Éxodo 32 - La'qaatqa ñi qota'olec Qota'olec & Qota'olec Novita Na Qomyipi

So nadenqatec huaqui llaalec 'oro

¹ Ca' so Israel llaalqaipi co'na' retan quiyim qaua' rapilñi so Moisés caso hueetalec qa' ladocai, ca lapoỹo'ot so Aarón, ca 'naaco': —'Viichi' ca qarashiilec, ca' chaqaica cá'maq qolaxalec ma'le. Ma' qomi' se sa'deenaq cá'maq 'neeto' ca Moisés cá'maq naqata'alo qomi' quiyi Egipto.

² Ca' so Aarón 'naaco': —Naqachii' naua lishite 'oro naua rouarii, chaqai naua qachaalaxahi, chaqai naua qachaallii. Ca' nodoiuo quenajo.

³ Ca sá'ogue naqat ana lishite 'oro, ca' qaỹodou'a so Aarón.

⁴ Ca so'maxare icoñiguit. Ca icaxajta' so 'oro, ca' inaxañigui aso no'ueetaxaqui, ca' chicqochigui nqai'en so huaqui llaalec. Co'na'le, ca sá'ogue 'naaco': —¡Qamiri Israel llaalqaipi, najo ná'maq rashiilliguii ná'maq naqata'alo qamiri na'le quiyi Egipto!

⁵ Ca co'na' so Aarón iuana dajo, ca' no'xonshiguim aso lcopatoxonaxalate. Ime, ca ỹaualaq, netenegue da la'qaatec, 'naaco': —¡Ma' nete'e so'ueetqo' ca qaremaqachic, ca' semaqachinaq ñi qara'gaxala'!

⁶ Ca na' nete'etam queso liỹa na'xa'a, ca qaỹodouo na iseripi quiyim qaỹavigaxat, qaỹa'ue nachitaxanataxanaxat, ca qaỹopilot ñi'maxare. Ca na' ime, ca sá'ogue so qomyipi nqa'xanñi, ca' que'e chaqai ne'et. Ime, ca ne'laxashiguim, ca rishiguiỹata'. (32.7-14 Ñi qota'olec ỹahotaque nalauajñi so lalamaxareteripi, qam so Moisés nqouagaxain quiyim sqai 'ne'tegue dajo.)

¹⁵ Ca co'na'le, ca' so Moisés rapilñi caso hueetalec quemaralec qa' ladocai, ne'xatete' saua dos qari naneretalgoto da nelaataxanaxaquipi. Saua'maxare qoỹeretalgoto naua'que naua lahil.

¹⁶ Qam chaqaiñi ñi qota'olec lo'ueenatqa saua qari, chaqai chaqaiñi ñi'maxare lerqa sauá'maq hueetalgoto saua'maxare.

¹⁷ Ca co'na' so Josué 'xaỹaco' so laualaxac so qomyipi, ca 'naaco' queso Moisés: —'Ec laualaxac na qom quena' lauataq dá'maq sa'qaataque quiyi co'matqa'.

¹⁸ Qam so Moisés 'naaco': —Dá'maq sa'qaataque se no'ueenec quiyim netoon rauegaxan, chaqai se no'ueenec quiyim rachicota 'ue ca noxonec, 'eco' ỹoqa'a no'ueenec dá'maq sa'qaataque.

¹⁹ Ca co'na' so Moisés paguec sqoỹoqaque nqai'en so co'matqa', ca iuane'ta so huaqui llaalec chaqai ca rasotaxaripi, ca' ỹaatqajam ro'o. Ca nenaqaiño' saua lo'qoota'alo qari, ca ropoqoguilo nqai'ne' quena lahi aso quemaralec qa' ladocai.

²⁰ Ca co'na'le, ca' icona so huaqui llaalec, ca' inaxañigui ca norec. Ime, ca' ỹopoxoỹaxachigui, ramoqota nqai'en. Ca na' ramoqota, ca' icona, ca inaxañigui ca huaxaỹaq. Ca na' ime, ca' ni'chigui nqai'en so Israel llaalqaipi ca huaxaỹaq.

²¹ Ime, ca 'naaco' queso Aarón: —¿Nega'ỹo' cá'maq 'ne'tegue qami' najo qomyipi? ¿Chi'neco' ma' ỹo'uet nqai'ñi' da chalego lecaic lasauaxaset?

