Génesis 17 - La'qaatqa ñi qota'olec Qota'olec & Qota'olec Novita Na Qomyipi

Da netanec na noshicmaxa netanec queda 'maqataxac

¹ Ca co'na' so Abram ỹovite' saua noventa y nueve ñaxari, ca' ñi qara'gaxala' nachaxana so'maxare. Ca 'naaco': —Ỹim ná'maq qota'olec sqaica lqalanec; 'neeto' napio'xochi' da nachaalataxaqui' quiyim ñiiso'ot aỹim.

² Ca' ỹim so'uet nagui da ña'maqataxac caqami': ỹaatqajam 'xoic ma'le ca qachaalaxai'pi.

³ Ca' so Abram ni'iiñi, ỹoviraqta'guit na latap na 'laua co'na' ñaq retaqatac ñi qota'olec, 'naaco':

⁴ —Da ña'maqataxac nagui caqami' 'neetasa': Qami' leta'a ma'le ná'ogue na ỹoreta'oguit qomyipi,

⁵ chaqai tot qadeenaxachi' nagui Abram, neta'a nemaqajnatec. Nagui ca qadeenaxachi'o' Abraham, leta'a na 'xoic qomyipi, ma' ỹim so'uet ma'le quiyim qami' leta'a na ỹoreta'oguit qomyipi.

⁶ Ỹim so'uet ma'le quiyim 'xoic ca qachaalaxai'pi; chicqaugui ma'le qami' ca nashillipi chaqai na ỹoreta'oguit qomyipi.

⁷ Dá'maq ña'maqataxac caqami' chaqai quecá'ogue ca qachaalaxai'pi ma'le quiyim chaqai 'neetari' ỹim qota'olec caqami' chaqai ỹim nqota'olec cá'maq qachaalaxai'pi.

⁸ Ca' qami' chaqai ca qachaalaxai'pi saanem ma'le ná'ogue najo 'laua Canaán ná'maq ñi'salec nagui. Ca' ỹaatqajam ralamaxarichii ra'aari, ca ỹim ná'maq ỹim qota'olec ma'le caqamiri.

⁹ Ñi qota'olec 'naaco' qai'neeta queso Abraham: —Qam qami' machichirigui da qana'maqataxac, qami' chaqai ná'ogue na qachaalaxai'pi.

¹⁰ Dajo dá'maq ña'maqataxac caqamiri, ca pacqajñichigui qamiá'ogue: quiyim ná'ogue na ỹalliripi qaỹo'uet ca netanec na loshicmaxa.

¹¹ Ca' quiñi 'óna caqamiri qanichaxauec na no'lo loshicmaxa, ca' chaqaida dajo dá'maq netanec queda qana'maqataxac, ỹim chaqai caqamiri.

¹² Ca' nagui taachi'ñi quiyim ná'ogue na ỹale caqamiri qanaqat na no'lo loshicmaxa ma' ỹovite' ocho na'xata' quiyim ne'qaañi. Chaqai qai'neeta ca noctoqui' ne'xaỹaugui na na'aquipi, chaqai na nishiujnaxanaxat qaỹachigoxota'a ca ỹoqa'a 'laua.

¹³ Ca' sqaica ma' 'ue quet ca sqaica ca netanaxaset na loshicmaxa, qaiyi da netanec da ña'maqataxac re'qoota quena roshicmaxahi, ỹovireta'a ca lqodoc ca nachaalataxac.

¹⁴ Qam cá'maq sqaica ca netanec quena loshicmaxa, ca' se ishit neetauguilo qamiri, ma' napacalec da qana'maqataxac.

¹⁵ Ñi qota'olec 'naaco' qai'neeta queso Abraham: —Añi roua'e' totqai leenaxat nagui da Sarai. Ca' nagui, ca' leenaxato' Sara.

¹⁶ Ỹaatqajam yqouaguegue añi'maxare, ca' sa'ue ca qachaalqui' chicqochigui nqaishin añi'maxare. Ajá'a, ỹaatqajam yqouaguegue ma'le. Ca añi'maxare late'e ma'le na ỹoreta'oguit qomyipi, chaqai ca llaalqaipi nashillipi ma'le quena ỹoreta'oguit qomyipi.

¹⁷ Ca' so Abraham nqai'guiñi, ỹoviraqta'guit na latap na 'laua. Ca' raỹaleguere co'na' ỹa'deene'ta: Ca ỹale ỹovite' caua cien ñaxari, ¿peeta'a ishito' quiyim neta'a? Chaqai añi Sara, ¿ishito' 'ue ca llaalec quiyim mashic ỹovite' noventa ñaxari?

¹⁸ Ca so'maxare 'naaco' quiñi qota'olec: —¡Paguec la'maxa quiyim chaqaiñi quet ñi Ismael ñi taalec quet ca rqouagaxa'e'!

¹⁹ Ca' ñi qota'olec 'naaco' queso'maxare: —Qalaxam mashic shinac quiyim añi Sara 'ue ma'le ca llaalec, ca' ỹañitegue ma'le leenaxat Isaac, loqo'm raỹaleguere. Ca' queca'maxare, ca' se'taxajñi ma'le da ña'maqataxac. Ca sqaica lqodoc nqaishin ño'qoochiguiñi queca llaalqaipi.

²⁰ Chaqai quiñi Ismael ñí'maq sa'xaỹa'pegue caqami', ca' qai'neeta yqouaguegue. Ca' ỹim so'uet quiyim 'xoic ca llaalqaipi chaqai quiyim nqo'neuec ca llaalqaipi. Ca' ñi Ismael leta'a ma'le caua doce 'xoic lecaic nashillipi, chaqai chicqochigui nqaishin ca ỹaatqajam 'xoic qomyipi.

²¹ Qam da ña'maqataxac se'taxajñi ma'le ca Isaac ca llaalec añi Sara 'ue ma'le ma' ime na ñaaxa.

²² Ca co'na' ỹomat da ỹa'xatetac ñi qota'olec queso Abraham, ca' eec, ca'e yi'maxare.

²³ Ca' chaqaiso sojo na'xa'a, ca' so Abraham ỹa'ue so netanec na loshicmaxa so llaalec Ismael; chaqai qai'neeta ỹo'uet na netanec na loshicmaxa sá'ogue so lelaatqaipi só'maq ne'xaỹa'ñi yi la'a', chaqai ná'maq lishiujnaxanqateripi qomyipi. Chaqai sá'ogue só'maq ỹalliripi ro'ueenataxantac neeta'ñi yi la'a' qaỹa'ue na netanec na loshicmaxa, ma' chaqaido' dá'maq lelaataxanaxac na'le ñi qota'olec.

^24-25 So Abraham ỹovito'o' saua noventa y nueve ñaxari, chaqai so llaalec Ismael ỹovite' trece co'na' qaỹa'ue so netanec na loshicmaxa.

²⁶ Chaqaisoota sojo na'xa'a co'na' so Abraham chaqai so llaalec Ismael qaỹo'uet na netanaxasete' naua loshicma',

²⁷ chaqai sá'ogue so ỹalliripi neeta'ñi yi la'a', chaqai qai'neeta so lelaatqaipi ne'xaỹa'ñi yi la'a', chaqai ná'maq ỹoqa'a ca chicqa'gue nishiujnaxanaxat.