Hebreos 2 - La'qaatqa ñi qota'olec Qota'olec & Qota'olec Novita Na Qomyipi

Se ỹa'maxañi quiyim se qara'ijlec dá'maq llicyaxac da nca'laxa

¹ Ca vichiguiño' qomi' ỹaatqajam paguec sa'maxatqa'tegue quet da qana'xaỹaxanaxac quedá'maq sa'xaiqachigui, qaiyi se qarelamqauec.

² Ma' dá'maq na'qaatec qoỹaanec quesaua 'auaxaqa ñaxari chicqochigui nqohin so chigoxoshiguim qota'a lelaatqaipi, ca dá'maq ỹachaxan ỹaatqajam lliqueta. Ca vichiguiño' ná'maq 'ue na lasauaxaset chaqai se na'xaỹaxan, ca ỹaatqajam 'chichiguiñi qaỹa'ue na nouaxanaxaset.

³ ¿Huose'queto' qohite' qomi' no'm sqailligueme' ya'ỹoxolec dá'maq llicyaxac dá'maq chalego lecaic nca'laxa? Ma' chaqaiso so qara'gaxala' só'maq 'au ỹa'xato' na'le dajo nca'laxa, ca co'na' ime, ca lotqai qalam só'maq na'xaỹaxantapega so'maxare chaqai ỹaatqajam 'chichiguiñi nqai'en da na'qaatec. Ime, ca lotqai ra'qaataxanalo qomi'.

⁴ Chaqai ñi qota'a qai'neeta 'chichiguiñi nqai'en dajo na'qaatec. Ca ỹa'vii naua netanqa, chaqai ná'maq ỹo'uet da ne'laxa, chaqai 'xoic na ỹo'uet quená'maq se qaiuanapega, chicqochigui nqai'en so Espíritu Santo quiyim ỹaanema qomi' ná'maq ỹoreta'oguit ỹoiquentac quecá'maq 'ne'tegue.

Da no'ueenataxac so Jesucristo chaqai 'nejem ná'maq re'qoochigui lqaỹaripi

⁵ Ma' ñi qota'a se pataxalec da no'ueenataxanaxac na lelaatqaipi piguim laseripi quecá'maq 'laua sa'xatqatac.

⁶ Ma' quenaua naneresañi na'qaatqa 'uo' so ỹa'xat na'le 'naaco': ¿Nega'ỹo' ca ỹale quiyim qami' qota'a quiyim o'lliinchira'a ca'maxare? Chaqai ¿negue' queto' cá'maq ỹale tai'a quiyim ileu quiyim 'yiiñisapega ca'maxare?

⁷ Ca' chaqai cocho'qui' nqo'ñiichiguiño' na'le nqai'ñi' quena nelaatqaipi piguim laseripi. Qam ñi'ragui da lecaic chaqai da lemaqachic, chaqai 'ỹaañitem da lquesaxanaxa quiyim reloxoỹa'a ná'ogue ná'maq ro'ueenachiqui'.

⁸ Ná'ogue lli'ro'oto naua lapiaate'. Ca' mashic ná'ogue qaillo'oto naua lapiaate' na qom, ca' ñi qota'a sqaica quet cá'maq no'ueenaqtauec quiyim se qanollaañi quena'maxare. Qam qaiyiita saqa' seuanaxa quiyim ná'ogue na'xaỹaxana na'maxare.

⁹ Qam qomi' seuanaxa so Jesús só'maq ñi qota'a paguec nqo'ñiichiguiñi nqai'en quena lelaatqaipi piguim laseripi, qam se ladoguec. Ca quedá'maq le'xorenataxanaxa ñi qota'a, ca ỹo'uet quiyim ileualec ná'ogue; ca' nagui qoỹanagui da lecaic chaqai da lemaqachic, ma' ỹovirau'a da le'xoric na' ileu.

¹⁰ Ma' ñi qota'a lalamaxaret ná'ogue nanchaqaina 'ue, chaqai chaqai chicqo'ot ñi'maxare. Ca' ñi qota'a ỹahotaque quiyim ná'ogue na llaalqaipi nouanau'a da lauaq. Ca vichiguiño' ñi'maxare naloqojonchiguiñi nqai'en da no'ueenataxac so Jesucristo, só'maq lca'laxala' na'maxare, chicqochigui nqai'en da le'xoric.

¹¹ Ma' ná'maq qaico'taxat da nachaalataxac, chaqai só'maq quiỹoxontac, na'maxare 'oonoqui' ñí'maq qota'a quena'maxare. Ca vichiguiño' so llaalec ñi qota'a se nayiloxon quiyim roỹaxana 'naac lqaỹaripi.

¹² Ma' naua naneresañi na'qaatqa 'naac: Sa'xatetac qami' ma'le quena ỹaqaỹaripi, chaqai so'uen ca no'ueenec semaqachintac aqami', ma' sentañigui, ca lapoota'ta' quena mashic icoñiguit da na'qaatec.

¹³ Qai'neeta 'nerac naua na'qaatqa: Ỹim ỹaatqajam spi'ỹa'a ñi qota'a. Chaqai lotqai liỹa 'naac: Nagui seuete'e najo llapoota'guit na ỹaalqaipi nañaañim ñi qota'a.

¹⁴ Na ñaalqaipi 'oonoqui' ca qaỹachigoxochichigui. Na'maxare dá'ogue da no'ueenataxac; ca' chaqaida 'neeta nqohin so Jesús 'ec chaqai qom, qaiyi ishit ileu. Ca' queda, ca ishit ỹopoxoỹaxachigui só'maq hueeto'ot da nquesaxanaxa quiyim ralauataxan. Ca so'maxare chaqaiso so na'ỹaapec.

¹⁵ Ca' chaqaida dá'maq 'neeta quiyim ỹosouec ná'ogue ná'maq 'ec ncoñireta'guit da lqolonaxa queda nelauaxa quedá'ogue da nachaalataxac.

¹⁶ Dajo ỹaatqajam llic quiyim so'maxare sqa nac quiyim ỹotauan na nelaatqaipi piguim laseripi; ta'ta'a quiyim ỹotauan na llaalqaipi so Abraham.

¹⁷ Ca' chaqaida dá'maq quiyim so'maxare 'ec nqohin dá'maq no'ueenataxac na lqaỹaripi, qaiyi ỹovira'a qamaxaraic chaqai hualaxauaic nashi quiyim retaxaỹa'pegue' ñi qota'a quiyim naqat na lasauaxaset na qomyipi chicqochigui dá'maq quiyim nañaanalta' quiyim qaỹalauat.

¹⁸ Ma' so'maxare qai'neeta ỹovirau'a da le'xoric chaqai da ne'guenaxac, ca' nagui, ca so'maxare ishit ỹotauan ná'maq qaỹa'ue da ne'guenaxac.