Génesis 44 - La'qaatqa ñi qota'olec Qota'olec & Qota'olec Novita Na Qomyipi

Aso ne'taxaqui so José

¹ Co'na' ime dajo, ca' so José 'naapega so neloxoỹaq quiyi la'a': —Ỹoqoiriguilo naua lloxoqui' nauajo ỹale' quecá'ogue cá'maq trigo ishite' i'xate', chaqai aca lame' lli'rañiguilo naua laapi' naua lloxoqui'.

² Chaqai lli'rañigui qai'neeta aca ñi'taxaqui plata aca lloxoqui ñí'maq lqaỹa' paguec noctoqui', liỹaatac aca lam lishiuetenaxanqate quena trigo. Ca' so neloxoỹaq ỹo'uet dá'maq qohinapega queso José.

³ Ca co'na' richilecna, ca' so José ỹaxandec quiyim que' saua lqaỹa' chaqai saua laloo 'ashiñi'.

⁴ Ca saqa' ỹoxe'ueque quiyi na'a' co'na' so José 'naapega so neloxoỹaq quiyi la'a': —Mo'e', cuañira'pe saua ỹale'. Ca ma' vichi', ca 'ñiraco': ¿Chi'negue ma' dá'maq no'uen pilaxachiguit quecá'maq se no'uen? ¿Chi'negue ma' cuachiỹa aca 'taxaqui plata?,

⁵ só'maq ỹaatqajam ne'taxaqui ñi ña'co', chaqai louena quena' ỹahotaque ra'iuec canchaqaica. ¡Qamiri ỹaatqajam se ỹa'maxañi dá'maq 'ñii'tegue!

⁶ Qam co'na' qaỹoviralgoto queso nelaatec, ca liỹa ỹa'xat dá'maq qohinapega.

⁷ Ca saua'maxare 'neraco': —¿Chi'negue ma' 'ñirac dajo coqomi'? ¡Qomi' qaica ma' so'ueetaq quet dajo!

⁸ Ma' qomi' sachigoxosqota'gue da Canaán, yapilaxataq aca qodam seuanqajlec quena laapi' naua qochoxoqui'. Ca ¿chi'negue queta' socachaxa quet ca plata chaqai ca ne'óro quiyi la'a' ñi na'coochi'?

⁹ Ca no'uen quiyim qaỹalauat canchaqaica quenauajo relaataxahi' quecá'maq qaiuanalec hueeto'ot cajo 'taxaqui, vire'talo qomi' qai'neeta qomi' relaataxahi' ma'le.

¹⁰ Ca' só'maq neloxoỹaq quiyi na'a' 'naaco': —Hua', ca chaqaida dá'maq 'ñiỹac qohine'tegue ma'le. Qam qaicaata cá'maq hueeto'ot aca 'taxaqui, ca' chaqaica ỹa'ac ma'le. Ca ná'maq liỹaripi, ca' qaica ca lasauaxaset.

¹¹ Ca chaqa'ma' quiñi 'óna naqajñi aca lloxoqui quena 'laua. Ca' qaỹauajñigui.

¹² Ca só'maq nelaatec idaanaque caca lloxoqui quiñi 'óna, ỹa'auaxanta só'maq paguec ỹi, chi ỹovireta'a só'maq paguec na'aasa. Ca ỹanata aso 'taxaqui caso lloxoqui so Benjamín.

¹³ Ca saua'maxare quiñi 'óna nasectaqta'ahi naua loho paguec nqui'ic. Ca na' ime, ca quiñi 'óna inaxashiguim ca li'ỹaac queca lalo 'ashin, ca pilda'a yi na'a'.

¹⁴ Ca co'na' so Judá chaqai saua lqaỹa' ỹovirera'a yi la'a' so José, ca so'maxare ñaqai neeta'anyi. Ca ỹa'chi'iñi naua le'cootal, ỹoviraqtera'guit naua lataapi' na 'laua.

¹⁵ Ca' so José 'naaco' quesaua'maxare: —¿Negue' cá'maq 'neeto' dá'maq 'viichii? ¿Sqa 'yiiñiỹo' queca ỹale 'nejem aỹim ỹa'den quiyim 'ec ra'ỹaauec ca liỹa?

¹⁶ Ca' so Judá 'naaco': —¿Negue' queto' cá'maq shinqac caqami'? ¿Negue' queto' ca se'guenaxague? Ma' ñi qota'olec mashic ỹauajlec da qarasauaxaset. Ca' nagui ñañaanaq quiyim qomi' relaataxahi', qariỹaataho dá'maq hueeto'ot aso ne'taxagui'i'.

