Ezequiel 4 - La'qaatqa ñi qota'olec Qota'olec & Qota'olec Novita Na Qomyipi

So Ezequiel ỹa'xat quiyim qoyiga'a ma'le yi Jerusalén

¹ Ca' qami' ỹale, coñita ca losoc toquichigui, ca 'chirelec, 'viichi' yi na'a' Jerusalén.

² Ime, ca naqallichinchiguiñi nqai'ñi' queca nouaataxanaq chaqai ca nouenec quiyim qoyiga'a. Ca 'viichi' ca lquepaqataxanaxat quenaua lahil chaqai ca nco'ỹaxala', qaiyi 'ec ca na'a' qanahiquinchiguiñi.

³ Ca' chaqa'ma' coñita ca lecata lahi, ca lli'rañigui na lavinñi caqami' chaqai quiyi na'a', 'ec nquepaqataxanaxat. Ca' qami' loqoichiguit yi na'a' 'ec dá'maq quiyim mashic quira'a. Ca' dajo letanec ma'le na qomyipi quiyi Israel.

⁴ Ca' qami' nenañiriñi pa'xañisañi da nemaqe', ca pa'a'irelec dá'ogue da lasauaxaset na qomyipi quiyi Israel. Qami' nenañisañi queda nemaqe' 'xachi'sac da lasauaxaset

⁵ trescientos noventa na'xata', loqo'm ñigui 'óna na'xa'a queca 'óna ñaaxa queca lasauaxaset yi Israel.

⁶ Ca ma' ime' saua na'xata', ca' naqalcqoiriñi queda qatoiqui', ca' pa'a'irelec da lasauaxaset na qomyipi quiyi Judá quesaua cuarenta na'xata'. 'Óna na'xa'a ñigui ca 'óna ñaaxa queca lasauaxaset.

⁷ Ime, ca lotqai naqalcqoiriñi, ca' loqoira'a yi Jerusalén qanahiquinchiguiñi quena npa'guenaxaua; ca maxachi' da rqai'laxachi', ca 'xachi' da ỹeenaxat npa'guiñire'e' yi'maxare.

⁸ 'Ajñi', sa'ue ca riquichi' ñic, qaiyi se naqalcqoitegue da liỹa lahi, toco' ma' ỹovite' caua na'xata' re'xoyaxaquichi'.

⁹ Ime, ca' vite ca coñita trigo, cebada, mijo, avena, habas chaqai lentejas; ca cá'ogue ỹalecta' nqai'ñi', vite aca lahi', ca 'viichi' ca qanoqe'. Ca' chaqaicaata 'qui'sac quecaua trescientos noventa na'xata' quiyim nenañisañi pa'xañisañi da nemaqe'.

¹⁰ Ma' ỹovita ca laloqo', ca' lotqai qui'i' naloqojñi' cuarto kilo quiyi na'xa'a, ca 'qui'.

¹¹ Na raquipi' qai'neeta viise'e ca laloqo' quiyim ni'chirigui medio litro quiyi na'xa'a.

¹² Ca ma' 'viichi' ca qanoqe' qaica ca se iuana qami', ca' 'viichi' ca raqaulata'e' cana cebada ratoxochi' queca norec, lasoc nqai'ñi' na qom la'tec lashiviaxaic.

¹³ Ime, ca' lotqai 'naac ñi qara'gaxala': Ca se no'uen na'ic 'nejem na'maxare, cá'maq ỹa'ic ma'le na Israel llaalqaipi, ma' ỹovita ca 'laua senaxague.

¹⁴ Ca na'le, ca' shinac: Qami' ỹa'gaxala', ỹaatqajam se ỹauanapega secona ca se no'uen, chaqai se ỹauanapega quiyim sa'ic ca isecỹac leuaxaic la'at loqo'm ca netoc, chaqai se ỹauanapega se'guen ca se no'uen la'at.

¹⁵ Ca na'le, ca ñi qara'gaxala' 'naac caỹim: Hua', ca' sa'maxarenta quiyim ratoxochi' ca qanoqe' pan, viise'e na huaca la'tec lashiviaxaic, ca' le'en ca qom la'tec.

¹⁶ Ca na' ime, ca 'naac caỹim: So'uet quiyim qaica na na'ic ma'le quiyi Jerusalén. Na na'ic qanaloqochinta chaqai na qom 'ue da le'xoric quiyim que'e; chaqai qanaloqojontañi na laquip, ca' ni'chigui, qam no'chiitari'.

¹⁷ Qaica ma'le na huaxaỹaq chaqai na na'ic, chi na'iitecta' ma'le na qom, qam no'chiita'ta'. Chaqai chi nichiguereta'pegue' quena lasauaxaset.