²² Ca' so Aarón 'naaco': —Qami' ỹa'gaxala', totaxan 'o'iriua'. Qami' 'yiiñite' najo qomyipi ỹaatqajam nqo'ta ỹo'uet da se no'uen.

²³ Na'maxare 'naapiguiỹa': 'Viichi' ca qarashiilec, qaiyi qara'gaxala', ma' se sa'deenaq negue' cá'maq 'neeto' ca Moisés cá'maq naqata'alo qomi' quiyi Egipto.

²⁴ Ca' ỹim shinac na'le: Quecá'maq 'ue ca hueeto'ot 'oro, ca' ỹoỹootec. Ca na'maxare nañan ca 'oro, ca' ỹim senaxañigui ca norec, ¡ca chicqochigui na'le ñi huaqui llaalec!

²⁵ Ca co'na' so Moisés iuana so qomyipi quiyim qaica ca nollaañi, chaqai 'ue da lichic quiyim chi ne'naxat quena npa'guenaxauaripi, ma' so Aarón tot ishit quepaxat.

²⁶ Co'na'le, ca' nachajñi, hueetougui ñi ñigo queso co'matqa'. Ca 'naaco': —Ná'ogue ná'maq ñaqai queetalec ñi qara'gaxala', ca nacpegue' aỹim. Ca sá'ogue so llaalqaipi so Leví lapoouo queso'maxare.

²⁷ Co'na'le, ca 'naaco' so Moisés: —Ñi qara'gaxala', ñí'maq qota'olec quena Israel llaalqaipi, 'naacsa': Quiñi 'óna icona cá'maq chi lecat, ca pilliu'ga na co'matqa', ca' quiitaguilo naua lasomi', ca chi nalauachiỹata'. Quiñi 'óna ỹalauat ca lqaỹa, nauochaxaua chaqai ca lauora.

²⁸ Ca so Leví llaalqaipi ipaquichigui nqai'en da 'naac so Moisés. Ca quesojo na'xa'a tres mil so ỹalliripi ileu.

²⁹ Co'na'le, ca 'naaco' so Moisés: —Ca' nagui, ca' qoỹanaguilo qamiri quiyim qamiri letaxaỹaxanqajanqa na qomyipi quiyim qaretaxaỹa'pegue' ñi qara'gaxala'. Ma' quiñi 'óna npa'guene'e' ca llaalec chaqai quena liỹa queca chi lqaỹa. Ca' vichiguiño' nagui, ca' ñi qara'gaxala' no'ueenaxat nagui ca qayicyaxaguii.

³⁰ Ca' queso liỹa na'xa'a, ca' so Moisés 'naaco' queso qomyipi: —Qamiri ỹaatqajam chalego lecaic da rasauaxashichii. Ca' vichiguiño' nagui, ca saashi'ma ñi qara'gaxala', sha'apiguito' seshit quiyim ỹapalaxat da rasauaxashichii.

³¹ Ca' so Moisés pilshi'ma yi neeta'ñi ñi qara'gaxala'. Ca 'naaco': —Yi qomyipi ỹaatqajam chalego lecaic da lasauaxaset na' ỹo'uet so lashiilec 'oro.

³² Ca' ñi'xoresene'tot qami' nagui quiyim palaxachi' da lasauaxaset. Qam no'm sqai palaxachi', ca ¡'maxaraic palaxachi' ca ỹeenaxat mashic 'chiriñi caso nilliri'i'!

³³ Qam ñi qara'gaxala' 'naaco': —Cá'maq 'ue ca lasauaxaset caỹim, qaicaata sapalaxat cayi ñilere.

³⁴ Ca' qami' qui', viquita na qomyipi yí'maq shiquetapi'ñi. Ca' so ilaatec piguim le'ec ỹashaxantac qami' ma'le. Ca ma' noviro ca na'xa'a quiyim sa'ue ca nouaxanaxaset, ca ỹim sa'ue ma'le ca nouaxanaxaset cá'maq 'ue ca lasauaxaset.

³⁵ Ca' ñi qara'gaxala' ỹa'ue so nelata ne'ne' so qomyipi sauaxat nqouagaxainot só'maq huaqui llaalec só'maq lo'ueenatec so Aarón.