Isaías 14 - La'qaatqa ñi qota'olec Qota'olec & Qota'olec Novita Na Qomyipi

Chi qai'neetac so nashi quiyi Babilonia

³ Qamiri qomyipi quena Israel, ma' nco'mataxandec qamiri ñi qara'gaxala' quena re'xoriguii, da reueetaxanaxahi queda nqa'viiguii dá'maq viriỹau'a na' qamiri na'aqa,

⁴ ca 'viiñi' ma'le dajo no'ueenec, ca 'ñi'sac ñi nashi quiyi Babilonia, ca 'ñirac: ¡'Ajñii dá'maq 'neetari' ñí'maq qa'uaic! ¡'Ajñii dá'maq 'neetari' ñí'maq nishitaxai!

⁵ Ñi qara'gaxala' ỹaqaiguichigui da lquesaxanaxa ñi hualoxonaq, ỹaqaguitetajlec aca lelaataxanqate ñi qa'uaic,

⁶ ñí'maq ỹahotaque na nouaxanaxaset na ỹoreta'oguit qomyipi quena 'laua paguec da lauel, ca' se nco'majñi ỹouaxantac, pataxañi na qomyipi quena lauel chaqai rocanaxantapigui se i'xoren.

⁷ Ná'ogue na qom quena 'laua 'ue da lo'daxa chaqai i'maqajlem, chaqai ỹaualqatagui queda netoonaxac.

⁸ Vire'ta ana qo'paq leenaxat pino chaqai ana cedro huaalec yi Líbano netoonegue da nanoxonaxaqui', ca 'naac: Na' qami' noxonec, ca chaqa'ma' taachi'ñi quiyim qaica ca ỹouaxangoto qomi'.

⁹ Queda pa'ỹaañi quena 'laua ỹaatqajam 'xoic na naỹaac chaqai nenoxonshiguim ca'guit qami'. Na la'al na leuaxaiquipi nelouec, ná'ogue na nashillipi quena 'laua na'le ca'guit qami'; ná'ogue na lashi na ỹoreta'oguit qomyipi na'le ne'laxashiguim quiyi nqa'xanqa'.

¹⁰ Ná'ogue na'maxare retaqa, ca 'naac caqami': Qami' qai'neeta na'laaño' ca rquesaxanaxa'e', ca vichiro'o' quiyim 'ñiite'm qomi'.

¹¹ Ca' najo lqodoc nqohin ca nemaqajnaxaqui' chaqai ca niviigaxanaxac cana niviigue caqami'. Na romachi' nomaqatecshiguim na lichiguiraxa, chaqai qapochi' na ñilo'.

¹² ¡Nachiriño' quena piguim, qami' huaqajñi nete'ese! ¡Qanenaxaño' qami' quena 'laua, qami' qadoxonqui' quen ná'ogue na ỹoreta'oguit qomyipi!

¹³ 'Neetapigui quen qavilli': Sovirashiguim ma'le quena piguim; so'uet ma'le ca ñqa'xanqa' quiyim ỹim nashi, sellaalec ana neuaqajñi ñi qota'olec; sa'ue ñqa'xanqa' ma'le queda rapiguim cada qa' ladocai lapooqo' na 'naac qota'olqaipi.

¹⁴ Ñapacalec ma'le ná'maq paguec lishicshi'ma naueguelec; shinta ma'le ñí'maq ỹapacauec quená'ogue.

¹⁵ ¡Qam ỹaatqajam llic quiyim vichira'ña yi nelauaxa loiquenatec, quedá'maq pa'aañi quiyi nqui'i nouaxanqa'!

¹⁶ Ná'maq iuana qami', ca chi ra'ajñisac, ca ỹaatqajam na'ijne'tegue qami', ca 'naac: ¿Ñijo' ñí'maq ỹale i'loxol nqai'en quen na 'laua, nalauajñi quen na'le na qomyipi,

¹⁷ ñí'maq co'tejlem nqai'en na 'laua qaica ca qom nqai'en, nomachichiguiñi quen na na'aateripi chaqai qaica ca ỹaxanec quena ncoñiitecseripi?

¹⁸ Ná'ogue na lashillipi na qomyipi quena 'laua queeta'ñi' da lemaqachic, quiñi 'óna hueeta'ñigui acá'maq chi lahi';

¹⁹ qam qami' qoỹoqo'tegue ca qarenaqaitegue cañi napal lahi', 'ec ca lete qanaqaica'a, 'ec ca leuaxaic qaico'ueetapigui, ỹalequetaugui na nalauatqaipi, qaichaxauec na lqahic, qainaxa'ña ca nouaxanqa' na nqui'i no'qaachigui quena qa'.

²⁰ Se qaishinñi qami' sqai 'ñiite' na liỹa nashillipi, ma' na'laxachirañi ná'maq chi qauochi', chaqai lauachi' ná'maq chi ralamaxarichi' qauochi'. Ná'maq llaxataxai na hualoxonyipi sqai 'neetari'.

²¹ Na'maxachiiñi quiyim lauachii na llaalqaipi sauaxat ná'maq se no'uen ỹo'uet so leta'allipi, qaiyi tot qaica ma' ỹoiquentaiquet na 'laua, qaiyi se no'xataxajlec na 'laua quena la'aateripi. (14.22-32 Qanomachichiguiñi ma'le yi Asiria laseripi. Da na'qaatec quiyim qanpa'guene'e' ma'le yi filisteoipi.) (15.1—24.23 Qaỹa'xateta'guit quiyim ñi qota'olec ỹa'ue ca nouaxanaxaset ma'le ná'maq na'aateripi sqoỹoqaque quiyi Israel chaqai quiyi Judá.)