Isaías 42 - La'qaatqa ñi qota'olec Qota'olec & Qota'olec Novita Na Qomyipi

So lelaatec ñi qara'gaxala' qota'olec

¹ 'Ena hueete'e na ilaatec, na'maxare ñolliitañi, ñi'maxare ica'acsec, ỹaatqajam yqo'ta. Sellaagui ñi'maxare so ñi'espíritu, qaiyi noviraxat ca na'maxa quená'ogue na ỹoreta'oguit qomyipi.

² Se ỹaualaq, se nelamaxaren se qara'xaỹa ca lavillaxac quenaua nayico,

³ mese ỹaqaguichigui aca noqola late'e mashic cona'gue, chaqai se ỹo'mat ca ncoỹeraxanaxat imeetapego ca lauaq. Ỹaatqajam lliqueta noviraxat ma'le ca na'maxa.

⁴ Se nco'matec chaqai se neualñi dá'maq 'neetari', chi ỹovireto'o' ma' ỹa'ue ca na'maxa quena 'laua. Na qomyipi cana delec nauaanta'guit ca lapaxaguinataxanaxac.

⁵ Ñi qara'gaxala' qota'olec ñí'maq ỹo'uet na piguim, ca' ipeguenec, ñí'maq ỹo'uet na 'laua chaqai ná'maq ñaxat cana'maxare, ñí'maq ỹa'ue da nachaalataxac chaqai na lacat na qomyipi hueetalec ana'maxare, 'naac queso lelaatec:

⁶ Ỹim na'gaxala', soỹaxana qami', secona da rqai'laxachi', qaiyi so'ueenataxana qami' queda nca'laxa; ỹim so'viichi', ma' sahotaque quiyim qami' netanec queda ña'deenaxac quena ỹalamaxareteripi, chaqai ncoỹeraxanaxat quená'ogue na ỹoreta'oguit qomyipi.

⁷ Sahotaque neuanñi nqai'ñi' na qai'laqaipi, quiyim naqachira'a na ncoñiitecseripi cañi ncoñiitaxanaxaqui qaỹapootau'a quiyi hua'ñi na napalaxa.

⁸ Ỹim ná'maq ỹim na'gaxala' qota'olec, ca' chaqaida ỹeenaxat, se sa'maxaren quiyim 'ue ca liỹa qoỹaanem da icaic chaqai quiyim qaimaqachin na nashiilec nqolac ñigui nqohin aỹim.

⁹ 'Ajñii quiyim ipaquichigui ná'ogue ná'maq shi'gue shinac, nagui, ca lotqai dalaxaic ná'maq sa'xateta'guit; sa'deenaxanaxaneguelo qamiri naua'maxare, 'eno'm saqa' novite'. (42.10-25 Qaro'ueenaxanta'uegue quiyim qaimaqachin chaqai da lca'laqataxanaxac ñi qota'olec. Da 'ec lqai'laxa yi Israel.)