Isaías 40 - La'qaatqa ñi qota'olec Qota'olec & Qota'olec Novita Na Qomyipi

Ñi qara'gaxala' lo'daxachigui lauel yi Jerusalén

¹ 'Naac ñi qota'olec caqamiri: Lo'daxachigui lauel na ỹalamaxareteripi, lo'daxachigui lauel;

² nichiriita taxahi quiyi Jerusalén, ca 'ñiỹapega: Ime da ncoñiitaxaguii, shi'gue machiigui da ro'maxashichii, shi'gue coñiguit caỹim dá'maq paguec lecaic nouaxanaxashichii quesá'ogue so rasauaxashichii.

³ Qara'xaỹaque so naualaxac, 'naac: 'Maxachiñi ca nayic ñi qara'gaxala' quena 'laua qaica qom, lamaxachita ca llic ñi qota'olec coqomi' quiyi 'laua rashivijlec.

⁴ Pohi'ñiguilo naua latogollii, nopoxoỹaxachiñi ana qa' ladocai chaqai naua quemaralgoto, chaqai lamaxachii ná'maq namaq chaqai nalo'ojta' nqai'ñii.

⁵ Ca ma'le, ca' ñi qota'olec ỹachaxan da lauaq, ca ma'le, ca ná'ogue na qomyipi ỹauana. Ma' chaqaiñi ñi'maxare 'naac dajo.

⁶ Ca' 'ue so sa'xaỹaque 'naac: Raualqai', ca' ỹim senataxan: ¿Negue' quet cá'maq shinta'gue ca ỹaualaxac? Ca 'naac: Quiyim ná'ogue na qomyipi 'ec ana peue, ¡se ra'ñiiñi 'ec aca lenoỹaxai quena no'ueenaxa!

⁷ Ỹaso ana peue chaqai roỹapi ana lenoỹaxai quena' pe'taalec ñi qara'gaxala'. Ỹaatqajam llic na qomyipi 'ec ana peue.

⁸ Ỹaso ana peue chaqai ana lenoỹaxai roỹapi, qam naua la'qaatqa ñi qota'olec coqomi' chaqaidaata 'neesari'.

⁹ Qami' Sión, quirishi'megue ana roto aca qa' ladocai, ỹaatqajam na'ñaxat nqai'ñi' da qavillaxaqui', ca 'qaataxañita queda no'uen na'xaỹaxac. Qami' Jerusalén, totaxan ro'chi'i', ỹaatqajam nichintegue ca ra'qaachiqui', vite la'xaỹaxague' naua na'aate' quiyi 'laua Judá, 'ñirac: ¡'Ena hueete'e ñí'maq qota'olec caqamiri!

¹⁰ Mashic novi' na qara'gaxala' liỹaata na lquesaxanaxa, nolliitañi ná'ogue queda lquesaxanaxa da lqai'laxat. Nauequeta na lalamaxareteripi na' ime quiyim naqata'a quiyim na'aqaipi.

¹¹ Naqueta 'ec ca neloxoỹaq quiyim reloqota'a aca lalo qagreta; nanojshiguim ca qagreta llaalec, ca qa'aalto'ot, hueetalec nqai'en ana lotogue, chaqai ỹaatqajam quelola aná'maq chita'gue co'ootac.

Da lecaic ñi qota'olec quiyi Israel

¹² ¿Negue' ca naloqochin ana huaaxai, ỹahote'e ana napoquena, loqo'm ỹa'ue ca lepeetec, ỹahota'ahi naua lenachi' ca lecaachiguiñi na piguim? ¿Negue' ca ỹo'ueeto' aca laloqojnaxaqui ná'ogue na lamoxoỹaxa na 'laua, loqo'm isallaxat ana quemaralec chaqai ana qa' ỹahote'e lesallaqataxanaxaqui?

¹³ ¿Nega'ỹo' ca ỹachaxan ca lo'maxac ñi qara'gaxala', loqo'm nega'ỹo' cá'maq ỹapaxaguintac ñi'maxare?

¹⁴ ¿Nega'ỹo' ca 'ue ca ỹapaxaguinegue, qaiyi 'ue ca ỹa'den? ¿Nega'ỹo' ca ỹapaxaguinegue, qaiyi 'maxaraic quiyim imit ca nasauaxaset? ¿Nega'ỹo' ca ỹapaxaguinegue quiyim 'ue ca la'deenec? ¿Nega'ỹo' ca ỹapaxaguinegue ca na'deenaxanaxa?

¹⁵ Ná'ogue na qomyipi quena 'laua 'ec aca huaxaỹaq llitaxai quiñi'maxare, 'ec ca 'oonoqui' 'lauoqui' hueetagui aca nesallaqataxanaxaqui; ana delequipi cana huaaxai da lesega'a 'ec ca 'oonoqui' lo'uaxanaxa lolo.

