Isaías 45 - La'qaatqa ñi qota'olec Qota'olec & Qota'olec Novita Na Qomyipi

Ñi qara'gaxala' ỹa'ue da lo'ueenatec so nashi Ciro

¹ Ñi qara'gaxala' ỹo'uet ca lo'ueenatec so Ciro quiyim nashi, icona da lqai'laxat, qaiyi ỹoiquentac ná'ogue na ỹoreta'oguit qomyipi chaqai rouootaxana'gue ná'ogue na lo'goxonqateripi na nashillipi. Ñi qara'gaxala' ỹo'uet quiyim ñi Ciro huachiguilo naua lasomi' na na'aateripi, ca' qaica ca ishit ỹapogui. Ca' nagui 'naapega:

² Ỹim sa'auetauec caqami', samaxañi ná'maq qoỹoqoshi'megue, saqaguichigui ma'le na lasomyipi bronce chaqai saqaguitetajlec na fierro quenaua lasomi'.

³ Ỹim saañiraxarom ma'le na nouenqaipi qaỹapoota'ña, qaiyi 'yiiñi' quiyim ỹim na'gaxala', ñí'maq qota'olec ñí'maq roỹaxana qami', ỹahote'e dá'maq qadeenaxachi'.

⁴ Ma' sa'deena'a so ilaatec Jacob só'maq na'aamatec nqaishin na'le da Israel, chaqai na llaalqaipi ná'maq ñca'au'a, vichiguiño' soỹaxana'a qami' queda qadeenaxachi', chaqai saañiraxarom dá'maq remaqachiqui' nagui, 'eno'm saqa' huañirapiguiỹa'.

⁵ Ỹim ná'maq ỹim na'gaxala', ca' qaica liỹa; qaica ca liỹa qota'olec ỹoqa'oga caỹim. Ỹim sa'maxajñi qami' quiyim qami' loquiaxai, 'eno'm saqa' huañirapiguiỹa',

⁶ qaiyi ná'ogue ỹa'den quiyim qaica ca liỹa ỹoqa'oga caỹim queda lqodoigue chaqai da lauashiguim. Ỹim ná'maq ỹim na'gaxala' qota'olec, ca' qaica ca liỹa.

⁷ Ỹim so'uet quiyim re'qoochiguiñi chaqai na napalaxa, so'uet na na'maxa chaqai na ne'xoric. Ỹim ná'maq ỹim na'gaxala', ná'ogue najo so'uet.

Da lquesaxanaxa ñi qota'olec quiyim nashi

⁸ Ỹim chicqashiguim nqaishin ca ỹauegaxanaxac, 'nejem ana 'ỹa' chicqashiguim quena piguim chaqai ỹaxat quena naueguelec, ca' na 'laua icoñiguit ma'le; ca' da laỹaxac nca'laxa, ca' quena lahi, ca' ñaxat aca lenoỹaxai da na'maxa.

⁹ Aca nehoma 'laua acá'maq 'ec acanchaqaca liỹa nehoma, mesqai 'naapega cá'maq no'ueetqo'. Ca nishaaxa sqai 'naapega cá'maq ỹo'ueetetac ca'maxare: “¿Negue' cá'maq 'viichi'sac?”, chaqai cá'maq no'ueenatec mesqai 'naac: “Sqa 'yiiñi' ca ro'ueenataxanaxaqui'.”

¹⁰ Ca ñaalec qai'neeta se ishit 'ue ca 'naac quecaua leta'al quiyim ne'qaañi nqohin quena 'laua.

¹¹ Ñi na'gaxala' ñí'maq qota'olec co'teeta quiyi Israel, ñí'maq ỹa'maxajñi qami', 'naac: Qaica quet cá'maq 'neeta quiyim yinachi' negue' cá'maq ỹo'uet ca ỹaalec, loqo'm yapaxaguiñi' quecá'maq shinta'gue ca ỹo'ueenataxanaxac.

¹² Ỹim so'uet na 'laua chaqai ná'maq qomyipi hueetalec ana'maxare, sepiguinshiguim na piguim chaqai selaataxan quiyim re'oq ná'ogue ná'maq hueeto'ot na'maxare.

¹³ Ỹim re'oq nqaishin ñi Ciro quiyim rauegaxan, ca' sqaica lqalaigue' naua'que naua llico; ñi'maxare liỹa no'xonshiguim nqaishin ma'le yi na'a' lodegaxat Jerusalén chaqai ỹosoorec nqaishin ná'maq la'aqaipi Israel laseripi se ỹahotaque ca nishiuetenaxac. Ñí'maq qara'gaxala' qota'olec qaica lqalanec, ñi'maxare ñí'maq retaqa. (45.14-19 Ñi qara'gaxala' qota'olec qaica liỹa qaiñiita.)

Ñi qara'gaxala' reloqoguit na nashiilec nqolac

²⁰ Lapohiỹata', ca' nanaguii, nqo'ñiiuo ná'ogue ná'maq ca'laaxaic qomyipi. Qaica ca ỹa'den ná'maq co'ueetañi, ỹouoxontegueri' na lqolac chicqaugui na qo'paq chaqai nqouagaxainot cá'maq 'neetapega qota'olec, qam se ca'laqataxan.

²¹ Taxahi, nodohiuo cá'maq huañichigui, taxahiỹata', no'm viitaque, ca' chaqaida nqai'ñii: ¿Negue' cá'maq ỹa'xato' dajo na' ñaqai 'avichiguiñi? ¿Nega'ỹo' cá'maq shi'co' ỹa'xat na'le? ¿Mesqaỹim sa'xat na'le, ỹim na'gaxala'? Chaqai qaica liỹa qota'olec ỹoqota'oga caỹim. Ỹoqota'oga caỹim qaica liỹa qota'olec huegaxanaxai chaqai ca'laqataxanaxai.

²² Nahiquena, qaiyi ñca'laxaterec qamiri ma'le, qomyipi quenaua lahil na 'laua, ma' ỹim qota'olec, ca' qaica ca liỹa.

²³ Ỹim, chaqaỹim saanec na'le da ỹa'qaatec, 'ue na'le da sachaxantac ỹauegaxanaxac, ca' dajo sachaxantac ipaquichigui ma'le: ca quecá'maq seloqota'ñi ná'ogue ỹa'chi'iñi ma'le naua le'cootal, ca ná'ogue ỹaanec da la'qaatec ma'le quiyim ỹaqamqata,

²⁴ chaqai 'nerac: Qaiñiita ñi qara'gaxala' hueeto'ot da nauegaxanaxac chaqai da nquesaxanaxa. Ná'ogue ná'maq loquiiaxat, nayiloxontaho ma' ỹoviro.

²⁵ Ỹim chicqochigui ma'le quiyim ná'ogue na llaalqaipi so Israel rauegaxan ma'le, ca' nemaqajanlec aỹim ma'le. (46.1—48.22 Ñi qota'olec sqai 'nejem na lashiilqaipi yi Babilonia. Da 'neeta ma' noxonec yi Babilonia. Ñi qara'gaxala' 'naac quiyim ỹadalaxat ná'ogue. Ñi qara'gaxala' nca'laxatec so lalamaxareteripi.)