Ezequiel 36 - La'qaatqa ñi qota'olec Qota'olec & Qota'olec Novita Na Qomyipi

Dá'maq dalaxaic no'ueenataxac so Israel

¹⁶ Ñi qara'gaxala' novita ỹim, ca 'naapiguiỹa':

¹⁷ Ma' ỹovita quiyim neetalec yi na'laua na Israel llaalqaipi, iualaxain quedá'maq se no'uen ỹo'ueetetac. Dá'maq no'ueenataxac caỹim napio'o chaqai yaqaica'a.

¹⁸ Ca na'le, ca' senaxalec da iuel yi'maxare queda lalauataxanaxac ỹo'uet quenajo 'laua chaqai dá'maq 'neetari' quiyim iualaxaintac, nqouagaxaintacot na nashiilec nqolaquipi.

¹⁹ Chaqai dá'maq nouaxanaxaset ná'maq se no'uen ỹo'ueetetac, chicqochigui quiyim seuagaxajlec na liỹa 'laua quena ỹoreta'oguit qomyipi quena 'laua.

²⁰ Qam quená'ogue ná'maq na'aateripi quená'maq ỹovira'a yi'maxare, ỹo'maqajantac da co'teeta ỹeenaxat, ma' na qomyipi 'naiquen: Najo ná'maq lalamaxaret ñi na'gaxala' qota'olec, qam ca'o' na'le yi na'laua.

²¹ Ca na'le, ca' ỹaatqajam 'xoic da iueetaxanaxa na' seuana quiyim qaiualaxaintac da co'teeta ỹeenaxat sauaxat yi Israel quecanchaqaica quena qomyipi ỹovirera'a saua'maxare.

²² Vichiguiño' 'ñirapega yi qomyipi quiyi Israel: Dajo 'naac ñi qara'gaxala': Dá'maq ỹim so'uet sqa 'iỹapegueu'a qamiri llaalqaipi so Israel, ta'ta'a quiyim sahotaque liỹa qaimaqachin dá'maq co'teeta ỹeenaxat, quiyim 'maqajñiỹac qamiri quená'maq qomyipi viriu'a qamiri.

²³ Ỹim ñachaxana na ỹoreta'oguit qomyipi queda chalego lecaic lco'taxa da ỹeenaxat dá'maq qamiri hualaxaiñitac quena'maxare. Ca ma' ỹim so'uet, ca yi'maxare ỹa'den quiyim ỹim ná'maq ỹim na'gaxala'. Ỹim na'gaxala', se'taxajñi dajo.

²⁴ Ỹim ñaqata'alo qamiri ma'le quená'ogue na qomyipi quenaua 'lauari; llapoonta' qamiri, ca yapilaxate' qamiri quena na'lauahi.

²⁵ Sco'taxate' qamiri quená'maq no'uen huaxaỹaq, ñquiỹouec ná'ogue na rishillii, ñaqata'a ma'le dá'maq 'ñiitari' quena nashiilec nqolaquipi;

²⁶ sanauguilo qamiri ma'le aca dalaxai re'taxanatahi chaqai ca dalaxaic no'ueenataxaguii. Ñaqat caqamiri añi re'taxanatahi 'ec ca qa', ca' sanauguilo qamiri aca re'taxanatahi nañaanta.

²⁷ Chaqai sanauguilo qamiri da ño'ueenataxac, ca' so'uet quiyim pacqajñichiguilo naua ỹapaxaguinataxanaxaco chaqai naua ỹaqataxaco;

²⁸ ca' ñiitalec ma'le najo 'laua saanem na'le so 'auaxaic qataa'illipi, ca' qamiri ỹalamaxarete' ma'le chaqai ỹim qota'olec caqamiri.

²⁹ Ñaqata'alo qamiri ma'le quená'ogue ná'maq rapio'xochii. Ca' so'uet quiyim 'xoic ma'le ca na'ic trigo, ca' tot ỹovitalo qamiri nqaishin ca nqopaaxa.

³⁰ Chaqai qai'neeta so'uet quiyim ana qo'paq quena no'ueenaxa nqo'neuec ana la, qaiyi tot liỹa quiyim 'ue quet ca rayiloxohi quena liỹa qomyipi sauaxat da rqopaaxahi.

³¹ Chaqai noma' o'lliinchi'te dá'maq se no'uen 'ñiitari' chaqai da se no'uen ro'ueenataxanaxaguii, ca chaqai qamiri 'ue ma'le ca rayiloxohi sauaxat dá'maq rasauaxashichii chaqai dá'maq se no'uen 'viichitac.

³² Ỹim na'gaxala', se'taxajñi da ỹa'qaatec. Ca' dajo 'yiiñita, qamiri llaalqaipi so Israel, quiyim ỹim se so'uet dajo quiyim qamiri 'viichitac ca lo'yaxanec, ta'ta'a quiyim nayiloxoñii chaqai 'miitajlec quedá'maq no'ueenataxaguii. (36.33-38 Dá'maq naata la'maxa ma'le yi Israel.)