Ezequiel 37 - La'qaatqa ñi qota'olec Qota'olec & Qota'olec Novita Na Qomyipi

So rashivita lpi'naqaipi

¹ Ñi qara'gaxala' ỹashil-lec aỹim, ca' no'xataxachigui aỹim queda lquesaxanaxa. Ime, ca' yillaalec yi ca'megue no'qajlec quena lpi'nec.

² Ca' ñi qara'gaxala' souoxon nqai'en naua'que naua lahil; mashic no'qajlec yi ca'megue quena lpi'nec ỹaatqajam 'xoic, chaqai sá'ogue mashic rashivita.

³ Ca na'le, ca 'naapiguiỹa': ¿Qami' vi'relec quiyim najo lpi'naqaipi ishit quiyim liỹa nca'leuec? Ca' ỹim shinac: Qami' ỹa'gaxala', qaqamite' 'yiiñi'.

⁴ Ca na'le, ca' ñi qara'gaxala' 'naac caỹim: Taqaita, quiichigui nqai'ñi' da ỹeenaxat, ca 'ñirac: Qamiri pi'naqaipi rashivita, na'xaỹaxañiỹa da la'qaatec ñi qara'gaxala'.

⁵ Ñi qara'gaxala' 'naac caqamiri: Tauguilo ñqaishine' qamiri ca nacat ỹa'ue da nca'laxa, qaiyi rca'lliiuec.

⁶ Sa'ue ma'le aca ro'ootahi, ca' sosapaxanlec queca la'at, ca' sapolec quena loshicmaxa, ca' saanem ca lacat, qaiyi liỹa nca'leuec. Ca' ma'le, ca' 'yiiñiỹa'a qamiri quiyim ỹim na'gaxala'.

⁷ Ca' ỹim shinapega dá'maq 'naapiguiỹa' ñi qara'gaxala'. Ca na' ñaq setaqatac, ca' 'ue so sa'xaỹaque: so'maxare nalataxa, ca' so lpi'naqaipi qochiguit cá'maq chi liỹa.

⁸ Ca' seuane'ta queso'maxare 'ue ana lo'oota chaqai na la'at, chaqai chaqa'ma' polec quena loshicmaxa. Qam qaica ca lacat ỹa'ue da lca'laxa.

⁹ Ca na'le, ca' ñi qara'gaxala' 'naac caỹim: 'Xachi' da ỹeenaxat quiyim nac ca nacat ỹo'uet ca nca'laxa, ca' 'ñirapega: Da la'qaatec ñi qara'gaxala' 'neetasa': Nacat 'viichi' ca nca'laxa, ñaqai naqui' chicqote'ogalo da rapiguim, 'guiñi, lqodoigue, chaqai da lauashiguim, ca 'viichi' quiyim nca'leuec najo qomyipi loshicmaxa ileu.

¹⁰ Ca' ỹim setaqa, sa'xat da leenaxat ñi qara'gaxala', chaqaida nqaishin dá'maq llilnataxanaxac. Ca' so nacat ỹo'uet da nca'laxa nanac, ca' inoxonougui so'maxare, ca so'maxare liỹa nca'leuec, ca' nachajñi, ca ma' ỹaatqajam 'xoic, ca' 'ec na nouaataxanaq nalauataxairipi.

¹¹ Ca na'le, ca' ñi qara'gaxala' 'naac caỹim: Na qomyipi quena Israel 'nejem najo pi'naqaipi. Ma' na'maxare 'naiquen: Na qarpi'naqaipi rashivita; qaica ca ñaquitqataque, ỹaatqajam qara'laañi.

¹² Hua', cha'regue 'ñirapega quiichigui nqai'ñi' da ỹeenaxat, ca 'ñirapega: Dajo 'naac ñi qara'gaxala': Qami' ỹalamaxaret, sauachi'ña qamiri quena viita'ñi; ca ñaqajshiguim qamiri quena'maxare, ca' sopilaxatalo qamiri yi 'laua quiyi Israel.

¹³ Ca ma' sauachi'ñalo qamiri cañi rahiri, ca' ñaqachishiguim cañi'maxare, ca' qamiri ỹalamaxarete' 'yiiñii ma'le quiyim ỹim ra'gaxalari.

¹⁴ Ỹim sa'ue caqamiri da ỹacat ỹo'uet ca nca'laxa, ca' qamiri rca'lliiuec. Ca' sañiỹalec yí'maq ralamaxarichii na'lauahi. Ca ma'le, ca' 'yiiñii quiyim ỹim, ỹim na'gaxala' shinac chaqai so'uet. Ỹim na'gaxala', se'taxajñi da ỹa'qaatec. (37.15—42.20 Lapoỹata' yaua Israel chaqai yi Judá. Ñi qota'olec ỹouen so nashi Gog quiyim ỹa'ue da nouaxanaxaset. Qaỹopilaxachichigui da no'ueenataxac yi Israel. So Ezequiel qai'xategue da Jerusalén. Qaiuana quiyim liỹa 'ue ma'le so no'ueenaxanaxaqui.)