Isaías 49 - La'qaatqa ñi qota'olec Qota'olec & Qota'olec Novita Na Qomyipi

Ca lelaatec ñi qara'gaxala' lcoỹeraxanaxat ná'ogue na ỹoreta'oguit qomyipi

¹ Ñaq na'xaỹaxañiỹa aỹim, qamiri qomyipi ñiitalec ana delequipi, ỹaatqajam na'xaỹaxañiichiguiñi, qamiri qomyipi qoỹoqo'ta ca ñiỹa'ñi: Ñi qara'gaxala' roỹaxañiua' na' saqa' ñi'qaañi, 'naac da ỹeenaxat na' ñaqai seuetaugui na lauel añi ỹate'e.

² Naua ỹa'qaatqa 'ec nqai'ne' lecat ỹaxaraic, chaqai quepaqataxanlec aỹim queda lqai'laxat, ñigui nqai'en aỹim ca 'ec novic shitaxaraic, ca' ỹa'maxat aỹim caso lovic lahi'.

³ Ca 'naac caỹim: “Qami' Israel, qami' ilaatec, qami' chicqochigui ma'le quiyim sachaxan da iquesaxanaxa.”

⁴ Ca' ỹim shinaiquen: “Ỹaatqajam 'ue da ỹo'ueenataxanaxac, qam qaica ca 'negue, 'xoic da ña'ñaaqataxac, qam qaica quet cá'maq ñigui.” Qam llic ma' dá'maq so'ueetetac hueeto'ot ñi qara'gaxala' qota'olec, chaqai ca ñishiuetenaxac chicqo'ot ñi'maxare.

⁵ Secoñiguit da ñimaqajnataxac quiyi reloqota'ñi ñi qara'gaxala' qota'olec, ma' ñi'maxare chicqotapigui da iquesaxanaxa. Ñi qara'gaxala' ñí'maq ya'maxajñi na' ñaqai seuetaugui aso ỹate'e, qaiyi ỹim lelaatec, qaiyi rapil so lalamaxareteripi so Jacob só'maq na'aamatec da Israel, rapil, ca' lapoi'ot ñi'maxare,

⁶ 'neetasa' da la'qaatec: Mesqai nodaachiguiñi quiyim qami' ilaatec quiyim qaidaata rapilaxachi' na llaalqaipi so llaalqaipi so Jacob chaqai quiyim rapilaxachi' na ca'laaxaiquipi quena'maxare; qai'neeta ỹim so'uet quiyim qami' lcoỹeraxanaxat ná'ogue na ỹoreta'oguit qomyipi, qaiyi 'xachisac da ica'laqataxanaxac quenaua paguec qoỹoqo'teguelo lahil na 'laua.

⁷ Ñi qara'gaxala' ñí'maq nca'laqataxanaq ñí'maq co'teeta qota'olec quiyi Israel, 'naapega na qomyipi quená'maq ỹaatqajam se qanqo'ta, ná'maq quena liỹa qomyipi ỹaatqajam laqaigaxat, ná'maq la'ac na nashillipi qa'uaiquipi, ñi'maxare 'naac: Ma' na nashillipi chaqai na llaalqaipi iuana qami', ne'laxashiguim, ca' ỹa'dooto qami' naua le'cootal, ma' ỹim ná'maq ỹim na'gaxala', ỹim co'teeta qota'olec quiyi Israel, qami' ica'acsec chaqai ipaquichigui nqaishin da ỹa'qaatec.

Qaỹa'xateta'guit quiyim liỹa qano'xonshiguim yi Jerusalén

⁸ Ñi qara'gaxala' 'naac: Novi'o' na na'xa'a quiyim sachaxan da iqouagaxa, ca' sasaachiguit qami'; novi' na na'xa'a nca'laxaqui, ca' sotauañi'. Ỹim so'ootaxanlec qami' na'le, qaiyi chicqochigui nqaishin qami' quiyim se'taxajñi da ña'deenaxac quena ỹalamaxareteripi, qaiyi liỹa qano'xonshiguim na na'aateripi, qaiyi liỹa qoyinalec yí'maq 'laua shi'gue qanopoxoỹaxajñi,

⁹ ca' qohinac quena ncoñiitecseripi: Shi'gue qarosoiuec, chaqai qohinapega ná'maq hueetaugui na napalaxa: Nenoxoñiu'ga na re'qojlec. Quenaua'que naua lahil naua nayico 'ue na 'uaqapi, chaqai quecanchaqaica 'laua qaica qom 'ue na loq na qalohipi.

¹⁰ Ca' se rqopachii chaqai se ralauachii raquipii, chaqai sqai taalec qamiri ca ra'aasa lauaq, ma' ỹim se'xoriñii chaqai sashaxanta'pe qamiri, chaqai sauequeta'alo qamiri ca hua'ñi ca ne'paxantashiguim huaxaỹaq.

¹¹ Sauategue ma'le ca nayic quiichigui nqaishin aca qa' ladocai, chaqai so'uet quiyim nalo'ojta' cá'maq qayiguii.

¹² ¡'Ajñii! Chalego leseguegue ná'maq chicqa'gue: 'ue na chicqa'gue da rapiguim, chaqai na liỹa queda lauashiguim, chaqai na liỹa chicqa'a yi 'laua Asuán pa'a'gue da 'guiñi.

