Génesis 46 - La'qaatqa ñi qota'olec Qota'olec & Qota'olec Novita Na Qomyipi

So Jacob eec quepegue' yi Egipto

¹ Co'na'le, ca' so Israel na'maxajñi quiyim eec i'xat sá'ogue só'maq hueeto'ot. Ca co'na' ỹovita yi Beerseba, ca' ỹa'ue so lachitaxanataxanaxat ỹavigaxat, ca ỹaanot ñi qota'olec queso leta'a Isaac.

² Ca' queso pe ñi qota'olec retaxaỹa'pegue' so Israel, viichigui nqai'en so lelaxac, roỹaxana queda liỹa leenaxat Jacob. Ca so'maxare saat, 'naaco': —Aỹim seuete'e najo.

³ Co'na'le, ca ñi qota'olec 'naaco' queso'maxare: —Ỹim qota'olec, nqota'olec so qataa'i', qaica ca ro'chi'saque quiyim 'itegue da Egipto. Ma' chaqaiyi hua'ñi ma'le quiyim ñoquiigaxatec na qachaalaxai'pi, ỹaatqajam 'xoic nqaishin.

⁴ Ỹim ñauequeta'pegue' qami' nagui quiyim 'itegue da Egipto, chaqai chaqaỹim ñaqata'a ma'le na qachaalaxai'pi quiyi'maxare. Chaqai ma' ỹovita ca lqodoc aca rqauaxagui'i', ca' ñi José hueetau'e ma'le na rahi'i'.

⁵ Ime, ca' Jacob eec, ca'e yi Beerseba. Ca' so llaalqaipi so Israel renojshiguim nqai'en so leta'a, chaqai so llaalqaipi, chaqai saua louaaripi saua'maxare quesaua nahoglena nelate' so Faraón, ỹahotaque lahiri ma' qai'xate' saua'maxare.

⁶ Ca' imaa sá'ogue so lauo' so Jacob taigue da Egipto. Ca i'xat aso lalo huaca, qagreta, chaqai ná'ogue na louenec chicqa'ñi yi Canaán.

⁷ Sá'ogue so llaalqaipi, llaallipi, lauaripi, ỹalliripi, chaqai 'aallipi eec, liỹaatac so'maxare.

⁸ Ca' so Israel dá'maq liỹa leenaxat Jacob, najo ná'maq leenqateripi só'maq llaalqaipi taigue da Egipto: Ca só'maq ỹi llaalec so Jacob leenaxat Rubén.

⁹ Ca' saua llaalqa so Rubén leenqate': Hanoc, Falú, Hezrón chaqai so Carmi.

¹⁰ Ca saua llaalqa so Simeón leenqate': Jemuel, Jamín, Ohad, Jaquín, Zohar chaqai so Saúl. So'maxare llaalec aso 'aalo, lase yi Canaán.

¹¹ Ca' saua llaalqa so Leví leenqate': Gersón, Coat chaqai so Merari.

¹² Ca' saua llaalqa so Judá leenqate': Er, Onán, Sela, Fares chaqai so Zara. Er chaqai so Onán ileue'o' na'le quiyi Canaán. Ca' saua llaalqa so Fares leenqate': Hezrón chaqai so Hamul.

¹³ Ca' saua llaalqa so Isacar leenqate': Tola, Fúa, Job chaqai so Simrón.

¹⁴ Ca' saua llaalqa so Zabulón leenqate': Sered, Elón chaqai so Jahleel.

¹⁵ Ca' najo na llaalqaipio' so Jacob caso Lea co'na' ñaqai neeta'ñi yi Padan-aram, chaqai aso llaale Dina. Ca sá'ogue so llaalqaipi, ima'ta' ỹale chaqai ana 'aalo, ỹovi' treinta y tres so qomyipi.

¹⁶ Ca' so llaalqaipi so Gad leenqate': Zifión, Hagui, Ezbón, Suni, Eri, Arodi chaqai Areli.

¹⁷ Ca' so llaalqaipi so Aser leenqate': Imna, Isúa, Isúi, Bería chaqai aso lqaỹa' 'aalo saua'maxare leenaxato' Sera. Ca' saua llaalqa so Bería leenqate': Heber chaqai Malquiel.

