Isaías 30 - La'qaatqa ñi qota'olec Qota'olec & Qota'olec Novita Na Qomyipi

Qaraqata ná'maq ỹahotaque qanqouaguegue quiyi Egipto

⁸ Hua' nagui, ca' na'itquena, ca' 'chirelec ca qo'paq lahi, vite ca qayirqui', ca' chaqaiyi hueeta'ñi nqai'ñi', ca' dajo na'qaatec sqaica lqodoc.

⁹ Najo qomyipi ỹaatqajam npa'guenaxai chaqai se ỹaqamaq, se na'xaỹaxanalo naua lapaxaguinaxanaxaco ñi qara'gaxala'.

¹⁰ Ná'maq 'ue na leuanaxanaxac 'naapega: “Liyi, le'en na reuanaxanaxaqui',” chaqai ná'maq letaxaỹaxaqui ñi qota'olec 'naapega: “Sqai 'xachitema qomi' ca reuanaxanaxaqui' lliqueta; ta'ta'a quiyim isotete' caua ra'qaataxahi' coqomi'; sqai palaxachi' dá'maq hueetapigui qouel.

¹¹ Noỹoochiuec quena nayic, ỹoxoiuec queda ỹalamqata qayicyaxaguii, 'neeto' 'aueta'guita qomi' nqai'ñii ñi qota'olec ñí'maq co'teeta quiyi Israel.”

¹² Vichiguiño' ñí'maq co'teeta qota'olec quiyi Israel 'naac: Qamiri sqai coñiguita naua ỹaqataxaco, chaqai paguec viilec na nqa'viic chaqai na se no'uen, qainauate' pi'ỹa'alo;

¹³ vichiguiño' qamiri 'ue da rasauaxashichii. 'Ec qamiri ca ladocaic nquepaqataxanaxat 'xoic na lconaxa, ca qaỹaloq 'guiñi;

¹⁴ ropoqoguilo nqohine' qamiri ma'le 'ec aca nehoma 'laua, quena' ropoqogui, ca' lahiletajlec, ỹaatqajam ropoqotam, ca se ỹa'maxañi quiyim qaỹouen ca laỹooqui' quiyim qaillaalec aca norec lpoqo, loqo'm qane'maxashiguim ca huaxaỹaq caca ni'ỹa.

¹⁵ Ñi qara'gaxala' qota'olec ñí'maq co'teeta quiyi Israel 'naac: “Rapilliu'a ỹim, re'maxaitam, qaiyi rca'lliiuec. Ca ma' re'maxaitam chaqai da rpi'ỹaxaguii, ca' hueetagui ma'le ca rquesaxanaxahi.” Qam se na'xaỹaxañii,

¹⁶ ta'ta'a quiyim 'ñiỹac: 'E', paguec la'maxa seetaq senqatashiguim. Hua', ca' chaqaida 'neeta quiyim 'iichii. Qai'neeta 'ñiỹac: “Senqatañiguilo ma'le ana yaqai nahoglena.” Hua', qam yaqaic qai'neeta cá'maq nocanqorii.

¹⁷ Mil ca 'eet ma' qaỹadeneguelec queca 'oonoqui' ỹale, chaqai ma' cincolqai' caua ỹadeneguelgoto qamiri, ca qamiá'ogue 'iichii, vire'to' ma' sqo vito'olqai' qamiri, 'ec ca qo'paq cana roto aca qa' ladocai, loqo'm quiyim netana qoỹanalec aca quemaralec ladocai. (30.18-33 Qaỹachaxantac quiyim qanqouaguegue so qomyipi. Qaỹa'ue ca nouaxanaxaset so na'ñi yi Asiria.)