Hechos 10 - La'qaatqa ñi qota'olec Qota'olec & Qota'olec Novita Na Qomyipi

So Pedro chaqai so Cornelio

¹ 'Uo' so ỹale leenaxat Cornelio na'ñi yi Cesarea. So'maxare nouaataxanaq lashi, reloqota'a so cien nouaataxanaq qaỹamata'gue Italia laseripi.

² So ỹale chaqai sá'ogue so lauo' laseripi ỹaatqajam huelec ñi qota'olec, chaqai no'cha'a ñi'maxare. Chaqai 'xoico' quen ana ỹaan lam, lotaanaxanqate quena judioipi, chaqai se neme nqouagaxaintacot ñi qota'olec.

³ 'Uo' so na'xa'a mashic rashiiñi aso ra'aasa, ca 'uo' so leuanaxanaxac, iuano' so chicqashiguim qota'a lelaatec inoxonou'a quiyi neeta'ñi. Ca 'naaco': —¡Cornelio!

⁴ Qam so Cornelio chi ra'iito'oto' so nelaatec chicqashiguim, ma' 'xoic da lqolonaxa, chi nacantauco' quiyim inat: —¿Negue' ca, qami' ỹa'gaxala'? Ca' so nelaatec 'naaco': —Ñi qota'olec ỹacoñiguit da nqouagaxainaxaqui' chaqai da 'ñiisari' quena' tauañi' ná'maq 'ue louenaxanaxa.

⁵ Vichiguiño' 'maxaraic quiyim 'viichi' caua relaataxahi' taategue da na'a' Jope, i'guenda'a ca ỹale dos leenqate' Simón Pedro.

⁶ Cajo Simón Pedro neeta'ñi yi la'a' ca leenqashaxaua Simón, loshicmaxa lo'o, yi la'a' neeto'ot na laseego aso huaaxai. Ca ca'maxare ra'qaataxanem qami' ma'le quecá'maq 'viichi'.

⁷ Ca co'na' eec so qota'a lelaatec retaqata'pegue', ca' so Cornelio roỹaxanalo saua dos lelaatqa chaqai so nouaataxanaq le'ec. Sojo ỹale mashic shi'gom icoñiguit da na'qaatec chaqai npe'eet ma' qamaxaraic.

⁸ So Cornelio ỹaatqajam ra'qaataxane'tema quedá'ogue dajo, ca ilate' queda Jope.

⁹ Ca' queso liỹa na'xa'a co'na' ñaqai queesa'gue so nayic co'na' mashic ipalasau'a yi Jope, ca' so Pedro taashi'ma ca pa'aashiguim queca 'imec, ca' nqouagaxain, mashic na'xa'a lavinñi.

¹⁰ Ma' ỹaatqajam 'xoic na lqopaaxa, ca' ỹahotaque quiyim que'e. Qam ñaq qaỹo'ueetetac so loq, ca' 'uo' so lauanaxanaxac,

¹¹ quiyim 'eco' qaỹauachigui na piguim, ca' 'uo' so chicqo'ot 'ec nepo' lodegaxat, taata'ña yi hueeta'ñi so Pedro, qaicoñireta'ta' naua cuatro lasoguel.

¹² Ca' sojo 'ec nepo' 'uo' na hueeta'ñigui ỹoreta'oguit iseripi. 'Uo' na cuatro lapiaate', chaqai nanaic, chaqai ná'ogue na ỹo.

¹³ Ca' so Pedro 'xaỹaco' so na'qaatec, 'naaco': —Pedro, nachaachiriñi, vite ca lauachi' quena iseripi, ca' 'qui'.

¹⁴ Ca' so Pedro 'naaco': —'E', qami' ỹa'gaxala', se ỹauanapega sa'ic ca qohinac napio'o, loqo'm ca se qaỹa'ic.

¹⁵ Ca' so na'qaatec liỹa pilalec quiyim qohinapega: —Sqai 'ñirac napio'o cá'maq mashic co'taxat ñi qota'olec.

¹⁶ Ca' sojo na'qaatec tres pilalec quiyim 'naac dajo, ca' quiyi, ca so 'ec nepo' pilshiguim quena piguim.

¹⁷ Ca' so Pedro ñaq ra'deenataxantac negue' ca 'neeto' so lauanaxanaxac, ca ỹovirero quiñi lasom saua ỹale' nelaatqa so Cornelio, renataxansaque ca la'a' so Simón.

¹⁸ Ca co'na' ỹovirero ca nelamaxarene' renataxanta'pe no'm 'ue ca ỹale neeta'anyi leenaxat Simón Pedro.

