Filemón 1 - La'qaatqa ñi qota'olec Qota'olec & Qota'olec Novita Na Qomyipi

So Pablo ỹiriñi aso lelaata tai'a nqai'en so Filemón

¹ Ỹim Pablo, ỹim ncoñiiteguesec ma' sasouetapigui so Cristo Jesús. Ỹim chaqai ñi Timoteo selata qami' ana ilaata, qami' qanauochaxaua qarqaỹa Filemón ma' qami' qarotaua queda qaro'ueenataxanaxac,

² chaqai quená'maq mashic icoñiguit da na'qaatec lapooqo' na ra'aachi', chaqai 'nejem aca qarqaỹa Apia, chaqai ca Arquipo qarotaua queda qareloquiaxac.

³ Coñiguit qamiri da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.

Da le'xorenataxanaxa chaqai da lpi'ỹaxac so Filemón

⁴ Se neme saantacot da ña'aachic ñi qota'a quena' so'leente'te qami' quena' ñqouagaxaintac,

⁵ ma' 'ue da ỹa'xaỹaxac quiyim 'ue da re'xorenataxanaxa'e' chaqai da rpi'ỹaxaqui' queso qara'gaxala' Jesús chaqai da re'xorenataxanaxa'e' quená'ogue ná'maq lalamaxareteripi ñi qota'a.

⁶ Sashiilatac ñi qota'a quiyim quená'maq mashic huelec ñi'maxare chicqochigui da rpi'ỹaxaqui' quiyim ỹaatqajam ỹa'yiinchigui da qanqouagaxa queso Cristo Jesús.

⁷ Ca' 'xoic da ñitoonaxac, ña'ñaxatete'e' da re'xorenataxanaxa'e', ma' chicqochigui qami' quiyim ỹa'maqachigui na lauel ná'maq mashic icoñiguit da na'qaatec.

So Pablo rashiilaxan quiyim qai'xoren so na'ac Onésimo

⁸ Ma' quedajo, 'eno'm mashic ỹim lelaatec so Cristo, ca' seshiteta quiyim 'ue ca selachiraxalec,

⁹ qam qaiyiita ñi'xoresene'tot qami'. Ỹim Pablo mashic aỹim qo'xoỹom chaqai nagui ỹim ncoñiiteguesec sasouetapigui so Cristo Jesús,

¹⁰ sashiila'e' quiyim qouaquitegue na Onésimo, ma' mashic llaalec da ipi'ỹaxac quenajo ncoñiitaxanaxaqui.

¹¹ Quesaua 'auaxaqa na'xata' ñi Onésimo qaica ca 'negue caqami', qam nagui, ca' ỹaatqajam npe'eet caqami' chaqai caỹim.

¹² Ca' sopilaqta qami', ca' coñichiguit, 'ñiisa'gue quiyim chaqaỹim ná'maq coñichiguit.

¹³ Ỹa'maqachiguiñi quet quiyim ñaq ñolliitañi quet, qaiyi nimiiñiguit aqami' quiyim yotauan ro'ueenataxanot aỹim, ma' ỹim ncoñiiteguesec sasouetapigui quiyim sa'xatetac da na'qaataxac so Jesús.

¹⁴ Qam sqa soiquentac cá'maq so'uet quiyim se ña'deenqa'ajta', qaiyi cá'maq rqouagaxa'e' caỹim mesqai 'ec chicqochigui ca nepagaxallic. Ta'ta'a quiyim cá'maq chicqochigui qami' rqouagaxa'e' caỹim.

¹⁵ Ca' sqoue quiyim ñi Onésimo qoshiiueco' na'le caqami', qam nagui, ca totqai ca'e qami', mashic pilliraxauot.

¹⁶ Qam totqai 'neetari' ca ra'aqui', ta'ta'a quiyim paguec loyac queca na'ac, ta'ta'a quiyim nauochaxaua'e' rqaỹa'e'. Ỹim ỹaatqajam ỹoqo'itaxat, qam qami' paguec quet rqo'chita. Mesqaidaata quiyim 'neetari' ca ỹale, ta'ta'a quiyim 'neetari' ca rqaỹa'e' rpi'ỹaxaua'e' queso qara'gaxala'.

¹⁷ Ca no'm chaqaida quiyim ỹim riỹa'e', ca' coñichiguit ñi'maxare, 'ñiisa'gue quiyim coñichiguit aỹim.

¹⁸ Ca no'm 'ue ca lo'ueenataxanaxac se ỹa'maxañi, loqo'm 'ue aca la'uale caqami', ca o'laxañitegue caỹim.

¹⁹ Ca' ỹim Pablo shiriñi da ỹa'qaatec quiyim seshivichiñi' ma'le. Sha'apiguito' viichigui qavilli' quiyim ñaqa 'ue aca ra'ualli'i' caỹim queda chi nachaalataxaqui'.

²⁰ Ajá'a, qami' ỹaqaỹa, ñaqai vite ca rqouagaxa'e' caỹim, ma' qami' ipi'ỹaxaua queso qara'gaxala'. Ñaq lo'daxachirigui na iuel, ma' qami' ỹaqaỹa ipi'ỹaxaua queso Cristo.

²¹ Shiriñi dajo caqami', ma' sa'deenta quiyim qami' 'xaỹaxanaxaraic, chaqai sa'den quiyim 'viichi' dá'ogue dá'maq sashiilaxantaque, qam ỹapacauec nqai'ñi'.

²² Chaqai chaqa'ma' qatqajañisari' ca ilaqsoqo', ma' sqoue sqaỹaloq sovita qami'. No'm qaicoñiguit ca nqouagaxainaxaguii, ca' ñi qota'a ỹo'uet quiyim ñauañiguita qamiri.

Da niquinaxanaxac chaqai da na'maxa pa'aatec

²³ Ilata qami' da liquinaxanaxac ñi Epafras ñí'maq ñcoñiitaxaua sasouqatapigui so Cristo Jesús,

²⁴ chaqai ñi Marcos, Aristarco, Demas, chaqai ñi Lucas, nauá'maq yotauanta'pe queda ỹo'ueenataxanaxac.

²⁵ Ca' so qara'gaxala' Jesucristo ỹaanema qamiri cá'maq no'uen qayicyaxaguii. Ajá'a, ca' chaqaida 'neeta dajo.