Génesis 49 - La'qaatqa ñi qota'olec Qota'olec & Qota'olec Novita Na Qomyipi

Saua co'uaataxante' la'qaatqa so Jacob

¹ Ca' so Jacob roỹaxane'oga so llaalqaipi, ca 'naaco' quesaua'maxare: —Nqo'ñiiuo caỹim, qaiyi sa'xatema qamiri dá'maq ñaqa naataho viriỹau'a ma'le:

² Noquiiguiuo, na'xaỹaxañii qamiri, llaalqaipi na Jacob, na'xaỹaxañiỹa na qataa'i Israel.

³ Qami' Rubén, qami' ná'maq qami' ỹi ỹaalec; qami' iquesaxanaxa, qami' 'auaxaic chicqochigui da ñquesaxanqataxac, qami' la'auaxanec da nemaqachic chaqai da na'ñaxac.

⁴ Qam nagui, ca totqai qami' 'auaxaic, ma' 'ñiisari' ca la'uaxac qaica quepaqchiguit: ma' hualaxaiñirari' ca ỹomala' na' rapa'ira'ñi' aca iloxoỹaxanata Bilha.

⁵ Ca' da Simeón chaqai da Leví nqaỹa'; naua lo'goxonqate' louenqa quiyim se ra'maqataxan.

⁶ ¡Ỹaatqajam se yqo'ta salequetau'alo caua lapooqote'! Ma' na' ro'ỹe', ca' ỹalauate' ca qomyipi, qaica quet cá'maq 'neeta, qam chaqai 'ñiigue, ca qaicchii' naua lichil so huacallipi.

⁷ ¡Se no'uen da nayicyaxague', ajá'a, ỹaatqajam se no'uen, sauaxat da lonogoxonaxague' quiyim qaican quepaxat! ¡Seuagaxaterec ma'le daua'maxare quená'ogue na llaalqaipi na Israel!

⁸ Qami' Judá, na rqaỹachi'ipi remaqachiñi' ma'le. Na npa'guenaxauachi'ipi coñitot ma'le na lqosot, chaqai nauá'maq chi rqaỹachi' ỹa'dooto qami' ma'le naua le'cootal.

⁹ ¡Ca' qami' Judá, qami' ỹaalcolec! 'Ñiisari' meca sauaxaic llaalec quena' ỹovita ỹaxanñi quiyim ỹa'queetac aca loxona: nqai'guiñi, ca nqa'paxanñi quena 'laua, 'neetari' meca sauaxaic lodegaxat. ¿Negue' queto' cá'maq ishit quiyim sqai ỹaxanac?

¹⁰ Qaica ca ishit rouootaxana'gue da lquesaxanaxa ñi Judá chaqai quiyim na'gaxala' cada lo'qoota'a lashilete, chi ỹovireta'a quiyim novi' cá'maq lalamaxarete lashilete ada'maxare, ca ca'maxare qana'xaỹaxana ma'le quená'ogue na ỹoreta'oguit qomyipi.

¹¹ Cá'maq coñirari' ca lalo 'ashin queca uva loma', cá'maq quiỹo' caua loho ỹahote'e na lataxa, ¡ỹahote'e na uva li'i!

¹² Naua nqote' paguec naueralgoto da letocqa' quena lataxa; chaqai naua louee paguec lalacqa' quenaua lo'i'.

¹³ Ca' da Zabulón neeto'ot ma'le na lahi aso huaaxai, yí'maq 'ue ma'le ca lovirqa' ana nahi' huaxaỹaqse. Ca na loma' ỹovira'gue ma'le da Sidón.

¹⁴ Da Isacar 'neetari' meca nelo nodoxonaxala' nco'matqa' ca qo'parit.

¹⁵ Ca' ma' iuane'ta quiyim lo'yaxanec ca 'laua chaqai 'maxaraic quiyim co'matqa', ca' quemaraxajlgoto naua lallaaco quiyim 'ue ca li'ỹaac, i'maqatam nañaañiguit quiyim na'ac.

¹⁶ Ca' da Dan reloxoỹa'a ma'le ná'maq chi lauo' laseripi, 'nejem na liỹa llaalqaipi na Israel.

