Gálatas 1 - La'qaatqa ñi qota'olec Qota'olec & Qota'olec Novita Na Qomyipi

So Pablo ilata aso lerecse so mashic icoñiguit da na'qaatec na'ñi yi Galacia

¹ Ỹim Pablo, ỹim lelaatec so Jesús. Sqaỹim lelaatec chaqai sqaỹim lca'acsec ca chaqai qomyipi; ta'ta'a quiyim chaqaiso so Jesucristo, chaqai ñi qota'olec ñí'maq liỹa nca'laxatec na'le so'maxare queso nelauaxa.

² Ỹim chaqai ná'ogue na iuoraripi qarqaỹaripi seraxañi anajo qarelaata quiyim tai'a ná'maq mashic icoñiguit da na'qaatec neetalec na 'laua Galacia.

³ Sahotaque quiyim coñiguit da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo,

⁴ só'maq nañaañiguit na'le da lelauaxa sauaxat naua qarasauaxasete', qaiyi nca'laxaterec qomi' quená'ogue na se no'uen huelec na 'laua. Ca' ipacqajanchigui dá'maq ỹahotaque ñi qota'olec coqomi'.

⁵ Ca' vichiguiño' ¡se neme quiyim semaqachinqatac ñi qota'a! Ajá'a, ca' chaqaida dá'maq 'neeta dajo.

Qaica ca liỹa na'qaatec chicqaugui da nca'laxa

⁶ Ỹaatqajam chalego da i'laxa quiyim chita'gue chaqa'ma' sham lachii ñi qota'a, ma' chaqaiñi ñí'maq roỹaxanalo qomi', ỹachigoxochichigui da le'xorenataxanaxa so Cristo coqomi', chaqai quiyim quiita'pegue' dá'maq ỹoqa'a na'qaatec qohinac chicqaugui da nca'laxa.

⁷ Mesqai llic quiyim 'ue quet ca liỹa na'qaatec chicqaugui quet ca nca'laxa. Dá'maq 'neeta ma' 'vii nauá'maq se ỹaqamaxate' qamiri, ca' ỹahotaque ỹaỹoqojnec dá'maq na'qaatec chicqaugui da nca'laxa chicqo'ot so Cristo.

⁸ Qam no'm 'ue ca ỹa'xatema qamiri ca ỹoqa'a na'qaatec, quedá'maq na'qaatec chicqaugui da nca'laxa, ca ca'maxare qaỹa'ue ma'le ca ỹaatqajam lodegaxat nouaxanaxaset quiñi qota'a, 'eno'm chaqaỹim loqo'm ca qota'a lelaatec chicqashiguim.

⁹ Da'maxare shi'gue sa'xatetac caqamiri, qam nagui lotqai liỹa shinac: Chaqai no'm 'ue ca ỹa'xatetac ca na'qaatec 'ec chicqaugui ca nca'laxa, qam ỹoqa'a quedá'maq shi'gue coñiguit, ca' ca'maxare qaỹa'ue ma'le ca chalego lecaic nouaxanaxaset.

¹⁰ Ca quena' shinac dajo, ca ¿peeta'a chi sahotaque ỹa'maxarenta ỹim na qomyipi, loqo'm ñi qota'a? Loqo'm ¿sahotaque yiuojonta na qomyipi? Ma' quet ñaq sahotaque quiyim ỹa'maxarenta ỹim na qomyipi, ca sqaỹim lelaatec so Cristo.

Dá'maq 'neeto' so Pablo quiyim lelaatec so Jesús

¹¹ Qam qamiri ỹaqaỹa', dajo na'qaatec chicqaugui da nca'laxa, dá'maq sa'xatetac caqamiri, sahotaque quiyim 'yiiñii quiyim mesqai chi la'deenataxanaxac na qomyipi.

¹² Ma' se sachigoqto'ot ca qom, chaqai mesqaica ca yapaxaguinegue. Ta'ta'a quiyim chaqaiso so Jesucristo ya'deenaxanaxanegue da'maxare.

¹³ Qamiri shi'gue 'xahiteguelec dá'maq shintari' na' ñaqa shiquetalec dá'maq huelec na judioipi. Chaqai 'yiiñii da ỹonogoxonaxac quena' socanaxantapigui na mashic icoñiguit da la'qaatec ñi qota'olec, quiyim sahotaque ñalauajñi.

¹⁴ Ca quedá'maq queetalec quiyim huelec na judioipi na' ñaq salequetaugui, ca 'xoic ná'maq quena chi ñaloxouaripi quená'maq chi iuo' laseripi ñapacalec, ma' ỹim ná'maq ỹaatqajam sa'maxate' nauá'maq lapaxaguinataxanaxaco so 'auaxaic qareta'allipi.

¹⁵ Qam ỹimo' lca'acsec ñi qota'a na' saqa' ñi'qaañi, ca quedá'maq chalego lecaic le'xorenataxanaxa, ca' roỹaxañiua'. Ca' chaqaida 'ne'tegue co'na' ỹovita so laloqo',

¹⁶ ca ỹo'uet quiyim seuana so llaalec, qaiyi sa'xat da na'qaatec chicqaugui da nca'laxa quená'maq mesqai judioipi. Qam cana' 'ue dajo, qaica ca shicpegue' quiyim senat.

¹⁷ Vire'ta sqa saigue da Jerusalén quiyim ya'ỹa'alo saua 'auaxaqa caỹim lelaatqa so Jesús. Ta'ta'a quiyim se ñaỹaloxoren quiyim saigue da Arabia. Ca na' ime, ca' yapila yi Damasco.

¹⁸ Ca' sqa saigue da Jerusalén, ta'ta'a na' ime'ueque saua tres ñaxari. Ca na'le, ca seuana so Pedro, ca sento'ot so'maxare quesaua quince na'xata'.

¹⁹ Qam qaica ca liỹa seuana queso liỹa lelaatqaipi so qara'gaxala', qaisoota so Jacobo só'maq lqaỹa so Jesús.

²⁰ Ỹaatqajam se'taxachichiguiñi quiyim ỹaatqajam lliqueta dá'maq seretegueñi caqamiri, chaqai dajo ỹa'deenta ñi qota'a.

²¹ Ca na' ime dajo, ca shicpegue' yi 'laua Siria chaqai yi Cilicia.

²² Qam yi qarqaỹaripi, quiyí'maq shi'gue icoñiguit da na'qaatec queso Cristo quená'maq neetalec yi 'laua Judea, saqa' iuanapega aỹim.

²³ Ta'ta'a quiyim chaqai 'qaateguelco' quen aỹim co'quena' qohinac: “Só'maq ỹale ỹocanta'pe quen qomi' na'le, qam nagui ỹa'xatetac dá'maq leloxoỹaxac da npi'ỹaxac, dá'maq ỹahotaque iuagaxatac quen quesom.”

²⁴ Ca' qaimaqachintaco' quen ñi qota'a quedá'maq shintari'.