¹⁷ Qam so José 'naaco': —'E', qaidaata dá'maq hueeto'ot aso ñi'taxaqui no'ueenañi, ca ỹa'ac. Ca na liỹaripi, ca pil queca la'a' ca leta'a. Qaica cá'maq quepaxat.

So Judá ne'xoresene'tot so José queso Benjamín

¹⁸ Co'na'le, ca' so Judá nqo'not so José, ca 'naaco': —Ỹim ñi'xoresene'tot, qami' qara'gaxala', quiyim 'maxariñi' 'ue ca sa'xat caqami' ñimoote'tot. Qam qouaquiric, sqai 'o'iriua', ma' qami' chaqai 'ec 'ñiisari' ñí'maq Faraón.

¹⁹ Qami' na'le qarenachi' quiyim 'ue ca qareta'a, loqo'm ca liỹa qarqaỹa.

²⁰ Ca qomi' shinqac quiyim 'ue ca qareta'a, qam mashic qo'xoỹom, chaqai 'ue ca qarqaỹa ñaqai noctoqui'. Ca'maxare ne'qaañi na' mashic qo'xoic ñi qareta'a. Chaqai qai'neeta shinqac ñi qareta'a ỹaatqajam lauochaxat, ma' qaiñiita no'ueeno'ot cá'ogue acá'maq late'e', ma' cá'maq liỹa lqaỹa ileu.

²¹ Ca na'le, ca' qarashiila'e' quiyim ñauegaq, ma' vi'saque huañita.

²² Ca qomi' shinqac na'le quiyim ñi ne'nec se ishit ca'e ñi leta'a, ma' no'm ca'e, ca' ileu ñí'maq leta'a.

²³ Qam qami' 'ñirac quiyim se ñauegaq, ca totqai daañichiguita qomi'.

²⁴ Ca na' sovitaxa ca qareta'a, ca sa'qaataxanaxa quedá'ogue dá'maq 'ñirac na'le coqomi'.

²⁵ Ca' na'le ca qarela' ñi qareta'a quiyim ñanaxaquena, liỹa seshiujnaxanqaque na trigo.

²⁶ Qam qomi' shinqac quiyim se seshitaq ñanaguinaq, no'm se qariỹaatac ñi qarqaỹa na'aasa. Ma' no'm sqai eec ñi'maxare, ca' se ñiuanaxa'e' qami'.

²⁷ Ca' ñi qareta'a 'naac coqomi': Qamiri 'yiiñita quiyim doosolqai' naua ỹaalqa caso ỹoua.

²⁸ So 'óna mashic shi'gue ỹoxogue, ca' chaqaica vigui, ca' tot seuana. Ỹaatqajam llic quiyim 'uo' ca isecỹac ito.

²⁹ Ca no'm 'xachii ñi liỹa ỹaalec quenajo, ca 'ue ca lo'maxaset, ca' qamiri rasauaxashichii quiyim najo qo'xoicolec ileu, ỹalauat ca lachicoxo.

³⁰ Ca' da nachaalataxac ñi qareta'a ỹaatqajam na'deeta'guit da nachaalataxac ñi ne'nec. Ca' ñi ne'nec no'm sqa riỹaatac ma' soviraq,

³¹ ca' ca qareta'a ileu ma' se iuana. Ca' qomi' qarasauaxaset quiyim ñi qo'xoỹom qareta'a ileu, ỹalauat ca lachicoxo.

³² Ỹim shinac na'le queca qareta'a quiyim ỹim seloqota'a ñi ne'nec. Chaqai qai'neeta shinac: No'm se yapilaxat da'maxare quenajo, ca ỹasauaxaset nqai'ñi'. Qam cajo ỹasauaxaset sqaica ca lqodoc, chi ỹovireta'a ca lqodoc aca ỹaqauaxaqui.

³³ Vichiguiño' ñi'xoresene'tot qami' quiyim ỹim yo'ueenañi, ỹim ra'aqui', ñigui aỹim ñí'maq ne'nec. Ca ñi'maxare 'xañirec quiyim pil, liỹareta'pe yaua lqaỹa'.

³⁴ Ma' ¿negue' quet cá'maq 'neeta quiyim sopil, sopila ca ita'a, no'm se iỹaatac dá'maq ne'nec? Se sa'maxaren quiyim seuantalec ca le'xoric ca ita'a.