Hechos 24 - La'qaatqa ñi qota'olec Qota'olec & Qota'olec Novita Na Qomyipi

So Pablo nichoxota so Félix

¹ Ca co'na' ỹapaguerec saua cinco na'xata', ca' novita yi Cesarea so Ananías, lashi na netaxaỹaxanqajanqaipi. Liỹaata'pe saua liỹa' na'gaxalate' chaqai so letaxaỹaxanqajnegue' lqoshaxaua' leenaxat Tértulo. Ca' chaqaisaua saua ỹovirera'a so nashi Félix, nodo' só'maq qaỹahotaque lasauaxaset so Pablo.

² Ca co'na' qanaueguec so Pablo, ca' so Tértulo chaqa'ma' pataqategueñi retaqa ỹa'xat da lasauaxaset, ỹa'xatem so Félix, 'naac: —Qami' qarashi, chicqochigui qami' da qareuaagaxa chaqai qara'maqachiguiñi, ma' ỹa'maqachiguiñi da ro'ueenataxanaxaqui', ma' ỹaatqajam 'ue na 'yiiñi'.

³ Dá'ogue dajo seconaxaguit quecanchaqa seuqata'gue, ca 'uo' da qanetoonaxac chaqai quiyim qami' qarauochaxat qarashi Félix.

⁴ Qam quiyim sqai eec da shinqata'pegue, ca qomi' sahoqotaque quiyim qouaqui' na'xaỹaxañiroxoua' queda qara'qaatec.

⁵ Ma' qomi' sa'deenqata quiyim dajo ỹale ỹaatqajam se ralamqataxan quenaua'que naua lahil na 'laua. Ma' 'ue yi na'xa'a ỹora'chi nqai'en na qomyipi, ma' da'maxare lashi na na'deetau'a so Nazaret le'ec.

⁶ Vire'ta sham i'naari' añi qaro'ueenaxanaxaqui quiyi Jerusalén. Ca qomi' seconaxalec, scoñiraq, ca sodoxolec da 'neeta ná'maq chi qanelaataxaquipi.

⁷ Qam chicqotec so nouaataxanaq lashi Lisias, npa'xanlec, ca se qaralo'guit, ca louootaxanaxat.

⁸ Ca 'naac quecá'maq pa'guentac da'maxare, ca nacpegue' qami'. Ca' nagui chaqaqami' nachi' da'maxare, quiyim 'uo' ca sqai llic quedá'maq qara'qaataxanaxac quená'ogue na lasauaxaseteripi.

⁹ Ca' so judioipi hueete'eyi sá'ogue nemaashiguim 'naac quiyim llic dajo.

¹⁰ Ca' so nashi ỹa'ue da letanec quiyim 'naapega quiyim retaqa so Pablo. Ca' so Pablo retaqo', ca 'naaco': —Aỹim ỹaatqajam sa'maxarenta ñichoxota qami' nagui, ma' sa'den quiyim qami' canchaqaica se ỹa'maxañi, lotqai 'maxachiriñi quena seuqate'e, mashic shi'gom la'vii naua ñaxari.

¹¹ Ma' 'vio' caua doce na'xata' quiyim sovira'a yi Jerusalén. Ma' sahotaque quiyim ñqouagaxainot ñi qota'olec. Ca' chaqaqami' shichi' nataxañitegue dajo.

¹² Qaica ca iuañiua' quiyim 'ue quet ca setaqata'guit, chaqai quiyim sasauaxatetecta' quet na qom cañi no'ueenaxanaxaqui late'ogue', chaqai quenaua 'imqa lapooqote' na judioipi, chaqai canchaqaica liỹa hua'gue quiyi na'a' lodegaxat.

¹³ Ca' najo qomyipi qaica quet cá'maq 'neeta quiyim 'ue quet ca ỹauanchigui ỹasauaxaset.

¹⁴ Qam qaidaata sechoxoteta quiyim so'ueetetac da lo'ueenataxanaxac ñi qota'a queso 'auaxaic qareta'allipi, qam naua'maxare dajo 'neesapega se nateno ñicyaxac. Qam seuelec ná'ogue ná'maq naneretañi naqataxaquipi chicqo'ot nqohin so Moisés, chaqai so letaxaỹaxaquiripi ñi qota'a.

