Hechos 9 - La'qaatqa ñi qota'olec Qota'olec & Qota'olec Novita Na Qomyipi

Qaỹadalaxat da no'ueenataxac so Saulo

¹ Qam ñaqaiso so Saulo queetalec quiyim ỹadentalec ná'maq huelec so qara'gaxala' Jesús. Vichiguiño' quepegue' so lashi na netaxaỹaxanqajanqaipi,

² ca rashiilaxanaque aca lere lomalate da lo'ueenataxanaxac. Ca' eec, quepegue' yi na'a' leenaxat Damasco, quigui ana lapoonaxanaxaqui na judioipi, idaanaque na ỹalliripi chaqai na 'aallipi, ca' coñi' ná'maq queetalec da na'qaatec, nauegueu'a yi Jerusalén.

³ Qam co'na' ñaqai queeta'gue so nayic, mashic ipalatau'a yi na'a' Damasco, ca ne'laqataxanchiguiñi chicqo'ot na piguim so 'ec ncoỹeraxanaxaqui lauaq quiyí'maq hueete'e so'maxare.

⁴ Ca najño' so Saulo. Ca co'na' hueetañi quiyi 'laua, ca' 'xaỹaque so na'qaatec 'naaco': —Saulo, Saulo, ¿chi'negue ma' yocañi'sac?

⁵ Ca' so Saulo renataxano': —Qami', ¿negue' aqami'? Ca só'maq na'qaatec 'naaco': —Aỹim Jesús, chaqaỹim ná'maq ỹim yocañi'sac. Chi nqa'viiñiseguelta', 'nejem ca nauegaxanaxala' tooro quena' ỹachaqata'piguit na lo'lo aca na'daxanqate.

⁶ Ca' so Saulo i'loxoltari' quena lqolonaxa, ca 'naaco': —Qami' ỹa'gaxala' Jesús, ¿nega'ỹo' cá'maq vi'saque so'uet? Ca' so qara'gaxala' 'naapego': —Ne'laxachirishiguim, ca quirepegue' yi na'a'. Ca' quiyi, ca qohiñirapegaxaua' quecá'maq 'viichi'.

⁷ Ca sauá'maq ỹale' liỹareta'pe so Saulo ỹaatqajam no'chi'. Ma' 'qaasapega só'maq na'qaatec, qam qaica ca iuanta.

⁸ Ca' quiyi, ca ne'laxashiguim so Saulo. Qam co'na' ỹauachiguilo naua nqote', ca se neuanñi. Vichiguiño' qaicona ada laua, ca qaỹauegueu'a yi Damasco.

⁹ Ca' yí hueetau'o' tres na'xata', se neuanñi chaqai se que'e chaqai qaica ca ni'chigui.

¹⁰ 'Uo' so ỹale shi'gom ỹacoñiguit da na'qaatec neeta'ñi yi Damasco, leenaxat Ananías. Ca chaqaiso' só'maq so qara'gaxala' nachaxana queso leuanaxanaxac, ca 'naapego': —¡Ananías! Ca' so'maxare saato': —¿Negue' ca, qami' ỹa'gaxala'?

¹¹ Ca' so qara'gaxala' 'naapego' so Ananías: —Ne'laxachirishiguim, ca quirepegue' so nayic, leenaxat Ỹalamqata. Ca ma' vichita yi la'a' ca Judas, ca nataxañiraque ma'le ca ỹale, leenaxat Saulo, chicqa'gue da na'a' Tarso. Ma' ñi'maxare nqouagaxaintac.

¹² Ca 'uo' so leuanaxanaxac, iuana so ỹale leenaxat Ananías quiyim inoxoneu'a, ca co'na' ỹashil-lec ñi'maxare, ca lotqai liỹa neuanñi.

¹³ Ca co'na' 'xaỹa dajo so Ananías, ca 'naaco': —Qami' ỹa'gaxala', mashic 'xoic na ỹa'xaỹaxac quecajo ỹale chaqai quená'ogue ná'maq ỹo'ueetetac se ỹa'maxañi queda Jerusalén quená'maq huelec qami'.

¹⁴ Ca' nagui nanaiquenajo ne'xateta so lere hueetalec na la'qaatec na lashillipi na netaxaỹaxanqajanqaipi quiyim i'xat ná'ogue coñi' ná'maq ỹouentac da qadeenaxachi' quena' nqouagaxain.

¹⁵ Qam ñi qara'gaxala' 'naapego' so Ananías: —Mo'e', ma' ica'acsec ñi ỹale quiyim ỹa'xat da ỹeenaxat quená'ogue nanchaqaina ỹoreta'oguit qomyipi, chaqai quena lashillipi, chaqai vire'ta quena Israel laseripi.