¹⁷ Da'maxare 'nejem ma'le ca nanaic hueetau'e na lahi ca nayic, quiyim ỹa'guiguilo naua la'ỹaaxal na shipiguiripi, ca ỹanataxajñi cá'maq neetalec.

¹⁸ Qami' ỹa'gaxala', ñauaanta'a quiyim yca'laxachirec.

¹⁹ Ca' da Gad qanalauate'e' ma'le queca nouaataxanaq, qam ma'le, ca da'maxare rocanaxan.

²⁰ Ca' da Aser qaica ca louenaxanaxa ma'le quena na'ic; da'maxare ỹaan ma'le ca na'ic 'nejem na loq na nashillipi.

²¹ Ca' da Neftalí 'nejem na re'xone' ỹaatqajam nosoochiguiñi chaqai ỹaatqajam lo'yaxanec da llaalquenaxanaxac.

²² Ca' da José 'neetari' ma'le aca qo'paq neeto'ot na lahi ca huaxaỹaq, ỹaatqajam 'xoic ana la chaqai naua lasotee nqai'guerelec na napoxonaxat.

²³ Na no'xoshic lo'ollipi noquii'a, ỹahintapeguec na lovic, chaqai se neme se qaỹo'daxat;

²⁴ qam da José ỹaatqajam ra'ñi'teguelo naua lqai'laqate', lo'qoochiguiñi da lo'xoshic; ¡ña'aachic quiñi qota'olec quena Jacob, ma' quesaxanaxaic!, ¡ña'aachic quiñí'maq neloxoỹaq ro'ootaxanteguelec na Israel!,

²⁵ ¡ña'aachic quiñí'maq qota'olec quena qataa'i', ñí'maq rotauañi'sac ma'le; ñi qota'olec qaica ca lqalanec, ñi'maxare no'ueenaxat ma'le ca qayicyaxaqui'! ¡Quecá'maq lqouagaxanaxat chicqo'ot na piguim! ¡Queca lqouagaxanaxat chicqa'ñi ca lauajñi aca huaaxai! ¡Dá'maq nqouagaxa queca nco'oxoc chaqai quiyim qarillipegue aca nate'e!

²⁶ Na qataa'i' ỹapacauec nqai'en ca lqouagaxanaxat caqami' quedá'maq lqouagaqa' saua ita'al caỹim. Napaqueralec ca lqodoc naua quemaralgoto qa' ladocai 'ec qaica ca lqodoc nauajo qouagaxaco hueetalgoto ma'le na lqahic da José, dá'maq qanca'au'a na'le quena lqaỹaripi.

²⁷ Ca' da Benjamín 'neetari'o' ca isecỹac toxonaxai, ca' quiyi nete'etam, ca ỹo'taxantañi ỹa'ic ca loxonec chaqai quiyi avit, ca imeenec ca li'ỹoxot.

²⁸ Ca' 'ena ná'maq ne'qaipi quesaua doce llaalqa so Israel, ca' dajo dá'maq la'qaatco' na'le so leta'a queso llaalqaipi na' ỹaanem da no'uen llicyaxac.

Dá'maq 'neeto' na'le da lelauaxa so Jacob

²⁹ Ca 'uo' so na'xa'a so Jacob ỹa'uo' da la'qaatec queso llaalqaipi, 'naaco': —Tot qaỹaloq yileu. Ca ma' yileu, yishiñiño' ma'le quiyi hua'ñi yi ita'allipi, quiñi lauac na'ñi yi na'laua so Efrón só'maq hitita le'ec,

³⁰ queda 'laua Canaán. Ñijo lauac na'ñi yi Macpela naloote'oga yi la'a' so Mamre, yí'maq lishiujnaxanaxat na'le so Abraham, liỹa'uegue' so na'laua so Efrón, ỹahotaque loma' na lasauaxanqaipi.

³¹ Yí'maq qaishiñi'ñi na'le so Abraham chaqai aso loua Sara, chaqai so Isaac chaqai aso loua Rebeca. Chaqai qai'neeta seshiñi'ñi na'le aso ỹoua Lea.

³² Yí'maq 'laua chaqai ñi lauac na'ñi yi'maxare, nishiujnaxanaxat na'le queso hitita laseripi.

³³ Ca co'na' so Jacob ỹomat da laqataxac queso llaalqaipi, ca' liỹa nenanñi queso lomala'. Ca ileu.