¹⁶ Quiyá'ogue yi 'laua quiyi Líbano se nalogoñi na iseripi hueetalec quiyim qaỹa'ue ca nachitaxanataxanaxat, vire'ta ca qo'paq navicqataxanaxat quiyim qoỹaanot ca name ñi'maxare.

¹⁷ Ná'ogue na ỹoreta'oguit qomyipi quena 'laua qaica ca 'negue queda reloqota'gue ñi'maxare; quiñi'maxare ỹaatqajam qaica ca 'negue.

¹⁸ ¿Nega'ỹo' cá'maq loqojnaxañiỹa quiñi qota'olec? ¿Nega'ỹo' ca 'ñii'tegue ca ro'ueenachiguii quiyim 'viichii ca lashiiquiaxaua ñi'maxare?

¹⁹ Ca nadenqataxanaq pa'ỹaxat ỹo'uet ca ladenqatec chaqai ca ỹo'ueetac na 'ueetaxat ỹapolec ỹocorelec quena 'oro chaqai ỹo'uet na lequet ỹahote'e na plata.

²⁰ Ná'maq ỹo'ueetac na nadenqatec nca'aaque na qo'paq se qaichic, ca' idaanaque cá'maq ỹaatqajam ỹa'den da lo'ueenataxanaxac quiyim ỹa'ñaxajñi, qaiyi sqai huaañi.

²¹ ¿Mesqa 'yiiñio' qamiri? ¿Se ỹauano' quen 'xaiỹa? ¿Se qara'qaataxanalo' qamiri na' ñaqai 'avichiguiñi? ¿Sqai shi'co' 'yiiñii na' ñaqai qaỹo'ueetetac na 'laua?

²² Ma' ñi qota'olec 'ue yi nqa'xanqa' quiyim nashi pa'aashiguim quena piguim, ca ỹa'ajantac na qomyipi 'ec nqai'en ana ỹeete. Ñi'maxare ipeguenec nqai'en na piguim 'ec nqai'en ca 'imec 'uaqapi, chaqai ipeguenec 'ec nqai'en ca nopele' quena no'ueenaxa.

²³ Ñi'maxare ñigui 'ec qaica na leta'allípi qomyipi chaqai palac nqai'en na nashillipi quena 'laua.

²⁴ 'Ec ana nanecse ra'lliita quiyim chita'gue qoỹanñi quiyim chita'gue 'vii naua lpa'yii quena 'laua. No'm ñi qota'olec pe'telec na'maxare, ca' ỹaso chaqai na nonot lodegaxat i'xat, 'ec nqai'en na 'uaqapi.

²⁵ Ca ñí'maq co'teeta qota'olec renataxan: “¿Negue' cá'maq loqojnaxañiỹa caỹim? ¿Nega'ỹo' cá'maq 'nejem aỹim?”

²⁶ Ñaq nedaañishiguim, ca 'ajñii na piguim: ¿Negue' cá'maq ỹo'ueeto' ná'ogue najo? Ñí'maq illa'ñi naua lomaate' quiñi 'óna chaqai ná'ogue roỹaxanta'gue na leenaxat. Chalego lecaic dá'maq lquesaxanaxa ñi'maxare, ca' qaica ca na'laañi.

²⁷ Qamiri lalamaxarete' so Jacob só'maq na'aamatec da Israel, ¿chi'negue ma' 'ue da 'xachi'sac? ¿Chi'negue ma' 'ñirac: “Ñi qara'gaxala' se iuana da shintari'; ñi qota'olec tot qaica ca ỹauaaque aỹim?”

²⁸ ¿Mashic 'eco' sqa 'yiiñi'? ¿Se ỹauano' quen 'qa'ita? Ñi qara'gaxala', ñí'maq qota'olec sqaica lqodoc, ñí'maq ỹo'uet ná'ogue na 'laua, se nco'teuec chaqai se isot; da la'deenec sqaica lqodoc.

²⁹ Ñi'maxare ỹo'uet da lquesaxanaxa ca soochaxaic, chaqai ca ỹolaaueta nqo'naxatec da la'ñaxac.

³⁰ Vire'ta na ne'naqaipi sqoue quiyim isot chaqai nco'teuec, vire'ta ná'maq quesaxanaxaiquipi sqoue huaañi,

³¹ qam ná'maq pi'ỹa'a ñi qara'gaxala' se neme da lquesaxanaxa chaqai ishit ỹo 'ec ca chirálo; ishit ne'guenta, qam se nco'teuec, chaqai 'xoic da louoxoc, qam se isot.