¹⁹ Qam so Pedro ñaq ỹa'deentapega so lauanaxanaxac, ca' so Espíritu Santo 'naapego' so'maxare: —'Ajñii', tres daua ỹale' idaansaque qami'.

²⁰ Ne'laxachirishiguim, renochirec, ca' quiteguelo, qaica huapigui qavilli', ma' chaqaỹim ñilate'.

²¹ Ca' renoteco' so Pedro quiyi hueese'e saua ỹale' lelaatqa so Cornelio, ca 'naaco': —Chaqaỹim ná'maq qamiri daañitaque. ¿Negue' cá'maq 'neeta quiyim novirii?

²² Ca' saua'maxare 'neraco': —Nelate' qomi' ñi nouaataxanaq lashi Cornelio. Ñi'maxare ỹaatqajam huagaxaraic ỹale chaqai ỹaatqajam ỹa'maxate'tegue ñi qota'olec, vichiguiño' ná'ogue na judioipi ỹaatqajam lauochaxat chaqai lqo'itaxat ñi'maxare. Ma' 'uo' so chicqashiguim qota'a lelaatec 'naapega ñi Cornelio quiyim relaataxana qami' quiyim quirepegue' yi la'a', ca' ñi'maxare na'xaỹaxana ca ra'qaataxanaxaqui'.

²³ Ca' so Pedro la'qarañi nqai'ne' saua'maxare queso pe. Ca' queso liỹa nete'e, ca so Pedro liỹa' saua'maxare, ca 'vio' saua mashic ỹaconchiguit da na'qaatec, coỹaataxane', nera'ñi yi Jope.

²⁴ Ca' queso liỹa na'xa'a co'na' ỹovirera'a yi Cesarea yí'maq neeta'ñi so Cornelio, rauaanaxantac, 'xoico' so lapoota'guit queso chi lauo' laseripi chaqai so namigollipi só'maq ỹa'uo' la'xaỹaxac.

²⁵ Ca co'na' ỹoviro so Pedro queca na'a', ca' so Cornelio ca'guit, ca ỹa'chi'iñi naua le'cootal, ỹahotaque nqouagaxainot.

²⁶ Qam so Pedro ỹaconsop, ca 'naapego': —Nachaachiriñi, ma' ỹim qom, shinta maqami'.

²⁷ Ca co'na' so Pedro ñaq retaqata'pegue' so Cornelio, ca inoxono queca 'imec, ca iuanejlec so 'xoic qomyipi lapoota'ta'.

²⁸ Ca' so Pedro 'naapego' so qomyipi: —Qamiri 'yiiñita queca judío le'ec qaỹapaxaguinegue quiyim ỹaatqajam se qaỹashiñiguit quiyim ỹalequeta'guit ca ỹoqa'a qomyipi loqo'm inoxonougui ca lauo'. Qam ñi qota'olec yapaxaguinegue quiyim sqai shinapega napio'o loqo'm se no'uen canchaqaica qom.

²⁹ Vichiguiño' na' qaroỹaxañiua', chaqa'ma' qaica ca shinac, ñanac. Ca' nagui sahotaque sa'den negue' ca 'neeto' quiyim ỹaxañiua'.

³⁰ Ca' so Cornelio 'naaco': —Mashic cuatro na'xata' nagui, 'nejem nagui chaqaiyi yi ñiichi'ñi añi ra'aasa quiyim aỹim senta'ñi na ỹa'a', ñqopaaqachitetac, so'ueetetac yi qouagaxainaxac quiyi vit. Ca' queca na'le, ca seuana so ỹale ỹaatqajam qashilgue' saua loho.

³¹ Ca 'naapiguiỹa': “Cornelio, ñi qota'olec 'xaỹa da nqouagaxainaxaqui' chaqai ỹo'leenta'a da rqouagaxa'e' quena' tauañi'sac ná'maq 'ue na louenaxanaxa.

³² Laataxañita ca ỹale dos leenqate' Simón Pedro, neeta'ñi yi na'a' Jope, neeta'ñi yi la'a' ca liỹa Simón, loshicmaxa lo'o, ñi lauo' neeto'ot yi lqodoc aso huaaxai. Ca ma' novi', ca 'ue ca ỹa'xat caqami'.”