¹³ ¡Qami' piguim, raualqe' quena raỹaaqui'! ¡Qami' 'laua, no'xalec qami' queda netoonaxaqui'! ¡Qami' qa' ladocai, raualaxahi queda ra'maxahi! Ma' ñi qara'gaxala' lo'daxachigui lauel na lalamaxareteripi chaqai ỹovita quiyim nqouaguegue queda le'xoric.

¹⁴ Ca' yi na'a' Sión 'naac: Ñi qara'gaxala' qota'olec yalat, chaqai coua'e aỹim.

¹⁵ Qam ñi'maxare 'naac: ¿Peeta'a aca nate'e ishito' coua'e loqo'm tot ishit nqo'ta cá'maq lalamaxaret llaalec? Ca 'eno'm aca'maxare coua'e, ỹim qaica ma' scoua'e quet aqami'.

¹⁶ Ỹim hueetagui nqaishin qami' na ñapoquena lauel, 'ec sa'ajanta'pe quen naua rquepaqataxanqachichi'.

¹⁷ Chalego liyigue' dauá'maq no'xonsecshiguim, sqai 'nejem cá'maq nopoxoỹaxajñi qami' na'le; shi'gue ỹoxogue cá'maq nopoxoỹaxajñi qami' na'le.

¹⁸ Ñaq namachirashiguim, ca 'ajñi' ná'maq sqo ỹoxe'oga caqami', 'ajñi' quiyim ná'ogue lapootaho, chaqai rapila qami'. Ỹim, ỹim na'gaxala', saanec da ỹa'qaatec, nallitalta', quiyim ná'ogue ma' rapil 'ec aca 'ueetqate quiyim ñi'riñi ma'le 'ec na no'ueetaxat acá'maq shiltapego.

¹⁹ Na na'laua'e' qanopoxoỹaxajñi, qai'guenaxajñi, sogui nqohin na'le; qam nagui na na'laua'e' cocho'qui', se nalolec ma'le ná'ogue na qomyipi. Cá'maq nopoxoỹaxajñi na'le qoỹoqo'talo nagui.

²⁰ Ca cauá'maq qachaalaxahi' cauá'maq 'ñiisapegalo na'lerañi 'qa'italo ma' retaxahi', 'nerac: Najo 'laua sqa logoñoqui' coqomi'; vite quet ca liỹa qara'a', qaiyi senqa'ñi.

²¹ Ca qami' chi retaqatapigui ma'le na qavilli', ca 'ñirac: ¿Nega'ỹo' cá'maq ỹa'vii nauajo ỹaalqa? Ỹim qaicaua caua ỹaalqa na'le, chaqai tot qaica ca ỹaalec; ỹoqa'a da 'laua senta'gue chaqai qoỹoqo'ta aỹim, ¿nega'ỹo' cá'maq iỹaxate' naua'maxare? Ma' ỹim qayodaqajanchiguiñi na'le, ¿negue' cá'maq chicqora'co' naua'maxare?

²² Ñi qara'gaxala' 'naac: Sela' ma'le ná'ogue na ỹoreta'oguit qomyipi; chaqai sategaxaneu'ga, qaiyi nodo qa'aalto'ot na qachaalaxai'ipi chaqai naua qachaallii' nodo ỹantalgoto naua lallaaco.

²³ Naua nashillipi ra'ualaxahi' qata'alli' ma'le, chaqai nauá'maq llaallipi neloxoỹaxallipi caqami' ma'le. Chaqai nqa'paxanñi, ỹoviraxata'guit nqai'en na latap na 'laua, ca' neneequesenta, ỹachaxan dá'maq quiyim se napacalec aqami'. Ca 'yiiñira'a ma'le quiyim ỹim ná'maq ỹim na'gaxala', ca ná'maq pi'ỹa'a ỹim mese pe'taxantegueri'.

²⁴ Ca ỹale 'ñaaxaic ¿peeta'a ishit qanouora'gue cá'maq louootaxanaxat queca lauataq? ¿Loqo'm ca ncoñiiteguesec qohit queca nashi qa'uaic?

²⁵ Ñi qara'gaxala' 'naac: Ajá'a, ishit. Cá'maq ỹale 'ñaaxaic ishit qarouootaxana'gue cá'maq louootaxanaxat chaqai quecá'maq qa'uaic ca laueguec. Ỹim seloqoguit ma'le cá'maq ỹahotaque nco'uaxac caqami'; ca' ỹim ná'maq ñca'laxatec ma'le na qachaalaxai'ipi.

²⁶ Ỹim yipaca'a ma'le ná'maq qa'uaiquipi quiyim squi'ỹaxanegue ná'maq chi la'at chaqai quiyim quiñiuguetegue ná'maq chi leuoripi, 'ec nqai'en na lataxa. Qaiyi ná'ogue na qomyipi quena 'laua ỹa'den quiyim ỹim ná'maq ỹim na'gaxala', ỹim ná'maq ñca'laxatec aqami', quiyim ỹim ná'maq quesaxanaxaic queso Jacob, ỹim ná'maq sosouec aqami'.