!

¹⁹ Qamiri ná'maq 'ñiỹaiquen: Quiyim ñi qota'olec iỹalata'gue cá'maq ỹo'uet, qaiyi seuanqachigui; quiñí'maq co'teeta qota'olec quena Israel quiyim iỹalata'gue ỹo'uet cá'maq ỹahotaque, qaiyi sa'deenqata.

²⁰ ¡'Xoraiqolqa qamiri, ma' 'ñiỹac lo'yaxanec ná'maq se no'uen, chaqai ná'maq se no'uen, ca 'ñiỹac lo'yaxanec; ñigui nqai'ñii lauaq ná'maq napalaxa, chaqai ná'maq napalaxa, lauaq nqai'ñii; ná'maq chim, lo'daxaraic nqai'ñii, chaqai ná'maq lo'daxaraic, chim nqai'ñii!

²¹ ¡'Xoraiqolqa qamiri, ma' 'ñiitapega 'xoic ca ra'yiiñiguii, chaqai 'ñiitapega 'xoic ca naqachiñi!

²² ¡'Xoraiqolqa qamiri, ma' qaica nauegue' qamiri queda ne'taxaguii quena lataxa, chaqai qaica ca nauegue' qamiri quiyim 'maxachiñi na lataxa!

²³ Ma' qamiri quena' qarishivichiñii, ca 'ñiỹac qaica lasauaxaset cá'maq ỹo'ueetetac ca se no'uen, chaqai se quelolliỹa ca louenaxanaxa queca lalamaxaret ca qaica ca 'na'pegue.

²⁴ Ca' chaqaida dá'maq 'neeta na norec quena' ỹavigaxat na 'uaqapi chaqai na lauaq ỹavicañi nqai'en ana laue lasooxoi, ca chaqaida 'neete' qamiri ma' ra'lliỹañi, 'ec ana qo'paq ỹasoochi'ñoto naua lpa'yii chaqai ana lenoỹaxai sogui 'ec na lo. Ma' sqai coñiguit da napaxaguinataxanaxac chaqai da naqataxac quiñi qara'gaxala' sqaica lqalanec, ñí'maq co'teeta qota'olec quena Israel. (5.25-30 Nouaxanaxaset na nemaqajnaxairipi. Ñi qota'olec nelata yi Israel so qomyipi qoỹoqo'tegue da na'gue quiyim nco'ỹa'e'.)