Gálatas 5 - La'qaatqa ñi qota'olec Qota'olec & Qota'olec Novita Na Qomyipi

Quiitalec quiyim qaica quepaxate' qamiri

¹ So Cristo ỹosou'alo qomi', qaiyi qaica ca qarquepaxat. Ca' na'ñaxachii quiyim quiitalec quiyim qaica ca rquepaxachii, ca tot liỹa pilliu'a quiyim qamiri quet na'aqa.

² Nagui, ca na'xaỹaxañiua'. Aỹim Pablo shinapegalo qamiri nagui, no'm 'maxariñita quiyim qaỹa'ue ca netanec na roshicmaxahi, ca' qaica ca 'negue nqai'ñii so Cristo.

³ Ca vichiguiño' lotqai liỹa shinac dajo, quiyim canchaqaica qom no'm ỹa'ue ca netanec na loshicmaxa, ca' se ishit quiyim se ipacqajñigui ná'ogue ná'maq lelaataxanaxac so naqataxaquipi chicqo'ot so Moisés.

⁴ Qamiri ma' 'ñiitapega quiyim ỹacoñi'chiguita qamiri ñi qota'a ma' 'viichitac na lelaataxanaxac na naqataxaquipi, ca' noỹoochiuec queso Cristo, chaqai noỹoochiuec queda le'xorenataxanaxa ñi qota'a.

⁵ Ma' qomi' sachigoxotqochigui so Espíritu Santo chaqai da qarpi'ỹaxac, ca' 'ue da qanaquitaxac quiyim icoñi'chiguita qomi' ñi qota'a.

⁶ Chaqai no'm ña'daqatau'a so Cristo Jesús, ca' qaica quet cá'maq 'negue ca qom quiyim 'ue ca netanec na loshicmaxa, loqo'm sqaica. Qam dá'maq paguec 'ue ca 'negue quiyim 'ue ca qarpi'ỹaxac, chaqai quiyim dajo qarpi'ỹaxac ỹo'uet quiyim ñi'xorenaqta'.

⁷ Qamiri ỹaatqajam 'maxaraic dá'maq 'ñiitari' na'le. Qam ¿nega'ỹo' cá'maq ỹo'uet quiyim totqai viilec dá'maq ỹaatqajam lliqueta?

⁸ Dajo se lo'ueenataxanaxac ñi qota'a ñí'maq roỹaxanalo qamiri.

⁹ 'Neeto' lotqai couahi'e quiyim “'eno'm cocho'qui' ca quena pe'taxachigui na pan, qam ishit pe'taxachigui cá'ogue aca naqaulata.”

¹⁰ Qam ỹim 'ue da ñaquitaxac queso qara'gaxala', chaqai caqamiri quiyim mesqai ỹoqa'a nqai'ñii ca ra'deenataxanaxaguii; qam ñi qota'a ỹa'ue ma'le ca nouaxanaxaset cá'maq canchaqaica sqai ỹaxana'pe qamiri.

¹¹ Qamiri ỹaqaỹa', dá'maq 'neeta caỹim, ma' quetqai ñaqai shiqueteguelec quiyim qaỹa'ue ca netanec na loshicmaxa na qom, ca' se yocantac quet nagui na judioipi; ma' queta' 'neeta dajo, ca' dá'maq na'qaatec quet na' qaipateno so Cristo se ro'o quet nqai'en na judioipi.

¹² Qam quená'maq qomyipi sqai ỹaxana'pe qamiri quiyim ỹilenta'pe quiyim 'viichii ca netanaxaset na roshicmaxahi, ¡saxanchi' ná'ogue nichaxaic na chi loshicmaxa, ca' yi!

