Génesis 33 - La'qaatqa ñi qota'olec Qota'olec & Qota'olec Novita Na Qomyipi

So Jacob liỹa niñiiquishiñiguit so Esaú

¹ Ca co'na' so Jacob idaana'guit quiyim so Esaú liỹaatac so cuatrocientos qomyipi, ca' iuagaxachigui so ñaaqaipioqui' quesaua Lea, Raquel, chaqai saua dos la'a.

² Ca' ỹa'auaxansauec saua la'a chaqai so llaalqaipioqui'. Ime, ca' lotqai aso Lea chaqai so llaalqaipioqui'. Ca' co'uaataxanta nqai'en aso Raquel chaqai so llaalec José.

³ Ime, ca' so Jacob 'auetauec quesaua'maxare. Ime, ca ỹa'chi'iñi naua le'cootal, ni'iiñi siete ỹoviraqta'guit na latap na 'laua nqai'en, chi ỹovireta'a na' tot qoỹoxoguit so lopiichi.

⁴ Qam so Esaú ni'guinshiguim, queeta'guit. Ca na' ỹovichiguit, ca' qa'aalegue na lqosot, ca' nqo'goq, ca' saua'que noỹene'.

⁵ Ca na' ime, ca' so Esaú ra'ỹauguilo saua 'aalo chaqai so ñaaqaipioqui'. Ca' renataxano': —Qam nauajo ¿negue' naua'maxare? Ca 'naaco' so Jacob: —Chaqainaua nauá'maq ỹaalqa ỹaanema ñi qota'olec najo relaachiqui'.

⁶ Co'na'le, ca' saua la'a chaqai so llaalqaipioqui' nqo'neuo, ca ni'i'iñi, ỹoviraqtera'guita naua lataapi' na 'laua.

⁷ Ime, ca lotqai nqo'neuo aso Lea chaqai so llaalqaipioqui', ca nqai'qui'iñi qaidaata 'neetetegue. Ca' co'uaataxante' nqo'nero saua José chaqai aso late'e Raquel, ca' qaidaata 'neetetegue nqai'qui'iñi.

⁸ Co'na'le, ca' renataxano' so Esaú: —¿Negue' ca vi'saque 'viichi' quesó'taq iseripi sauareta'piguit? Ca' so Jacob 'naaco': —Sahotaque quiyim yi'xoriñi'.

⁹ Ca 'naaco' so Esaú: —'E', qami' ỹaqaỹoolec, naloosañi yauá'maq iloo, yi le'neetari' ná'maq qalo'e'ipi.

¹⁰ Qam so Jacob 'ue da lepagaxallic piltalec da la'qaatec, 'naaco': —'E', qouaquiric. No'm chaqaiyi quiyim yi'xoriñi', ca' 'maxaraic quiyim coñichiguit na ỹame. Ma' quiyim seuañiraxaua' shiiquiaxam seuana ñi qota'olec, ma' mashic quira'guit aỹim.

¹¹ Vichiguiño' 'ue da ipagaxallic quiyim coñichiguit ná'maq ỹame ñoda'a qami', ma' ñi qota'olec chicqo'ot da quiyim ỹim nesallaxanec, ca' qaica ca souentaque. Ca' so Jacob ỹaatqajam 'ue da lepagaxallic, vire'ta na' so Esaú icoñiguit so neme.

¹² Qam 'naaco': —Hua', qam qolqa'e najo, ỹim sa'aueto' caqami'.

¹³ Qam so Jacob 'naaco' queso'maxare: —Qami' ỹaqaỹoolec, qami' 'yiiñite' na ñaaqaipioqui' qaica ca lquesaxanaxa chaqai ¿negue' quet ca shinta'gue ana qagretaipi chaqai ana huaca 'ue na llaalqaipioqui'? Ca no'm isot queca 'oonoqui' na'xa'a sqoue nilliviñi ná'ogue ana qagreta.

¹⁴ Paguec la'maxa quiyim 'avite' quenajo relaachiqui'. Ca' ỹim chi ñqo'neeta'co'da ma'le, ñimootaxanta na iseripi scoỹaretalec chaqai na ñaaqaipioqui', vire'to' ma' ñiuanaqta' quiyi Seir.

¹⁵ Ca' so Esaú 'naaco': —'Maxariñite' quiyim 'vii caua ño'ueenaqterañi quena ỹalliripi ñauequeta'pegue'. Qam so Jacob 'naaco': —'E', yi nalootañi dá'maq rquelolaxa'e'.

¹⁶ Ca' chaqaisoota sojo na'xa'a, ca' so Esaú pilegue da Seir.

¹⁷ Qam so Jacob taigue da Sucot. Ca' quiyi, ca' ỹo'uet cá'maq chi la'a', chaqai cá'maq chi ỹa'daañi lopele' so laloipi. Vichiguiño' yijo 'laua qoỹanco' leenaxat Sucot, loqo'm 'imec na'daañi.

¹⁸ Ca co'na' so Jacob chicqota'gue da Padan-aram ỹaatqajam no'uenta sqaica nqaida na' ỹovita yi 'laua Canaán. Ca' na'ñi yi naloote'oga yi na'a' leenaxat Siquem.

¹⁹ Ca' rishiujnaxana so 'laua na'laua saua llaalqa so Hamor, só'maq leta'a so Siquem. Ca' aso laseuete sojo 'laua ỹovi' cien chiróla. Ca' ỹana'anyi so ỹa'yiñi lopele'.

²⁰ Ime, ca' ỹo'uet aso lcopatoxonaxalate quiyim nqouagaxain, ca' ỹanegue leenaxat Ñi qota'olec chaqaiñi ñí'maq qota'olec caỹim Israel.