Ezequiel 3 - La'qaatqa ñi qota'olec Qota'olec & Qota'olec Novita Na Qomyipi

¹ Ca na'le, ca' so sa'xaỹaque 'naac caỹim: Qami' ỹale, 'qui' najo nerqaipi. Ime, ca' quirepegue' yi llaalqaipi so Israel, ca' taxahi' ma'le.

² Ca' sauachigui na ỹap, ca so'maxare 'naac quiyim sa'ic so nerec.

³ Na' ime, ca' 'naac caỹim: Qañi' najo nerqaipi saanem qami' nagui, no'xagui nqai'ñi' ana racoomi'. Ca' ỹim sa'ic, ca' caỹim ỹaatqajam lo'daxaraic 'ec na rapic li'i.

⁴ Ca na'le, ca 'naac caỹim: Mo'e', quirepegue' 'ñirapega yi llaalqaipi so Israel dá'maq shinac quiyi'maxare.

⁵ Ỹim se selachita cá'maq mese ra'qaachaxaua'e' quiyim sqai 'xaiguit qami', ta'ta'a yi llaalqaipi so Israel.

⁶ Se selachita na ỹoreta'oguit qomyipi ỹora'alo naua la'qaatqa sqai 'qa'italo naua la'qaatqa. Ca 'eno'm quet selata qami' na ỹoqa'a qomyipi, na'maxare na'xaỹaxana quet qami'.

⁷ Qam na llaalqaipi so Israel se na'xaỹaxana qami' ma'le, ma' ỹim ná'maq se na'xaỹaxana. Ná'ogue na llaalqaipi so Israel ỹaatqajam hualoxonyipi chaqai ỹa'ñaxachichigui na lqahic.

⁸ Qam ỹim so'uet quiyim 'ñaaxaic ñi qashiiqui' chaqai sqaica que'guenalec qami', 'ñiite'm yi qomyipi.

⁹ So'uet quiyim ra'ñii qami', 'ec na qa', leenaxat diamante, paguec la'ñaxac quena chaqai qa'. Totaxan ro'chi'i', 'neeto' ro'daxachirec ma' na'axachigui na lashic quiyim npa'guene'e' qami'.

¹⁰ Ime, ca 'naac caỹim: Ỹaatqajam na'xaỹaxañiteta dá'ogue dá'maq shinac caqami' chaqai totaxan 'laxachite.

¹¹ Mo'e', 'ajnaxañita ca qauochi' ỹoqa'a ca 'laua neetalec. Ca no'm na'xaỹaxan loqo'm se na'xaỹaxan, qam 'ñiraco' ma'le: Ñi qara'gaxala' 'naac dajo.

¹² Ca na'le, ca' da lquesaxanaxa ñi qota'olec yi'xajshiguim, ca' queda sqoshiita'gue 'ue so sa'xaỹaque 'ec na nalataxa da lelamaxa na' nachipishiguim da lquesaxanaxa ñi qara'gaxala'.

¹³ Ca' chaqaido' da lelamqa' naua laua' saua ise' quena' queuoquetecta', chaqai saua laviol hueesa'ñi yi'maxare. Da lelamqa' 'ec na nalataxa.

¹⁴ Ca' da lquesaxanaxa ñi qota'olec naqata'a ỹim quiyi'maxare, ca' ỹim shic, qam se ỹa'maxagui na iuel chaqai sachicota, qam ñi qara'gaxala' lo'qoota'a da iqai'laxat ỹovicqochigui.

¹⁵ Ca' sovita yi na'a' Tel Abib, hueeto'ot na lahi aso lachiugue Quebar yí'maq neeta'ño' nqohin so Israel llaalqaipi. Ca' siete saua na'xata' senta'anyi, qam se ño'uen, se sa'den cá'maq so'uet chaqai cá'maq shinac. (3.16-27 Ñi qota'olec neloxoỹaq nqai'en so Ezequiel.)