¹³ Ma' qamiri ỹaqaỹa' na' qaroỹaxanalo qamiri, qam ỹaatqajam qaỹahotaque qarosohiuec. Ta'to'o' no'm se nquipichilec dá'maq quiyim mashic qaỹosoorec qamiri, no'm pacqajñiỹauec quiyim quiita'pegue' da chi no'ueenataxac na qom. Ta'to'o' quiyim npa'xañii quiyim quiñi 'óna la'ac ca liỹa quedá'maq 'ñiitari' quiyim ne'xoriñiỹata'.

¹⁴ Ma' ná'ogue na naqataxaquipi ỹomata'ta' da 'oonoqui' nelaataxanaxac: “Rauochitegue ca riỹa'e', 'nejem qami' quiyim chi nauochiralta'.”

¹⁵ Qam no'm chi na'guiita'ta' qamiri, ca' quiñi 'óna ỹa'ic ca liỹa, ca richilliỹaño', 'ase' no'm 'ec chi nomachitañi na riỹaripi.

Dá'maq chi no'ueenataxac ca qom chaqai dá'maq chaalataxac chicqo'ot so Espíritu

¹⁶ Dá'maq shinac caqamiri 'neetasa': Ỹaatqajam quiita'pegue' so Espíritu Santo, qaiyi sqai quiita'pegue' dá'maq chi no'ueenataxaguii.

¹⁷ Ma' dá'maq chi no'ueenataxac ca qom, ca npa'guente'e' so Espíritu chicqo'ot ñi qota'a, chaqai so Espíritu se icoñiguit ca no'ueenataxac ca chaqai qom. Ma' naua'maxare se neuojonta', vichiguiño' sqai shichii 'viichii cá'maq viitaque.

¹⁸ Qam no'm chaqaiso só'maq Espíritu só'maq ỹashaxanta'pe qamiri, ca totqai viito'ot da lelaataxanaxac na naqataxaquipi.

¹⁹ Ca' sqaica ca lqalaic quiyim qaỹa'den cá'maq ñaqai queeta'pegue' dá'maq chi no'ueenataxac, 'neetasa': lapaatapi'ñi' aca se loua, ỹo'ueetetac na rapio'qotaxan chaqai da lqo'itaxanqachic,

²⁰ chaqai nqouagaxaintacot na nqolaquipi, chaqai 'naxanaxai, chaqai da lauelgaxanaxac, lapetaxanaxac, chaqai da lco'ualaxanaxac, sqo ỹoxo'ña lauel, 'ue da naquitete'e quiyim 'ue ca ỹo'uet, chaqai lapoonta' na qomyipi quiyim ỹoỹoota'chi.

²¹ Na'maxare pa'guenaxanaxai, lauataxanaxai, ne'taaxai, chaqai qui'ỹaaxai, chaqai 'ue na liỹa ỹo'ueetetac 'nejem dajo. Saqatalo qamiri, ma' shi'gue sa'xatetac dajo, quená'maq ñaq ỹo'ueetetac dajo, ca' se inoxona'a da lo'ueenataxanaxac ñi qota'a ma' ỹoiquentac ná'ogue najo.

²² Qam da llaqtaxac so Espíritu Santo queca qom 'neetasa': ne'xorenataxanaxa, toonaxac, na'maxa, neualaxavic, nauotaxanqachic, neuagaxaric, chaqai naqamaxa,

²³ se nemaqajnaxai, chaqai netelalta'. Ca' qaica quet cá'maq naqataxac ishit quepaxate' nauajo.

²⁴ Chaqai ná'maq mashic lalamaxaret so Cristo, shi'gue 'ec pateno na loshicmaxa queso npatenaxala', liỹaatashiguim ná'ogue ná'maq chi lqo'itaxanqachic chaqai ná'maq loiquipi.

²⁵ Ma' dá'maq qanachaalataxac chicqo'ot so Espíritu, ca' qai'neeta saxanqac só'maq Espíritu quiyim qarashaxantac quecá'maq so'ueetaq.

²⁶ Sqai qomi' nemaqajnaxaqa, chaqai mesqai ñapetqata'ta', chaqai mesqai ñpa'guenqata'ta'.