¹⁵ Chaqai 'nejem da ñaquitaxac quiñi qota'olec dá'maq naquitaxague' naua'maxare, quiyim na leuaxaic liỹa nca'leuec nqohin, ná'ogue na huagaxaraic chaqai na nocqaic.

¹⁶ Vichiguiño' yiuogoq quiyim qaica ca ñauataque ỹasauaxaset quiñi qota'olec chaqai quena qomyipi.

¹⁷ Ca mashic 'vii saua ñaxari souootac, ỹoqa'a na seueta'gue, ca sopil, sopila yí'maq chi iuo', ñachiita aso lqouagaxanqate na ỹaqaỹaripi, chaqai sodou'a ñi qota'olec aso ỹachitaxanataxanqate.

¹⁸ Ca' ỹim so'ueetetac dajo na'le cañi no'ueenaxanaxaqui quiyi Jerusalén na' ime da ñiquiỹoxoc. Ca' novirero saua judío lase', chicqora'gue da 'laua Asia, ca iuanterelec aỹim. Qam mesqai 'xoic ca qom chaqai qaica cá'maq la'aaxa quet hua'anyi.

¹⁹ Ca' chaqaicaua quet cauá'maq nague' quenajo ỹa'xate' ca ỹasauaxaset quiyim 'ue.

²⁰ Loqo'm quená'maq hueete'e najo nagui, ca ỹa'xat no'm 'ue ca ỹasauaxaset na' salequetaugui so lapoxoc na nashillipi ỹo'ueetegueñi na leloxoỹaxaquipi.

²¹ Loqo'm chaqaida da sasoualec ma' se ñconaỹañi na' setaqa, shinac: “Nagui yimichitac queca ỹasauaxaset, ma' ỹim seuelec ñi qota'olec quiyim ishit liỹa nca'laxatec ná'maq shi'gue ileu.”

²² Ca co'na' 'xaỹa dajo so Félix, chaqai mashic ỹa'deenta da llicyaxac ná'maq huelec so Jesús, ca' ỹaqaguita'guit, ca 'naaco': —Saqa' ime dajo, qam ñauaanqa'piguito' ca nouaataxanaq lashi Lisias, ca paguec sa'deenta ma'le cá'maq 'neeta dajo caqamiri.

²³ Ime, ca' so Félix ila' so nouaataxanaq lashi quiyim so Pablo ñaq ncoñiretari' nqai'en, qam qoỹaanem quiyim qailligueme' qareloxoỹa'a, chaqai qaỹa'maxarenta qara'piichiu'a quecanchaqaica lauo' le'ec quiyim ỹotauan.

²⁴ Ca co'na' mashic 'vii saua na'xata', ca lotqai noviro so Félix, liỹaatac aso loua Drusila. So'maxare judío lase. Ca qaroỹaxane'oga so Pablo quiyim qanauego qana'xaỹaxana quiyim ỹa'xat ca leloxoỹaxac ca pi'ỹa'a so Jesucristo.

²⁵ Qam co'na' so Pablo ỹa'xat queca qom ỹalamaxateta da no'ueenataxac, chaqai queca netelalta', chaqai ca nouaxanaxaset ma'le ca sqai huelec ñi qota'a. Ca' so Félix co'na' 'xaỹa dajo, ca no'chi. Ca 'naapego' so Pablo: —Yi, mo'e' nagui, toco' ma' 'ue ca idaaqa', ca liỹo' soỹaxañiraxaua'.

²⁶ Chaqai qai'neeta so Félix 'uo' da naquitaxac quiyim naqatalta' so Pablo, quiyim sqaỹaloq ỹosouec. Vichiguiño' sqai 'migui roỹaxana quiyim retaxaỹa'pegue'.

²⁷ Ca' mashic dos ñaxari 'neetari'o' dajo, ca so Félix totqai nashi, ca qalam so Porcio Festo nashi. Qam ma' so Félix ỹahotaque quiyim ỹa'maqachigui lauel nqai'en so judioipi, ca no'ueenaugui nqai'en añi ncoñiitaxanaxaqui so Pablo.