¹⁶ Ỹim sachaxanem ma'le ñi'maxare quiyim ỹovirau'a 'xoic ca le'xoric souetapigui aỹim.

¹⁷ Ca' so Ananías quepegue' ca na'a' neeta'ñi so Saulo. Ca co'na' inoxono, ca ỹashil-lec quenaua lqai'laqate' so'maxare. Ca 'naaco': —Qami' ỹaqaỹa Saulo, ñí'maq qara'gaxala' Jesús, ñí'maq nachaxano' qami' na' naquisa'gue na nayic, chaqaiñi ñí'maq nelata ỹim aqami', qaiyi liỹa neuañiriñi chaqai qami' no'qaachigui nqohin ma'le queca Espíritu Santo.

¹⁸ Ca' quiyi, ca 'vio' saua nachiñi quenaua nqote' 'ec leso, ca lotqai liỹa neuanñi. Ca' quiyi so Saulo ne'laxashiguim, ca' qanachilaxan.

¹⁹ Co'na' ime, ca' que'e, ca lot rapil liỹa da lquesaxanaxa. Ca 'vio' saua na'xata' neetauguilo saua mashic iconchiguit da na'qaatec nera'ñi yi Damasco.

So Saulo ỹa'xatetac da na'qaatec quiyi Damasco

²⁰ Ca co'na' ncopa, ca so Saulo lotqai ỹa'xatetac da na'qaatec, hueetau'a ana lapoxoqui na judioipi, ỹa'xatetac so Jesús ỹaatqajam chaqaiso so llaalec ñi qota'olec.

²¹ Ca ná'ogue ná'maq na'xaỹaxantapega so'maxare ỹaatqajam 'xoic da le'laxa, ca 'neraco' quen: —¿Mesqaido' dajo ỹale dá'maq rocanaxantapigui na neeta'ñi yi Jerusalén ná'maq ỹouentac da leenaxat so Jesús quena' nqouagaxain? ¿Mesqaido' dá'maq qai'neeta naiquenajo ma' ỹahotaque quiyim coñi' na'maxare, ca ỹauegueu'a yi lashillipi na netaxaỹaxanqajanqaipi?

²² Qam so Saulo lama'xa ra'qaataxan, noquiiquetauec da lquesaxanaxa, ichoxotetac so Jesús quiyim chaqaiso só'maq qaỹa'xateta'guit nashi nca'laxaqui, chi ỹovireta'a tot ỹa'den ca 'neeta so judioipi na'ñi yi Damasco.

So Saulo qohit queso judioipi

²³ Co'na' 'vii saua na'xata', ca' so judioipi na'deenta', ỹahotaque quiyim ỹalauat so Saulo.

²⁴ Qam so'maxare 'uo' ca ỹa'ue la'xaỹaxac, ca ỹa'deeno'. Ma' quiyi na'xa'a chaqai yi pe saua'maxare nauaanta'pe naua lasomi' ñiguerec quiyi na'a', ma' qaỹahotaque qaỹalauat so'maxare.

²⁵ Qam sauá'maq mashic shi'gue ỹaconchiguit da na'qaatec queca pe qaỹa'uo' aso canasto late'ogue', 'vii lequeete', ca qaillaañigui so Saulo, ca qaipa'xanauec queda lahi, ca quiichi'ñigui nqohin so lquepaxaset yi na'a'. Ca' da 'neeto' quiyim qohit.

So Saulo hueetau'a yi Jerusalén

²⁶ Qam so Saulo co'na' ỹovira'a yi Jerusalén, ỹahotaco' lapoouo quesó'maq mashic ỹacoñiguit da na'qaatec. Qam sá'ogue qano'cha'a, ma' se qoyiuelec quiyim shi'co' ỹacoñiguit da na'qaatec.

²⁷ Qam so Bernabé ỹauego, ca ichoxotema saua lelaatqa so Jesús. Ca' ra'qaataxanema quecá'maq 'neeto' so Saulo co'na' iuana so qara'gaxala' Jesús queso nayic, chaqai dá'maq 'neeto' so qara'gaxala' na' retaxaỹa'pegue', chaqai dá'maq 'neeto' da letaxaỹaxac so Saulo quiyim ỹaatqajam qaica ca no'chaaque ỹa'xatetac da leenaxat so Jesús na' hueeta'ñi yi Damasco.

²⁸ Ca' quiyi, ca so Saulo na'ñi yi Jerusalén, ca ỹalequetauguilo' quen saua'maxare.

