Hageo 2 - La'qaatqa ñi qota'olec Qota'olec & Qota'olec Novita Na Qomyipi

Da lauaq ñí'maq dalaxaic no'ueenaxanaxaqui

¹ Ca' quesaua seis shiriguiri chaqai veintiuno na'xata', ca ñi qara'gaxala' lotqai 'naac queso letaxaỹaxaqui Hageo.

² Ca' ỹilen quiyim 'naapega so Zorobabel chaqai so Josué chaqai so liỹa qomyipi quiyim inat so qomyipi:

³ —Ná'maq iuana só'maq 'auaxaic no'ueenaxanaxaqui quedá'ogue dá'maq loyac, ca ¿negue' ca 'ñiỹac quiñijo ñí'maq 'ue nagui coqomi'? ¿Mesqai 'ñiỹac quiyim najo qaica quet cá'maq laloxo quiyim qanaloqojñiguit so 'auaxaic?

⁴ ¡Qam na'ñaxachi', qami' Zorobabel! Chaqai ¡na'ñaxachi', qami' Josué, ma' qami' lashi na netaxaỹaxanqajanqaipi! Chaqai na'ñaxachii qamiá'ogue qamiri qomyipi ñiitalec najo 'laua. 'Ueenataxañii, ma' ỹim salequetauguilo qamiri. Ỹim na'gaxala' sqaica lqalanec, se'taxajñi da ỹa'qaatec.

⁵ Ma' chaqaida dá'maq shinac na'le na' noxoñiuec quiyi Egipto, qaica ca ro'chiỹaque, ma' so ñi'espíritu liỹareta'pe qamiri ma'le.

⁶ Ca' ỹim sqaỹaloq i'loxol nqaishin ná'ogue: na piguim, na 'laua chaqai ana huaaxai.

⁷ Ca i'loxol nqaishin ma'le ná'ogue na ỹoreta'oguit qomyipi, ca' nodouo ma'le ná'ogue ná'maq hueeto'ot nesallaxa, ca' na qouagaxainaxaqui caỹim no'qaachigui queda lauaq. Ñi qara'gaxala' sqaica lqalanec i'taxajñi da la'qaatec:

⁸ —Ỹaatqajam ỹalamaxaret ỹooỹac na plata chaqai na 'oro.

⁹ Najo co'uaataxanaxaic no'ueenaxanaxaqui paguec loyac ma'le queso 'auaxaic. Ca ma'le, ca' novi' nqaishin ca no'daxa quenajo. Ỹim na'gaxala' sqaica lqalanec, se'taxajñi da ỹa'qaatec. (2.10-14 Ñi qota'olec retaxaỹa so lalamaxareteripi se na'xaỹaxan.)

Ñi qota'olec ỹaanec da la'qaatec quiyim no'ueenaxat na nanecsec

¹⁵ Ca' nagui chaqa'ma' taachi'ñi quiyim qamiri 'yiiñitapega dajo. Ma' saqa' 'iiñi quiyim no'xoñiishiguim ca no'ueenaxanaxaqui,

¹⁶ ¿negue' cá'maq 'neeto' quen caqamiri? Ma' quena' 'ue ñi eec quepegue' ca lapoonec, 'neetapega quiyim ỹovi' veinte bolsas queca lanecsec ala, qam diesolli' bolsas caua no'xaguilo; chaqai quena' 'ue ñi quepegue' ca no'ueetqa' na lataxa, 'neetapega quiyim ỹovi' cincuenta aca nehoma no'xataxat, qam veintolli' caua no'xataxate'.

¹⁷ Ỹim ñopoxoỹaxajñi ná'ogue ná'maq chicqaugui dá'maq na'ñaaqataxaguii, sahote'e na nichigaxanaq chaqai ana qalachi, qam se rapilliỹa aỹim. Ỹim na'gaxala', se'taxajñi da ỹa'qaatec.

¹⁸ Ca' nagui quena na'xa'a, ca ỹovi' ocho shiriguiri chaqai veinticuatro na'xata' quenajo ñaaxa, ca' qaigueme qaỹa'vii naua no'xonaxalate' ñi qouagaxainaxaqui caỹim.

¹⁹ Hua', ca' nagui retañita quiyim quenajo na'xa'a, ca' taachi'ñi quiyim tot qoue na nanecsec ala quenaua lahiri. Chaqai 'eno'm saqa'laca aca la ana 'úva, chaqai ana higo lashi, chaqai ana granada lashi, chaqai ana oliva lashi, qam quenagui, ca chaqa'ma' taachi'ñi quiyim tot qaican qoue nqaishin caqamiri.

Ñi qara'gaxala' i'taxajñi da la'qaatec queso Zorobabel

²⁰ Ca' chaqaisoota sojo na'xa'a, ca ñi qara'gaxala' lotqai 'ue da 'naac queso letaxaỹaxaqui Hageo.

²¹ Ca ỹilen quiyim quepegue' so Zorobabel só'maq nashi quiyi Judá quiyim 'naac: —Ỹim i'loxol nqaishin ma'le na piguim chaqai na 'laua;

²² ñaqaguijñi ma'le da lquesaxanaxa ná'maq nashillipi ỹoiquentac na 'laua, ñinaxañi quena 'laua na nqa'xanaxaquiripi, samaxañi na lahoglenaipi nalauataxaqui chaqai ná'maq neetañigui, chaqai ileu liỹaata'ñi' ná'maq neetalec shipiguiripi, quiñi 'óna ileu qaica'laxatauec queca lecat quecá'maq chi lqaỹa.

²³ Ca' quecajo na'xa'a, ca' qami' ilaatec Zorobabel, ỹaatqajam sa'maxate'tegue qami', shinta'gue maca ichicshaqate itanaxanqate, ma' ỹim qami' ica'acsec. Ỹim na'gaxala' sqaica lqalanec, se'taxajñi da ỹa'qaatec.