¹⁸ Ca nauajo nauá'maq llaalqa aso na'a Zilpa na' co'ỹiguit so Jacob. So'maxare la'o' na'le so Labán, ca' ỹaanem aso llaale Lea. Ca quesá'ogue so llaalqaipi ỹovi' dieciseis qomyipi.

¹⁹ Ca saua llaalqa aso Raquel so loua so Jacob leenqate': José chaqai Benjamín.

²⁰ Ca' saua llaalqa so José caso Asenat leenqate': Manasés chaqai Efraín. Ne'qa'iñi na'le quiyi Egipto. Aso Asenat llaalo' so Potifera só'maq letaxaỹaxanqajnec na Egipto laseripi quena' qaretaxaỹa'pegue' na nenatqaipi, na'ñi yi na'a' On.

²¹ Ca' so llaalqaipi so Benjamín leenqate': Bela, Bequer, Asbel, Gera, Naamán, Ehi, Ros, Mupim, Hupim chaqai so Ard.

²² Najo ná'maq llaalqaipi saua Raquel chaqai so Jacob quiyim ná'ogue ỹovi' catorce qomyipi.

²³ Ca' so llaalec so Dan leenaxat: Husim.

²⁴ Ca' saua llaalqa so Neftalí leenqate': Jahzeel, Guni, Jezer chaqai Silem.

²⁵ Ca nauajo naua llaalqaipi aso na'a Bilha queso Jacob, asó'maq la'o' na'le so Labán, ca' ỹaanemo' aso llaale Raquel. Ca' quesá'ogue so llaalqaipi ỹovi' siete qomyipi.

²⁶ Ca sá'ogue só'maq qomyipi liỹaatac so Jacob na' ỹovi' queda Egipto. Chaqai sá'ogue chi lalamaxaret ỹovi' sesenta y seis ỹalliripi, qam se qanaloqojna'oga ana loua so llaalqaipi.

²⁷ Ca dooso' sauá'maq llaalqa so José ne'xaira'ñi yi Egipto. Ca' setenta só'maq qomyipi ỹovi'o' na'le quiyi Egipto queso llaalqaipi so Jacob.

²⁸ Na' saqa' ỹovi' so Jacob, ca ỹa'auaxan so Judá quiyim quepegue' so José, qaiyi qoyica'guit quiyi 'laua Gosén. Ca na' ỹovijta yi Gosén,

²⁹ ca' so José relaataxanlec aso lahi' nahoglena, ma' ỹahotaque ca'guit so leta'a. Ca na' ỹovichiguit so leta'a, ca' nqa'aalliguit. Ca shi'gom noỹentac huaqatalec na lallaac.

³⁰ Co'na'le, ca 'naaco' so Israel queso José: —Ime quiyim seuañiraxaua' chaqai quiyim ñaq rca'lli'sauec, ca ¡no'm yileu, 'eno'chaqai!

³¹ Ime, ca' so José 'naaco' quesó'maq novi' chaqai queso liỹa llaalqaipi so leta'a: —Aỹim shicpegue' ca Faraón, sa'ue la'xaỹaxac quiyim mashic novi' na ỹaqaỹaripi ná'maq llaalqaipi ñi ita'a neeta'gue na'le da Canaán, novita ỹim quiyim iuoraripi.

³² Ne'xateta ana lalo qagreta chaqai ana huaca, ma' chi no'ueenataxac reloqota'a quen ana lalo qagreta chaqai ana huaca.

³³ Ca ma' ñi Faraón roỹaxane'ogalo qamiri, ca ma' renachii negue' cá'maq ro'ueenachiguio' quen,

³⁴ ca' qamiri 'ñiỹaco' dá'maq ỹaatqajam qaro'ueenataxanaxac qaidaata da quiyim seloxoiqata'a ana qagreta shinqatam yí'maq 'auaxaic qareta'allipi. Qaiyi shichii ñiỹalec najo 'laua Gosén, ma' na Egipto laseripi se qaỹa'maxariñiguit quiyim lauora na neloxoỹaripi cana qagreta.