²⁹ Chaqai qaica ca no'chaaque quena' ỹa'xat da leenaxat so qara'gaxala'. Na'qaataxanta'pegue' chaqai retaqata'guit na judioipi ná'maq ỹa'xate' naua la'qaatqa na griego. Qam sojo qomyipi idaantaco' quen ca la'maqa' quiyim ỹalauat so Saulo.

³⁰ Qam co'na' ỹa'den dajo so nqaỹaripi, ca qai'xat so Saulo queda Cesarea. Ca' quiyi, ca qailategue da Tarso.

³¹ Ca 'uo' da la'maxa ná'ogue ná'maq mashic ỹacoñiguit da na'qaatec neetalgoto naua 'lauari quiyi Judea, chaqai yi Galilea, chaqai qai'neeta yi Samaria. Ca na'maxare noquiiquetauec da lquesaxanaxa, chaqai ỹa'maxate'tegue ñi qara'gaxala', chaqai quedá'maq lotaanaxanaxac so Espíritu Santo. Ca noquiiquetauec ná'maq icoñiguit da na'qaatec.

Qaỹomatec so Eneas

³² Ca co'na' so Pedro ỹouootegueri', ra'pichitapega so nqaỹaripi, chaqai qai'neeta ra'ajnaxanalo saua mashic iconchiguit da na'qaatec nera'ñi yi Lida.

³³ Ca' quiyi, ca iuanejlco' ca ỹale leenaxat Eneas hueetalco' ca lacanec ocho ñaxari, ma' se ra'ñiigue.

³⁴ Ca' so Pedro 'naapego': —Eneas, Jesucristo romachirec nagui. Ne'laxachirishiguim, nañireta' na qacanqui'. Ca' so Eneas chaqa'ma' ne'laxashiguim.

³⁵ Ca qaiuanchigui quesá'ogue só'maq qomyipi na'ñi yi Lida chaqai na na'ñi yi 'laua leenaxat Sarón. Ca ỹalate' naua ñaua'pe lpi'ỹaxaco, ca' quelec so qara'gaxala' Jesús.

Liỹa nca'leuec nqohin aso Dorcas

³⁶ Ca' quesaua na'xata' 'uo' aso mashic shi'gom ỹacoñiguit da na'qaatec na'ñi yi Jope, leenaxat Tabita. Dajo neenaxat quenaua griego la'qaatqa 'naac: Dorcas (dajo 'naac: qagreta neuec). Aso 'aalo co'na' ñaqa 'ue 'xoic da lotaanaxanaxac, ỹotauantac ná'maq 'ue na louenaxanaxa.

³⁷ Qam quesauajo na'xata' so Dorcas ralolo', ca ileu; ca co'na' ime qaiquiỹo, ca qaillaugui ca 'imec pa'aashiguim.

³⁸ Yi Jope sqoỹaqaque quiyi Lida yí'maq neeta'ño' so Pedro. Ca co'na' so qomyipi ỹa'den so'maxare quiyim neeta'ñi yi Lida, ca' qailate' saua dos ỹale' quiyim 'nerapega chaqa'ma' eec, quepegue' yi Jope.

³⁹ Ca' so Pedro queguelo saua'maxare. Ca co'na' ỹoviro, ca qaỹavicshi'ma cá'maq shi'co' qaillaugui pa'aashiguim 'imec. Ca sá'ogue so pa'ỹellipi noỹentagui, lapoỹaho, ca qaỹachaxantapeguem na loxoquiripi chaqai na lamaxaquiripi ná'maq lo'ueenatqaipio' aso Dorcas co'na' ñaq nca'leetauec.

⁴⁰ Ime, ca' so Pedro inoxonaqtec sá'ogue so qomyipi. Ca ỹa'yi'iñi naua le'cootal, ca nqouagaxain. Ime, ca ra'iitalec aso 'aalo shi'gue ileu. Ca 'naapego': —Tabita, ne'laxachirishiguim. Ca so'maxare chi naviqueterec naua nqote', ca co'na' ra'i'tot so Pedro, ca' nqa'xanñi.

⁴¹ Ca' so'maxare ỹacona ana laua, ca navicshiguim. Ime, ca roỹaxane'oga so nqaỹaripi chaqai so pa'ỹellipi, ca ỹachaxanem, qam mashic nca'leetauec aso'maxare.

⁴² Ca' ỹa'den dajo yá'ogue yi na'ñi yi na'a' Jope, ca 'xoic na huelec so qara'gaxala' Jesús.

⁴³ Ca' so Pedro ỹa'vii na'xata' neeta'ñi yi na'a', neeta'ñi yi la'a' so loshicmaxa lo'o, leenaxat Simón.