Hebreos 8 - La'qaatqa ñi qota'olec Qota'olec & Qota'olec Novita Na Qomyipi

So Jesús chaqaiso só'maq qoshiilgoto qomi' nagui queda dalaxaic 'maqataxac

¹ Ca dá'maq paguec ỹapacauec nqaishinaq quedá'maq sa'xatqatac, chaqaida dá'maq 'neeta da no'ueenataxac só'maq 'oonoqui' qaretaxaỹaxanqajnec. Nagui so'maxare nqa'xantañi queda loic yi nqa'xanqa' ñi qota'a queda piguim.

² Ca' chaqaiso só'maq qaretaxaỹaxanqajnec quiyim retaxaỹa'pegue' ñi qota'a quecá'maq ỹaatqajam lauo' ñi qota'a queda piguim, cá'maq 'imec chi lo'ueenatec ñi qara'gaxala', mese lo'ueenatec ca chaqai qom.

³ Ná'ogue ná'maq lashi na netaxaỹaxanqajanqaipi qoỹana'ñi yi loma', ma' qaỹouen quiyim ỹaantapego ana nachitaxanataxanqate chaqai ana qoỹaano quiyim qaỹavigaxat. Vichiguiño' so Jesucristo qai'neeta ỹouen quiyim 'ue aca ỹaano lachitaxanataxanqate.

⁴ Quetqai so'maxare ñaqai hueetalec na 'laua, ca qaica ma' ishit quet quiyim netaxaỹaxanqajnec, ma' ñaqa 'ue ná'maq netaxaỹaxanqajanqaipi quiyim ỹaantapego ana nachitaxanataxanqate relaataxanlec so naqataxaquipi chicqo'ot so Moisés.

⁵ Qam dajo lo'ueenataxanaxac na netaxaỹaxanqajanqaipi chi ladenqataxanaxac chaqai 'ec la'al cá'maq hueeta'gue da piguim. Sa'deenqata quiyim nadenqataxanaxac, ma' so Moisés co'na' sham ỹo'uet ca lauo' ñi qota'a, qam ñi'maxare 'naaco' na'le queso'maxare: “'Ajñite' ma'le, ca 'viichi' dá'ogue dá'maq no'ueenataxac. Denaxachichirigui cá'maq no'ueenataxac só'maq sachaxanem qami' na'le cada quemaralec ladocai leenaxat Sinaí.”

⁶ Qam paguec loyac da lo'ueenataxanaxac so 'oonoqui' qaretaxaỹaxanqajnec quiyim retaqalgoto qomi'. Ma' qaretaxaỹaxanqajnec quedá'maq paguec loyac 'maqataxac, chicqochiguilo nqohine' nauá'maq paguec loyaague' qaỹachaxanta'po' na'le.

⁷ Ma' quetqai só'maq 'auaxaic 'maqataxac ỹa'maqachiguiñi quiyim ỹapalaxat na lasauaxaset na qomyipi, ca' se ipacaque quet quiyim qaỹadalaxat ca liỹa 'maqataxac.

⁸ Qam ñi qota'a iuana quiyim se ỹa'maxañi da no'ueenataxac na qomyipi, ca' taachigui dá'maq ỹa'xato' co'na' 'ue da 'naac queso qomyipi quenaua naneresañi la'qaatqa: Ñi qara'gaxala' 'naaco' na'le: 'Uo' ma'le ca na'xa'a quiyim sadalaxat da ña'maqataxac quena na'ñi yi Israel chaqai quena na'ñi yi Judá.

⁹ Qam totqai 'nejem so ña'maqataxac quesó'maq 'auaxaic leta'allipi na'maxare, quesó'maq na'xa'a na' secona da lqai'laxat quiyim ñaqata'a quiyi 'laua Egipto; ma' se ỹomachirigui so ña'maqataxac, vichiguiño' salat na'le so qomyipi, 'naac ñi qara'gaxala'.

¹⁰ Cá'maq ña'maqataxac so'uet ma'le quena llaalqaipi so Israel ma' ime'ueque cauajo na'xata', 'neetasa' ma'le 'naac ñi qara'gaxala': Sellaagui ma'le yi la'deenataxanaxac na ỹaqataxaquipi, chaqai serelgoto ma'le añi le'taxanata. Ca ma'le, ca' ỹim qota'olec quena'maxare, chaqai na'maxare, ca ỹalamaxareteripi.

¹¹ Ma'le, ca' qaica quet cá'maq ỹapaxaguintac ca liỹa, se ỹapaxaguin ca nauegaxaua, chaqai ca lqaỹa, quiyim iuañiua', ỹim ra'gaxalarii. Ma' ná'ogue iuañiua' ma'le, ỹovira'a ná'maq qom qaica ca lemaqachic, chaqai ná'maq paguec qaimaqachin.

¹² Ca' sapalaxat ná'maq se no'uen ỹo'ueetetac na'maxare, chaqai tot so'leentapega ma'le na lasauaxaseteripi.

¹³ Co'na' ỹa'xat ñi qota'a so dalaxaic 'maqataxac, ca ñi'maxare 'ec qo'oq nqai'en só'maq 'auaxaic; chaqai ná'maq mashic qo'oq chaqai mashic ite', ca na'maxare qaỹaloq imeuo.