³³ Ca vichiguiño' chaqa'ma' selaataxane quiyim qoyique qami'. Ca' nagui chalego la'maxa quiyim nanaqui'o'. Ca' nagui qomá'ogue seuqate'e najo reloqota'ñi ñi qota'olec. Ma' qomi' sahoqotaque quiyim ña'xaỹaxanaxa qami' quecá'maq ỹaanem qami' ñi'maxare quiyim 'qaataxañitema qomi'.

Da letaxaỹaxac so Pedro co'na' hueeta'ñi yi la'a' so Cornelio

³⁴ Ca' so Pedro co'na' retaqa, 'naaco': —Nagui, ca' sa'den quiyim llic quiñi qota'olec se nca'aatagui na qom.

³⁵ Qaidaata quiyim icoñiguit canchaqaica qom quena 'laua cá'maq ỹa'maxate'tegue ñi'maxare chaqai ỹo'uet ca ỹa'maqachiguiñi.

³⁶ Ñi qota'olec retaqaugui so llaxataxaipi so Israel, ỹa'xateta'guit da neuagaxa ỹachigoxochichigui so Jesucristo, ma' só ná'ogue na qom la'gaxala'.

³⁷ Co'na' ime da la'qaataxanaxac so Juan chaqai da lachilaxanataxanaxac, chaqai qai'neeta 'yiiñita da chi lo'ueenataxanaxac so Jesús, chicqochi'ñi yi Galilea, ca chi ỹovireta'ogalo naua'que naua 'lauari neetalgoto na judioipi.

³⁸ Chaqai 'yiiñita quiyim ñi qota'olec ỹaanem so Jesús Nazaret le'ec da lquesaxanaxa so Espíritu Santo, chaqai ỹo'ueetetac da no'uen, chaqai ỹomatec ná'ogue na 'xoic na le'xoric qaipataqatañi queda lquesaxanaxa so na'ỹaapec. Dajo ishit ỹo'uet so Jesús, ma' ñi qota'olec liỹaatac so'maxare.

³⁹ Ca' qomi' qomá'ogue seuanqatalec ná'ogue ná'maq ỹo'uet so Jesús cana' queeteguelec yi na'laua na judioipi chaqai quiyi na'a' lodegaxat Jerusalén. Ca ime, ca' qaỹalauat, qoỹanashiguim queso npatenaxala'.

⁴⁰ Qam ñi qota'olec liỹa nca'leuec nqai'en na' ỹovirerec saua tres na'xata', ca lotqai liỹa nachaxanalo qomi'.

⁴¹ Qam mesqai ná'ogue na qom nachaxana; qoqometa, ma' qomi' shi'gue lca'acse' ñí'maq qota'olec quiyim sa'xataq dá'maq qarauanaxanaxac, ma' qomi' qarqui'ỹaxaua chaqai qane'taxaua na' ime liỹa nca'leuec.

⁴² Chaqai qarelarelec quiyim sa'qaataxanaxaugui na qomyipi quiyim sa'xataq quiyim chaqaiso só'maq ñi qota'olec ỹanagui quiyim imit ma'le na lasauaxaset ná'maq nca'leetauec chaqai na ileu.

⁴³ Chaqai qai'neeta shi'gue sá'ogue so letaxaỹaxaquiripi ñi qota'a ỹa'xateta'guit so Jesús, quiyim 'naac ná'ogue ná'maq huelec so'maxare, ca' qaỹapalaxate' caua lasauaxasete', ỹachigoxochichigui da leenaxat.

So mesqai judioipi ta'ñigui so Espíritu Santo

⁴⁴ Ca co'na' ñaq retaqatac so Pedro, ca novi'o' so Espíritu Santo, ca taalec sá'ogue so qomyipi na'xaỹaxantapega da na'qaatec.

⁴⁵ Ca só'maq mashic ỹacoñiguit da na'qaatec judioipi nauegaxauaripi so Pedro ỹaatqajam chalego le'laxa quiyim so Espíritu Santo qai'neeta qoỹaanem na mesqai judío.

⁴⁶ Ma' 'qaatapega ỹoqa'alo naua na'qaatqa ỹa'xate', chaqai imaqachintac ñi qota'olec.

⁴⁷ Ca' so Pedro 'naaco': —¿Negue' quet ca 'neeta quiyim se qanachilaxan najo qomyipi quiyim mashic icoñiguit so Espíritu Santo, 'nejme' qomi'?

⁴⁸ Ca relaataxanlec quiyim qanachilaxan, quiichigui nqohin da leenaxat so Jesucristo. Co'na' ime, ca' qaỹashiilo'ot so Pedro quiyim ỹa'vii na'xata' ỹalequetauguilo saua'maxare.