Génesis 14 - La'qaatqa ñi qota'olec Qota'olec & Qota'olec Novita Na Qomyipi

So Abram nca'laxatec so Lot

¹ Ca' quesauajo na'xata' ñaq nashi so Amrafel quiyi Sinar, ca' so Arioc lashi na neeta'ñi yi Elasar, ca' so Quedorlaomer lashi na neeta'ñi yi Elam, chaqai so Tidal nashi na'le quena neeta'ñi yi Goim.

² Najo nashillipi nalauateta'pegue' so nashi leenaxat Bera, nashi na'ñi yi Sodoma, chaqai so Birsa nashi quiyi Gomorra, chaqai so Sinab nashi quiyi Adma, chaqai so Semeber nashi quiyi Zeboim, chaqai so nashi quiyi Bela yijo na'a' leenaxat liỹa da Zoar.

³ Sojo cinco nashillipi lapoỹata' notauanta' nqai'en so nalliripi. Ca lapoỹata' queso ca'megue yí'maq hua'ñi nagui aso huaaxai leenaxat Huaaxai Leuaxai.

⁴ So nashi Quedorlaomer mashic ỹovi' doce ñaxari quiyim ỹoiquentac sá'ogue so'maxare. Qam co'na' ỹovi' trece ñaxari, ca' saua cinco nashil na'deenta' quiyim nalauatere'e' so'maxare.

⁵ Ca' queso liỹa ñaaxa so Quedorlaomer chaqai saua lqoshaxaua' liỹa' nashil, saua'maxare querepegue' yi 'laua leenaxat Astarot Karnaim. Ca' yí, hua'ñi na' qaiuagaxatac so refaíta laseripi. Ime, ca qaiuagaxatac so zuzita laseripi quiyi Ham, ca' so emita laseripi qaiuagaxatac quiyi Save-quiriataim.

⁶ Chaqai so horeo laseripi qaiuagaxatac hua'ñi yi qoỹoqoshi'megue 'laua leenaxat Seir, chaqai qaỹocantac qaỹoviraqta'a yi 'laua leenaxat Parán, huaqate'e' yi 'laua qaica qom.

⁷ Ca co'na' mashic rapil so Quedorlaomer, ca sauá'maq liỹareta'pe so'maxare na' ỹovirera'a yi En-mispat chaqai qai'neeta leenaxat Cade. Ca' nopoxoỹaxajñi ná'ogue ná'maq quejlec quiyi na'laua na amalecita laseripi chaqai chaqaida 'ne'tegue queso amorreo laseripi neetalec yi 'laua leenaxat Hazezon-tamar.

^8-9 Co'na'le, ca' so nashillipi quiyi Sodoma chaqai yi Gomorra, Adma, Zeboim, chaqai so Bela querepegue' yi ca'megue leenaxat Sidim. Ca' quiyi saua cinco nashil nalauatere'e' so Quedorlaomer, Tidal, Amrafel chaqai so Arioc, sauajo cuatro nashil quiyi Elam, Goim, Sinar chaqai yi Elasar.

¹⁰ Chaqai quesá'ogue so ca'megue leenaxat Sidim 'xoic ana tema lahi' na 'ec qo'paq louaq. Ca co'na' saua nashil quiyi Sodoma chaqai Gomorra ỹahosaque 'eete' queso lauataq, ca taari'ñigui ana tema, ca' saua liỹa' nashil 'eete' querepegue' yi qoỹoqoshi'megue 'laua.

¹¹ Ca' so qomyipi doxonaxan, ca i'xat ná'ogue nanchaqaina na'ic chaqai na no'uen nouenec quiyi Sodoma chaqai yi Gomorra. Ca' ca'e yi'maxare.

¹² Ca ma' neeta'ño' yi Sodoma so leteesec so Abram leenaxat Lot, ca so'maxare qai'neeta qai'xat noxonec chaqai sá'ogue so na'aateteripi.

¹³ Qam 'uo' so ỹale ñitec, ca eec quepegue' so hebreo le'ec, leenaxat Abram, neeta'ñi yi 'xoic ana qo'paq leenaxat encina, lalamaxaret so Mamre, so amorreo le'ec. So Mamre lqaỹo' so Escol chaqai Aner, ca saua'maxare chi lotaua' so Abram.

¹⁴ Ca co'na' ỹa'den so Abram quiyim so leteesec qai'neeta qai'xat ncoñiiteguesec, ca' lapoonta' so llaqainatqaipi 'uo' ca trescientos dieciocho qomyipi quiyim sá'ogue. Ca liỹaaterec co'uaaterelec so nashillipi, chi ỹovireta'a yi na'a' leenaxat Dan.

¹⁵ Ca co'na' mashic pe, ca' so Abram chaqai so nalliripi i'laxatejlec quiyim nalauate'e' so nashillipi. Ca' ỹocanac ỹoviraqta'a yi Hoba pa'a'gue da rapiguim quiyi na'a' lodegaxat Damasco.

¹⁶ Ca' qanouora'gue sá'ogue só'maq i'xato' na'le. Ca' da 'neeto' na'le so Abram, ca' rapilaxat so Lot chaqai sá'ogue só'maq louenqaipi so leteesec. Chaqai rapilaxat so 'aallipi chaqai so liỹa qomyipi.

So Melquisedec ỹaanem da no'uen llicyaxac so Abram

¹⁷ Ca co'na' rapil so Abram na' ime loxonec so Quedorlaomer chaqai saua nashil lqoshaxaua', ca' so nashi quiyi Sodoma ca'guit quiyi ca'megue Save, yí'maq liỹa leenaxat nashi nca'megue.

¹⁸ Qai'neeta so Melquisedec, so'maxare nashi quiyi Salem chaqai letaxaỹaxanqajnec na qomyipi quena' qaretaxaỹa'pegue' ñí'maq qaica 'nejem qota'olec, so'maxare naueguec so pan chaqai so lataxa.

¹⁹ Ime, ca' ỹaanem da no'uen llicyaxac so Abram, 'naaco': Ỹaanem qami' ca no'uen qayicyaxaqui' ñí'maq qaica 'nejem qota'olec, lo'ueenatec na piguim chaqai na 'laua;

²⁰ chaqai ỹaatqajam qaimaqachin ñí'maq qaica 'nejem qota'olec, ñí'maq ỹo'uet quiyim qadoxonqui' so npa'guenaxaua'e'. Ca' so Abram ỹaanem so Melquisedec quesá'ogue so louootaxanaxat naqata'a añi 'oono'lli' quecaua diez.

²¹ Ca co'na' ime, ca 'naaco' so nashi quiyi Sodoma queso Abram: —Nañaañirim na qomyipi, ca' coñita na nouenqaipi.

²² Qam so Abram 'naaco': —Ỹaatqajam saanot da ỹa'qaatec ñi ỹa'gaxala' ñí'maq qaica 'nejem qota'olec, lo'ueenatec na 'laua chaqai na piguim,

²³ quiyim aỹim qaica ca secona quená'maq qatooỹaqui', vire'ta ca 'iloqui', loqo'm ca lequet na ipela', qaiyi sqai 'ñirac quiyim qami' chicqo'ot ca isallaxa.

²⁴ Ỹim qaica ca secona, ta'ta'a cá'maq mashic qo'gue' naua ỹaqainatqa. Ca nauá'maq ỹale' yotauansac, Aner, Escol chaqai ñi Mamre, ca yaua'maxare ca' iconta cá'maq taalgoto.