Génesis 11 - La'qaatqa ñi qota'olec Qota'olec & Qota'olec Novita Na Qomyipi

Aso naue ladocai quiyi na'a' lodegaxat Babel

¹ Ca' quesojo na'xa'a mesqai ỹoricchi naua la'qaatqa ná'ogue na qomyipi.

² Ca co'na' qaỹachicqochi'ñi yi 'laua pa'ỹa'gue da lqodoigue. Ca' qaiuanejlec yi 'laua nalo'ojta' leenaxat Sinar. Ca chaqa'ma' qoyinalec.

³ Ca 'uo' so na'xa'a, ca' retaxaỹata' so qomyipi, 'naaco': —So'ueetaq ca losoc, ca' yatoxotaq, sahoqote'e norec. Ca' quiyi, ca' so qomyipi tot ro'ueenataxana na qa', ta'ta'a ná'maq lo'ueenatec losoc; chaqai na 'ec qo'paq louaq nimiiñiguit nqai'en ná'maq chi qaỹalecqajanta' nishaaxa.

⁴ Co'na' ime, ca 'neraco': —Ñaqai naiquena, ño'xonaxashiguim ca qara'a' lodegaxat chaqai aca qaraue ỹoviro'ot nqaishinaq na piguim, qaiyi qomi' choxoraqa ma'le, ca tot ñiuagaxataxalec ma'le ná'ogue na 'laua.

⁵ Qam ñi qara'gaxala' renotec ỹa'ajan ca na'a' chaqai aso naue ỹo'ueetetac so qomyipi.

⁶ Ca ra'deenataxantaco', ca 'naaco': Na'maxare neuo' laseripi chaqai na'qaachaxauaripi. Ca' vichiguiño' taañi quiyim ro'ueenataxan. Ca' nagui qaica ma' ỹaxanñi quet dá'maq mashic ỹo'uet.

⁷ Ca 'maxaraic quiyim yinotaxauec, ca ỹoricchi nqaishinaxai' naua la'qaatqa, qaiyi mesqai 'xaỹata'.

⁸ Ca chaqaido' da 'ne'tegue na'le ñi qara'gaxala' co'na' neuagaxatac nqai'en so qomyipi quena 'laua. Ca' so qomyipi ỹaxanñi so ỹo'ueetetac na'a'.

⁹ Ca' quesojo 'laua hua'ño' na' ñi qara'gaxala' ỹoỹoota'chi naua la'qaatqa ná'ogue na qomyipi quena 'laua. Ca' quiyi, ca' neuagaxajlec nqai'en ná'ogue na 'laua. Vichiguiño' yijo na'a' lodegaxat leenaxat nqohin sqa 'xaỹata'.

So llaalqaipi so Sem

¹⁰ Ca' najo ná'maq llaalqaipi so Sem, co'na' ỹoxe'uegue so huaxaỹaq lodegaxat nalauajñi so qomyipi. Ca' quesaua dos ñaxari liỹa', ca' so Sem ỹovite' cien ñaxari, ca ne'qaaño' so llaalec leenaxat Arfacsad.

¹¹ Ca co'na' ime dajo, ca' so Sem qaiyiita queuguilo saua quinientos ñaxari liỹa'. Ca' 'vii saua liỹa' llaalqa ỹale' chaqai saua llaale 'aalo.

¹² Ca' so Arfacsad ỹovito'o' saua treinta y cinco ñaxari co'na' ne'qaañi so llaalec Sala.

¹³ Ca co'na' ime dajo, ca' so Arfacsad qaiyiita queuguilo quiyim nca'leetauec saua liỹa' cuatrocientos tres ñaxari, ca' 'vii saua liỹa' llaalqa chaqai saua liỹa' llaale.

¹⁴ Ca' so Sala ỹovito'o' saua treinta ñaxari co'na' ne'qaañi so llaalec Heber.

¹⁵ Co'na' ime dajo, ca' so Sala qaiyiita queuguilo quiyim nca'leetauec saua liỹa' cuatrocientos tres ñaxari, ca' 'vii saua liỹa' llaalqa chaqai saua liỹa' llaale.

¹⁶ Ca' so Heber ỹovito'o' saua treinta y cuatro ñaxari co'na' ne'qaañi so llaalec Peleg.

¹⁷ Ca co'na' ime dajo, ca' so Heber qaiyiita queuguilo quiyim nca'leetauec saua liỹa' cuatrocientos treinta ñaxari, ca' 'vii saua liỹa' llaalqa chaqai saua liỹa' llaale.

¹⁸ Ca' so Peleg ỹovito'o' saua treinta ñaxari co'na' ne'qaañi so llaalec Reu.

¹⁹ Ca co'na' ime dajo, ca' so Peleg qaiyiita queuguilo quiyim nca'leetauec saua liỹa' doscientos nueve ñaxari, ca' 'vio' saua liỹa' llaalqa chaqai saua liỹa' llaale.

²⁰ Ca' so Reu ỹovito'o' saua treinta y dos ñaxari, co'na' ne'qaañi so llaalec Serug.

²¹ Ca co'na' ime dajo, ca' so Reu qaiyiita queuguilo quiyim nca'leetauec saua liỹa' doscientos siete ñaxari, ca 'vii saua liỹa' llaalqa chaqai saua liỹa' llaale.

²² Ca' so Serug ỹovito'o' saua treinta ñaxari, co'na' ne'qaañi so llaalec Nacor.

²³ Ca co'na' ime dajo, ca' so Serug qaiyiita queuguilo quiyim nca'leetauec saua liỹa' doscientos ñaxari, ca 'vio' saua liỹa' llaalqa chaqai saua liỹa' llaale.

²⁴ Ca' so Nacor ỹovito'o' saua veintinueve ñaxari, co'na' ne'qaañi so llaalec Taré.

²⁵ Ca co'na' ime dajo, ca' so Nacor qaiyiita queuguilo quiyim nca'leetauec saua liỹa' ciento diecinueve ñaxari, ca' 'vio' saua liỹa' llaalqa chaqai saua liỹa' llaale.

²⁶ Ca' so Taré ỹovito'o' saua setenta ñaxari, co'na' mashic ne'qa'iñi saua llaalqa Abram, Nacor chaqai so Harán.

So llaalqaipi so Taré

²⁷ Ca' 'ena na llaalqaipi so Taré só'maq leta'a so Abram, Nacor chaqai so Harán. Ca' so Harán chaqaiso' so leta'a so Lot.

²⁸ So'maxare ileuo' na'le hua'ño' yí'maq chi ne'xaỹoqsoqo' 'laua leenaxat Ur huaugui yi 'laua Caldea co'na' saqa' ileu so leta'a Taré.

²⁹ Ca' so Abram o'ñiguit aso Sarai, ca' so Nacor o'ñiguit aso llaale so Harán leenaxat Milca, lqaỹa aso Isca.

³⁰ Ca' aso Sarai sqaica ca llaalec, ma' se co'o.

³¹ Co'na'le, ca' so Taré ca'e yi Ur na'ñi yi caldeo laseripi. Ca' quepegue' yi 'laua Canaán, ỹauec so llaalec Abram, chaqai so laual Lot, chaqai aso late Sarai. Qam co'na' ỹovijta yi na'a' Harán, ca' chaqa'ma' nera'ñi.

³² Ca' so Taré ileuo' na'le quiyi Harán co'na' ỹovite' saua doscientos cinco ñaxari.