Génesis 29 - La'qaatqa ñi qota'olec Qota'olec & Qota'olec Novita Na Qomyipi

So Jacob neeta'ñi yi Harán

¹ Ca' lotqai eec so Jacob, quepegue' yi na'laua na lqodoigueseripi.

² Ca' queso no'ueenaxa iuano' aso ni'ỹa, ca quiyí'maq sqoỹoqaque, ca' nco'matesapeguec saua tres lomaate' aso nelo qagreta, ma' ne'taqa'o' quen yi'maxare so iseripi. Ca' aso ni'ỹa 'uo' so lapooque' qa' lodegaxat.

³ Ca co'quena' sá'ogue so iseripi lapoỹata' quiyi'maxare, ca' so neloxoỹaripi naqato' quen so qa', ca' ne'taxan ana qagreta. Ca co'quena' ime, ca lotqai ỹapo'ñigui aso ni'ỹa.

⁴ Ca' so Jacob inato' so neloxoỹaripi: —¿Negue' cá'maq ñiỹa'gue? Ca saua'maxare 'neraco': —Senqa'ñi yi Harán.

⁵ Ca lotqai liỹo' renataxan, 'naaco': —¿Tegue' chaqai huañiỹapega ca leenaxat Labán, llaalec ca Nacor? —Ajá'a, qareuanatec —'neraco' saua'maxare.

⁶ Lotqai 'naaco' so Jacob: —¿Ỹa'maqatari' ca Labán? —Ajá'a, ỹa'maqatari' —'neraco' saua neloxoỹa'—. 'Ajñi', 'ana ana llaale Raquel no'deetaxasom na lalo qagretaipi.

⁷ Co'na'le, ca 'naaco' so Jacob: —Ñaq noỹoqshi'mgom añi ra'aasa quiyim qaỹapou'a na qagretaipi. ¿Chi'negue ma' sqai chaqai qane'taxan, ca lotqai liỹa qaiqui'ỹaxanec?

⁸ Qam saua'maxare 'neraco': —Se seshitaq so'ueetaq dajo. Ta'ta'a quiyim ñauaanqaque quiyim lapoỹata' ná'ogue na qagretaipi chaqai na neloxoỹaripi. Ca' naqat ñi qa' lapooque' añi ni'ỹa, qaiyi seshitaq ñi'taxanaq na qagretaipi.

⁹ Ca co'na' so Jacob ñaq retaqata'pegueto saua'maxare, ca' aso Raquel noviraxataxasom so qagretaipi laloipi so leta'a, ma' aso'maxare neloxoỹaxa.

¹⁰ Ca co'na' so Jacob iuañi'chiguit aso lalo qagretaipi so neteesqo' Labán, ca chaqa'ma' naqat so qa' lapooque' aso ni'ỹa, ca' ne'taxan so qagretaipi.

¹¹ Ime, ca' iquin chaqai nqo'goq, ca' noỹentac.

¹² Ca co'na' so Jacob ỹa'xat quiyim so'maxare llaalec aso Rebeca chaqai leteesec so Labán, ca' aso Raquel queho ne'guenta ra'qaataxana so leta'a.

¹³ Ca' so Labán co'na' 'xaỹaque qaỹa'xat so Jacob só'maq llaalec aso lqaỹa, ca' ne'guenta ca'guit, ca nqa'aalliguit, iquin, ca' nqo'goq, ca' ỹauego queca la'a'. Ca na' ime, ca' so Jacob ỹa'xat dá'ogue dá'maq 'neeto' na'le.

¹⁴ Ca' so Labán 'naaco': —Ỹaatqajam llic quiyim qami' ỹalamaxaret ỹaalec. So Jacob mashic ỹovi'o' 'óna shiraigo neeta'ñi yi la'a' so Labán.

So Jacob ro'ueenataxan ỹahinlec aso Raquel chaqai aso Lea

¹⁵ Ca co'na' mashic ỹovirerec sauajo na'xata', ca' so Labán 'naaco' queso'maxare: —Se ỹa'maxañi quiyim chaqai 'ueenataxañi'sac quiyim qami' iteesec, qam qaca aca ravigui'i'. Ca' ỹaxañiraque ỹote' acá'maq nishivichi'i'.

¹⁶ So Labán 'vio' saua dos llaale: asó'maq 'auaxai llaale leenaxat Lea, ca' aso lano'o leenaxato' Raquel.

¹⁷ Aso Lea lo'yaxanqa nqote', qam aso Raquel ỹaatqajam sá'ogue lo'yaxana.

¹⁸ Ca' so Jacob ma' mashic nqo'ta aso Raquel, ca 'naaco': —Ỹim so'ueenataxanot qami' quenaua siete ñaxari cañi qachaalli'i' na'aasa Raquel.

¹⁹ Co'na'le, ca' so Labán 'naaco': —Paguec la'maxa quiyim saanem qami' quiyim saanem quet ca ỹoqa'a ca chicqa'gue. 'Ueenataxañitot aỹim.

²⁰ Ca' so Jacob ro'ueenataxan ỹahinlec aso Raquel quesaua siete ñaxari. Ca queso'maxare 'ec sqo vite', ma' paguec da lqo'iichi caso'maxare.

²¹ Ca co'na' ime' saua siete ñaxari, ca' so Jacob 'naaco' queso Labán: —Nañaañi' aca ỹoua, qaiyi so'ñiguit, ma' mashic ime' sauá'maq ỹaloqojonqa quiyim so'ueenataxanlec aca'maxare.

²² Ca co'na'le, ca' so Labán ỹa'ue la'xaỹaxac ỹaltac so la'aayaxauaripi quiyim ỹo'uet so shilaq.

²³ Qam queca pe, ca' so Labán ỹauega'a so Jacob aso Lea. Ca' so Jacob lapa'ñi' aso'maxare.

²⁴ Chaqai qai'neeta so Labán ỹaanem aso Lea aso lelaata leenaxat Zilpa, qaiyi cochiỹa aso'maxare.

²⁵ Ca' na' richiguiñi queso liỹa na'xa'a, ca' so Jacob ỹa'den quiyim so'maxare lapaata'ñi' aso Lea. Ca 'naaco' queso Labán: —¿Negue' cá'maq 'neeto' dá'maq 'ñitetegue aỹim? ¿Mesqai so'ueenataxanot qami' sahinteguelec ada Raquel? Ca' ¿chi'neco' ma' yayiñi'?

²⁶ Ca' so Labán 'naaco' queso'maxare: —Qomi' quenajo se qaranatec dajo quiyim saanaxauec 'au 'on quet acá'maq na'aasa cacá'maq ỹi.

²⁷ Pacqajñichiriguilo viraqchiterec naua siete na'xata' ro'naxaquichi' cada Lea. Ca ma'le, ca' saanqairaxarom añi Raquel qai'neeta, no'm 'ỹaañirec ca ra'qaachiqui' quiyim 'ueenataxañitot aỹim quecaua liỹa' siete ñaxari.

²⁸ Ca' so Jacob saachiguit da na'qaatec. Ca co'na' ime'ueque saua siete na'xata' lo'naxaqui' caso Lea, ca' so Labán ỹaanem aso Raquel quiyim loua.

²⁹ Ca' so Labán ỹaanem qai'neeta aso Raquel aso liỹa lelaata leenaxat Bilha, qaiyi cochiỹa aso'maxare.

³⁰ Ca' so Jacob o'ñiguit qai'neeta aso Raquel, ca' paguec nqo'ta caso Lea, 'eno'm liỹa ro'ueenataxanot so Labán quecaua liỹa' siete ñaxari.

So llaalqaipi so Jacob

³¹ Ca co'na' ñi qara'gaxala' iuana quiyim so Jacob se nqo'ta aso Lea, ca ỹo'uet quiyim aso'maxare 'ue so llaalqaipi, qam aso Raquel se co'o nqai'en.

³² Ca' aso Lea 'man, ca 'ue so llaalec só'maq ỹanegue leenaxat Rubén, loqo'm 'anta ỹaalec, ma' 'naaco': —Ñi qara'gaxala' iuana da ỹachicoxo, ca vichiguiño' nagui nqo'chiiua' ñi ỹoua ma'le.

³³ Ca na' ime, ca aso Lea 'ue so liỹa llaalec, ca ỹanco' leenaxat Simeón, loqo'm ñi'maxare 'qaa. Ca 'naaco': —Ñi qara'gaxala' iuana quiyim se qanqo'chiiua', ca vichiguiño' ỹa'ue ñi liỹa ỹaalec.

³⁴ Ca lotqai 'uo' so liỹa llaalec, ca' ỹanco' leenaxat Leví, loqo'm 'chiñi, ma' 'naaco': —Ca' nagui, ca' ñi ỹoua paguec nqo'ñiguit aỹim ma'le, ma' mashic tres naua llaalqa caỹim.

³⁵ Ca' aso Lea qaiyiita 'uo' so liỹa llaalec, ca ỹanco' leenaxat Judá, loqo'm imaqachin, ma' 'naaco': —Ca' nagui, ca' semaqachin ñi qara'gaxala'. Ca co'na' ime dajo, ca' tot co'o.